Ajane Kö Nyipunieti Troa Atre La Nyipici?
Nemene nyipici? Nyipici, ngöne hi lo itre xaa hnying ka sisitria catr. Maine jë hnei epuni hna hane hnyinge tune la:
- Hapeu, Akötresieti kö a hane kukehni së?
- Hapeu, tro kö elanyi a paatre palua la isi me akötr?
- Nemene la pengö së thupene la mec?
- Hetre mejiune kö göi ange ka meci hë?
- Tro ni a thithi tune kaa matre troa drei ni hnei Akötresie?
- Tune kaa la aqane tro ni a hetrenyi la nyipi manathith?
Troa öhne ekaa la itre mekun nyine sa la itre hnyinge celë? Maine tro epuni thele thene la itre atr, tro ha isapengöne la itre mekune hna hamëne hnei angatr. Ketre, ngacama epuni pena a hnying kowe la itre atr ka inamacan, me itre ka trene hnëqa ngöne la nöj, ngo, maine jë tro pala hi a isazikeu la itre mekune i angatr. Ame la itre xaa mekun, tre, hmekune hi la hnyinge së enehila, ngo ame hë elany, maine jë thaa ka nyipici hmaca kö.
Eloine pe, hetrenyi la ketre itus ka qatrenge la itre mekune ka sa hnyawa la itre hnyinge së. Ketre itus ka pëkö trenga thoi ngön. Nge hnei Iesu Keriso hna qaja ngöne lo nyidrëti a thithi koi Akötresie, ka hape: “Wesi Ula i cilie la nyipici.” (Ioane 17:17) Atre asë hi së enehila laka, ame la Wesi Ula, tre, kola qaja la Tusi Hmitrötr. Ame cahu ngöne la itre götrane ne la itus, tre, tro hë epuni a öhne la itre mekune ka hamëne koi së la lai nge ka nyipici; itre ej e hnine la Tusi Hmitrötr nge ka sa lo itre hnying ka fe qen la tusi celë.
Hapeu, Akötresieti Kö a Hane Kukehni Së?
KEPINE MATRE FETRA PI LA HNYINGE CELË: Easa mele ngöne la ketre fen hna jilapane hnene la iaxösisi, memine la thiina ka thaa meköti kö. Nge nyimutre la itre hmi ka qaja, ka hape, ame la itre akötr hne së hna melën, tre, aja i Akötresie.
INI HNA HAMËNE HNEI TUSI HMITRÖTR: Thaa Akötresieti kö la qaane la ngazo. Hna qaja ngöne Iobu 34: 10, ka hape: “Loi e iananyi la ngazo me Akötesie kete tune la thina ka ngazo me Kapucatinasë.” Hetrenyi la ketre aja hnei Akötresie hna hnëkën kowe la itre atr. Celë hi matre hnei Iesu hna ini së troa thith, ka hape: “Tetetro i anganyihunieti e kohoti hnengödrai,…jiniati e hlepëtipi la baselaia i enëtilai. Longëtinejë la hanengë i enëtilai e celë fewatine axajanëti e kohoti hnengödrai.” (Mataio 6:9, 10) Nyipici, Akötresie a kukehni së, ene pe Nyidrëti a nue asë la trenge catre i Nyidrë, matre troa eatrëne lo sipu aja i Nyidrë.—Ioane 3:16.
Wange ju fe la Genese 1:26-28; Iakobo 1:13; me 1 Peteru 5:6, 7.
Hapeu, Tro Kö Elanyi a Paatre Palua La Isi Me Akötr?
KEPINE MATRE FETRA PI LA HNYINGE CELË: Thatreine kö troa e la etrun la itre atr ka meci hnei isi. Hna ketri së asë hi hnene la itre akötr e celë fen.
INI HNA HAMËNE HNEI TUSI HMITRÖTR: Akötresie a thingehnaeane laka, troa tingeting elanyi la fen asë. Fene la musi ne la Baselaia i Nyidrë, “tha tro hmaca kö [la itre atr] a ini ishi.” Tro pe angatr a “lepelepe la ite taua i angate mate nyine uja dro pena.” (Isaia 2:4) Tro hë Akötresie a apaatrene la nöjei thiina ka thaa meköti kö me nöjei akötr. Kolo fe a thingehnaean hnei Tusi Hmitrötr, ka hape: “Nge tro [Akötresie] a köle tije la nöjei tenge timida asëjëihë qa ngöne la ite lue meke i angat; nge pa hmaca kö mec, me hace hni, me teij, me aköt; ke patë hë la ite ewekë hnapan [kolo itre thiina ka thaa meköti kö memine lo itre akötr].”—Hna Amamane 21:3, 4.
