ˈMën ˗kë mɛn ˗nu ˈwo yö, ˈwo zuʋ̈gblüdhidhe ˈgü? ˗Wo zuʋ̈gblüdhidhe ˈgü ˈyö ˗tɔ ꞊dhɛ ˗wo yi ˗bha ˗bhɔkwëë do ˗ta. ˗Kwɛ do ˈgü ˗gɛnɲan ˈka ˗yaaga, yi dho yi ˈkwëëdhö ˗bhɔkwëë ˈˈgblʋ̈gblʋ̈ ˗nu ˗ta, ꞊dhɛ ˗Zlan ˗dhɔkëmɛn ˗nu ˈwo kun ꞊kwɛŋzü, ˗an ˈdhö. (Deutéronome 16:16) ˗Kwɛ do ˈgü, ˗bhɔkwëë ˈˈgblʋ̈gblʋ̈ ˗yaaga ˈnën ˈyi ˗an kë. ˈWo ˈnën ˈwo ˗tɔ ˈˈpian do ˈˈpiʋ̈ ˗bhɔkwëë ꞊plɛ ˈyi˗ ˗kë ˗dhɛkpaɔyi do ˈˈpiʋ̈ waa ˗bhɔkwëë ˈkpii˗ do ˈyi˗ kë ˗dhɛkpaɔyi ˗yaaga ˈˈpiʋ̈. ꞊Trɔɔn ˗mɛɛn ˈö ˈyi˗ ꞊slɔɔ ˗bhɔkwëë ˗nu bhë, ˗an ˗ta?

˗Wo yi ˗bha ꞊dhegblüzëdhɛ ˗gɛn ˗gban. Izraɛdhömɛn ˗nu ˗kun Zoova ˗dhɔkë ˗ni ˈgü zuʋ̈gblüdhidhe ˈgü “mɛn kpö ꞊va” ꞊zinŋ ˈgü. ˗Kɔ do bhë˗ ˈka ˈpö, yi Zoova ˗dhɔkë zuʋ̈gblüdhidhe ˈgü ˗a ˗bhɔkwëë ˗nu bhë, ˗an ˗ta. (Psaume 26:12) ˗A ˗bhɔkwëë ˗nu ˈwo ˈˈdhʋ̈ ˗an ˗ta, yi ˗kpan Zoova ˗bha ꞊Gbɛkiö ˗nu ˈwo go ˗zlanwokɔdhi waa ˈˈsɛ ˈˈwɛɛ ˗nu ˈgü ˗an ˗bha. Minŋdii ˈka, yi ˗to yi ˈkwëë˗ ˈö ˈyi pë bhö, ˈö ˈyi ˈˈdoo dɔ zuʋ̈gblüdhidhe ˈgü. (Këwɔn ˗nu 2:46) ˗A ˗bhɔkwëë ˗nu bhë ˗an ˗ta, ˗dhɔ ˈö ‘yi dheebhang ˗nu ˈwo ˈdhang bho Yesu ˈˈdhiʋ̈ ˈpö ꞊dhɛ yi ˈdhö’ ˗an ꞊zinŋ ˈgü, yi˗ yö ꞊dedewo.—1 Piɛdhö 2:17.

˗Wo yi ˗gɛn ˗dho ˈˈdhiʋ̈ ˗Zlan ˗bha ʒiaan ˗ta. “˗Wo ˗nu” ˈwo ˗an ˈgü ˗po Izraɛdhömɛn ˗nu ˗dhɛ, ˗dhɛ ˈwo ˗an “ˈgüman”, ˗an zuʋ̈gblü ˗yö ˗dhi. (Nehémia 8:8, 12) Yi ˗de ˈpö, yi ꞊klaŋ ˈwo˗ ˗kë Biblö ˈka yi ˗bha ˗bhɔkwëë ˈˈgblʋ̈gblʋ̈ ˗nu ˗ta bhë, ˗yö yi ˗dhɛ ˗së. ˗A ˗bhɔkwëë ˈˈpɛpɛ ˗gɔ ˗yö ˗go Biblö ˈgü. ˈˈDhɛɛtaadhiaŋ˗ ˗së waa ˈˈslö ˗tiaandhö ˗nu ˗wo yi ˗takun kö ˗kɔ ˈö ˈyi ˗dho ˗Zlan dhɔɔbhaawɔn ˗kë ˗a ˈka yi ˗bha ˗tosɛta ˈgü, ˈyi˗ dɔ. ꞊Ya ˈgo mü ˈzü, kletiɛn ˗nu ˈwo ˗to ˗a ˈˈgbɩɩ˗ ˈka ˈwɔn ˈˈgbɩɩ˗ ˗nu ˈwo ˈˈtʋ̈ŋ ˗totaabhasü yö ˗a ˈgü, ˗an ˗ta, ˗an ˗bɔagüwɔn ˗nu ˗wo yi ꞊faan ˗mën. ˗Bhɔkwëë ˈkpii˗ ˗nu ˗ta, ˗kwɛzlan ˗nu ˈwo Biblö ˈgü, ˗wo ˗an ˗bha teatrö ˗kë, kë ˈˈdhʋ̈ kö ˗wo ˗gleŋ ˗da yi ˗bha. Yi ˗bha ˗bhɔkwëë ˈˈgblʋ̈gblʋ̈ ꞊gban ˈˈpɛpɛ ˗ta, mɛn ˗nu ˈwo˗ ˈˈpiʋ̈ kö ˗wa ˗zɔn mɛn ꞊gban ˗dhɛ ꞊dhɛ ˗wa wo ˗de nu ˗Zlan ˗dhɛ, ˗wo ˗an bɔ ˈˈyi ꞊bhaa.

• ˗Mën ˈö ˗kë ˈö yi ˗bha ˗bhɔkwëë ˈˈgblʋ̈gblʋ̈ ˗nu ˈwo yi zuʋ̈gblüdhi?

• ꞊Trɔɔn ˗mɛɛn ˈü ˗dho ˗a ꞊slɔɔ ˗bhɔkwëë ˗nu bhë, ˗an ˗ta?