Wange ju fe la Salamo 37: 10, 11; 46:9; me Mika 4: 1-4.
Nemene La Pengö Së Thupene La Mec?
KEPINE MATRE FETRA PI LA HNYINGE CELË: Nyimutre la itre hmi ka qaja, ka hape, hetrenyi la ketre ewekë hnine la atr, nge ka mele pë hë ngöne la angeic a mec. Ame itre xan, angatr a mejiune laka, tro la itre ua ne la itre ka meci a xatuane maine akötrën la itre atr ka mel. Ame pena itre xan, angatr a mekune laka, tro Akötresieti a kuiën la itre atr ka ngazo e hnine la ifereno matre troa akötrë angatr.
INI HNA HAMËNE HNEI TUSI HMITRÖTR: Ame la kola meci la atr, paatre hë la mele thei angeic, thatreine hë dreng, me goe, me ithanata, maine mekune pena la ketre ewekë. Kola amamane ngöne Ate Cainöj 9:5, ka hape: “Tha te kö la kete ewekë hnei ite ka meci hë.” Pine laka, pëkö hna wanga atrehmekun, me mekun, maine melëne pena hnene ka mec, haawe, thatreine kö angeic troa akötrën maine xatuane pena la itre ka mel.—Salamo 146:3, 4.
Wange ju fe la Genese 3:19 me Ate Cainöj 9:6, 10.
Hetre Mejiune Kö Göi Ange Ka Meci Hë?
KEPINE MATRE FETRA PI LA HNYINGE CELË: Easa ajane troa mel, me ce mele madrin memine la itre hne së hna hnim. Aja lai ka ej e kuhu hni së asë, la troa iöhnyi hmaca memine lo itre atr hne së hna hnim ka meci hë.
INI HNA HAMËNE HNEI TUSI HMITRÖTR: Troa amelene hmaca lo itre atr ka meci hë. Hnei Iesu hna thingehnaean, laka “tro la nöjei ate ngöne la ite hua [“nyine amekunën,” Traduction du monde nouveau] a denge la aqane ewekë i angeic, me tropi.” (Ioane 5:28, 29) Ame la troa mele ngöne la paradraiso e celë fen hnene la itre atr ka mele hmaca qa hna mec, tre, kolo hi lo aja i Akötresieti lai ekö. (Isaia 65:21-25) Kolo fe a thingehnaeane laka, ame la itre atr ka idrengethenge, pë hmaca kö tro angatr a hetre sine mec, nge tro ha hetrenyi la mele ka thaa ase palua kö. Celë hi matre, kola qaja hnei Tusi Hmitrötr, ka hape: “Tro ha la ange ka meköti a hetenyi la nöj, me lapa palua kö ngön’ ej.”—Salamo 37:29.
Wange ju fe la Iobu 14:14, 15; Luka 7:11-17; me Ite Huliwa 24:15.
Tro Ni a Thithi Tune Kaa Matre Troa Drei Ni Hnei Akötresie?
KEPINE MATRE FETRA PI LA HNYINGE CELË: Ka thithi la itre atr ngöne la nöjei hmi asë. Ngo nyimutre la itre ka mekune laka, thaa hna kapa kö la itre thithi angatr.
INI HNA HAMËNE HNEI TUSI HMITRÖTR: Hnei Iesu hna ini së matre thaa tro kö a caasi pala hi la aqane thithi së. Öni nyidrë: “E tro nyipunie a thith, the xötraeë kö, tune la nöjei ethen; ke angat’ a mekune laka tro ha dei angate qa ngöne la nöjei tenge ewekë ka nyimute.” (Mataio 6:7) Maine easa ajane tro Akötresie a drenge la itre thithi së, loi e tro sa thith thenge la aja i Nyidrë. Haawe, nyipi ewekë troa atrepengöne la aja i Nyidrë, nge thupene lai, loi e troa ihmeku memin la itre thithi së. Kola qaja fe ngöne 1 Ioane 5:14, ka hape: “E tro sha sipone kete ewekë thenge la aja i [Akötresie], nyidëti a dei shë.”
Wange ju fe la Salamo 65:2; Ioane 14:6, 14; me 1 Ioane 3:22.
Tune Kaa La Aqane Tro Ni a Hetrenyi La Nyipi Manathith?
KEPINE MATRE FETRA PI LA HNYINGE CELË: Nyimu atr ka mekune ka hape, ame la manie memine la troa hlemu, maine mingöminge pena, tre, itre eje hi lai ka troa hamë manathith. celë hi matre, angatr a nyinyape thele la itre ewekë cili göne hmekuje hi la troa öhnyi manathith.
INI HNA HAMËNE HNEI TUSI HMITRÖTR: Hnei Iesu hna amamane la jëne manathith, öni nyidrë: “Manathithi la ite ka pë ewekë ngöne la ua, ke thatraqai angate la baselaia ne hnengödrai.” (Mataio 5:3) Ijije tro sa hetrenyi la nyipi manathith, e hne së hna thele troa kuca la ewekë ka sisitria catr, ene la troa thele ielene troa atre Akötresie memine la aja i Nyidrëti koi së. Ej e hnine la Tusi Hmitrötr la nyipici cili. Celë hi lai ka troa xatua së lai troa atrehmekune la ka nyipi ewekë, qa ngöne la ka thaa nyipi ewekë kö. Maine tro sa nue la nyipici ne la Tusi Hmitrötr troa xatua së troa axecië mekun, me wenë la itre aqane ujë së, tro ha hetre sipu aliene la mele së.—Luka 11:28.
Wange ju fe la Ite Edomë 3:5, 6, 13-18 me 1 Timoteo 6:9, 10.
Ame caha itre hne së hna ce wang, tre, itre hnepe mekune hna xome qa hnine la Tusi Hmitrötr matre troa sa lo sikis lao hnying. Hapeu, aja i epuni kö troa hane atre hnyawa fe la itre xan? Maine epuni fe lo itre ka “pë ewekë ngöne la ua,” eje hi laka, aja i epuni hi lai. Maine jë hetre kö la itre xaa hnying, tune la hna hape: ‘Maine Akötresieti a kukehni së, pine nemene matre Nyidrëti a nue la ngazo me akötr ngöne la mele ne la atr? Tro ni a kuca tune kaa matre tro loi la aqane mele ne la hnepe lapang?’ Tusi Hmitrötr a sa hnyawa la itre hnyinge celë, memine kö lo itre xaa hnying.
Ngo ame enehila, nyimutre la itre atr ka luelu troa wange la aliene la Tusi Hmitrötr. Angatr a goeëne lai, kösë ketre itus ka tru catr pala ha troa e, nge ka thaa jol troa trotrohnin. Hapeu, epuni kö a hane aja ixatua matre troa sa la itre hnyinge i epuni hnei Tusi Hmitrötr? Lue jia ne huliwa hna hamëne hnene la Itretre Anyipicine Iehova.
Ame la hnapan, tre, kolo itus hna hape, Nemene La Nyipi Ini Hna Hamën Hnei Tusi Hmitrötr? ej a xatuane la itre atr ka tru jolen, troa hane xome la Tusi Hmitrötr, matre troa sa la itre hnyinge ka nyipi ewekë. Ame la hnaaluene jia ne huliwa, tre, ene la troa isa hetre ketre porogarame ne ini Tusi Hmitrötr. Tro la ketre Atre Anyipicine Iehova ka maca, a tro kowe la hnalapa i epun maine ketre götrane pena me xome la itre hnepe traem matre troa ce ithanatane la itre mekune qa hnine la Tusi Hmitrötr, ngöne la nöjei wiik; nge pëkö thupen. Itre milio lao atr e cailo fen ka hane kepe thangane qa ngöne la porogarame cili. Nyimutre la itre ka qaja la mekune celë, hna hape: “Öhne hë ni la nyipici!”
Pëkö ketre trenga mo ka tru hne së hna troa kapa hune lai. Ame la nyipici ka ej e hnine la Tusi Hmitrötr, tre, ej a nue amaca së qa ngöne la kuci iöni, me iamenu memine fe la xou menu. Nge jëne ej, easa mejiun me madrin, nge hetre aliene la mele së. Öni Iesu, ka hape: “Tro hë nyipunie a ate la nyipici, nge tro ha nue amacai nyipunie hnene la nyipici.”—Ioane 8:32.
You May Also Like
ITA NE THUP
Kola Thele La Nyipici
Ngacama jol troa atre la nyipici, hetre aqane tro sa thele la nyipici göne la itre hnying ka nyipiewekë ne la mel.
PENGÖ HUN
Hnauëne La Troa Inine La Tusi Hmitrötr?
Tusi Hmitrötr a xatuane la itre atr ka nyimutre e cailo fen troa hane sa la itre hnyinge ka tru göi mel. Aja i epuni fe troa hane atre la itre hnyinge cili?
