HNA MELËN
Ihniming Ngöne La Qaan La Ka Xatua Ni Troa Cile Hut
EASË ngöne lo treu Juun macatre 1970, ijine hedredrei e Pennsylvanie. Eni petre hi a 20 lao macatre, nge hna lö sai ni e Pital e Phoenixville, ke hna tithi ni hnene la ketre meci ka ngazo pi hë. Kola traqa lapa hnene la ketre ëfirmie ka nango tru ju hi hui eni. Angeic a traqa ne xome la tasiong, alu ngöne la hawa. Ngo öhne hi ni ka hape, angeic a seseu. Hnene laka kolo pala hi a uti la tasiong, matre öninge koi angeic ka hape: “Ase hë eö a hane öhne la ketre atr ka tro ha mec?” Saze pi hi la ialameke i angeic, ke angeic a mekune ka hape ka tro hë ni a mec. Öni angeice jë hi ka hape: “Ohea, eö petre hi.” Ngo tha meci ju kö ni. Matre, tro ni a pane qejepengöne koi epuni la hnenge hna melën.
PANE EWEKË HNA MELËN NGÖNE LA HNA ISI
Hna tithi ni hnei mec lo eni a ëfirmie lo ijine isi e Vietnam. Tru la madrineng ekö troa nyinyine la itre trene mec, me itre ka eatr. Ame la ajang, tre tro ni a hane droketre ka ixöj. Hnenge hna xötrei traqa e Vietnam lo Julai 1969. Ngo tha hnenge kö hna canga huliwa. Hna pane aijijëne la itre ka xötrei traqa ekö troa pane lapa koi ca wiik, pëkö huliwa matre majemi jë angatre kowe la hedredrei e cili.
Thupene lai, hna upi ni kowe la ketre ekip ne ixöj e Pital ngöne la traon e Dong Tam. Eni hë lai a nyiqaane öhne la isi. Tha qea ju kö e thupen, nge kola ha traqa itrai la itre hélicoptère. Kola traqa fë la itre atr ka eatr. Nge pine laka, atraqatre la ajang troa xatuane la itre atr me sajuëne la nöjeng, pi tro ni a canga xatuane la itre atrene la nöjeng. Hna tro sai itre ka eatr kowe la itre kotener hna alepanyin. Ame ngöne la itre hnahag ne xötre atr, hetrenyi la ca droketre ne ixöj, me ca droketre ka iameköle, me lue ëfirmie. Angatr a isa isine troa amelene la itre atr. Ngo hnenge fe hna öhne laka, tha hna autine kö qa hnine lo itre hélicoptères la itre bëeke ka tru ka wetrewetr. Hna qaja pë hë koi ni e thupene ka hape, itre ej a qatrenge la itre hnepe ngönetrei ne la itre soc hna thea hnei boob. Celë hi lai hnenge hna pane melën ngöne lo ijine isi.
ENI A THELE AKÖTRESIE
Eni a xötrei drenge la maca ka loi lo thöth petre kö ni
Atre hë ni la Itretre Anyipici Iehova lo nekönatr petre kö ni, ke hnei nenë lo hna ini Tusi me angatr, ngo tha hna bapataiso eahlo kö. Tru la madrinenge ekö troa hane sine la ini Tusi eahlo. Ngo ame ngöne la ketre drai, hnenge me föi nenë hna tro qëmekene la ketre Uma Ne Baselaia. Matre öninge jë hi koi nyidrë: “Nemene la?” Sa jë hi nyidrë ka hape: “The easenyi
angatre pi kö!” Haawe eni pë hë a drei nyidrëti jë, ke ka hnime ni nge ka mejiune ni kowe la föi nenë. Qaane ju hi lai, tha hane ju hi ni iöhnyi memine la Itretre Anyipici Iehova.Ngo ame lo eni a bëeke hmaca qaa hna isi e Vietnam, tru hnei ewekë hnenge hna öhn, nge tha patre kö itre eje qa ngöne la heng. Qa ngöne la itre ewekë cili, kösë ceitunge fe hë me atr ka pë hni. E tro pe ni a goeën, kösë pëkö ka atre la itre ewekë ka traqa e Vietnam. Mekune pala kö ni lo itre atr a wesitr me jelëne la itre soc Amerika ka hape, itretre humuthi medreng. Angatr a qaja tun, ke hnei angatr hna e ngöne la ketre rapore ka hape, tru la itre nekönatr hna humuthe ngöne la ijine isi. Itre ewekë lai ka upi ni troa thele Akötresie.
Hnenge hna nyiqaane lö kowe la itre hmi. Tha patre kö theng la ihnimi koi Akötresie, ngo tha madrine kö ni kowe la itre hnenge hna goeëne ngöne la itre hmi cili. Ame hë ngöne la ketre Sabath ne Febuare 1971, eni hi lai a xötrei lö hnine la ketre Uma Ne Baselaia e Delray Beach, Floride.
Ame lo eni a lö hnine la Uma ne Baselaia, kolo ha nyipune la cainöj koi ka ala nyim. Hnenge pë hë hna sine la ini ne la Ita Ne Thup. Maine nyipici laka, thëthëhmine hë ni la tane mekun hna ithanatan, ngo thatreine kö ni thëthëhmine la aqane ujë ne la itre nekönatr. Angatr a isa thele la itre xötr ngöne la Tusi Hmitrötr. Celë hi ka ketri ni hnyawa! Pë ju kö xa hnenge hna kuca, eni pe hi a dreng me goeën. Ame lo eni a mejë troa tro, hnei Jim Gardner, ketre trejin ka 80 lao macatre hna line koi ni la itusi La vérité qui conduit à la vie éternelle, me hape: “Ajane kö eö troa xome lai itus?” Öninge jë: “Öö.” Nyiho pë hë a isapui jë koi hmakanyi ne Draikaco göi troa nyiqaane ini Tus.
Thupene la icasikeu ne lai Sabath, eni pë hë a tro jë a huliwa. Ka huliwa ni ngöne la pital ne Boca Raton, e Floride, nge ame la itre hawa ne huliwa, troa nyiqaane e 11 h e jidr uti hë e 7 h e hmakany. Tha tru kö hnei wezipo la ijine cili, matre hnenge hna e la itus Vérité. Hnene la ketre ëfirmier hna thapa qaatheng la itus, me goeëne la icetrön, me hnyinge maine eni fe hë a hane troa Atre Anyipici Iehova. Hnenge hna thapa hmaca qaathei angeic la itus, me qaja ka hape, maine tha ase asë kö ni e la itus, ngo ase hë ni mekune laka, tro hë ni a ketre Atre Anyipici Iehova. Angeic pë hë a trotriji ni pi, nge ame ju kö lai jidri cili, hnenge hna e asë lai itus.
Jim Gardner, ketre trejin hna iën, nge ka atre Charles T. Russell hnyawa la ka ini ni la Tusi Hmitrötr
Ame hë la kola traqa hnei Jim troa ini Tus me eni, hnenge hna hnyingë nyidrë ka hape: “Matre, nemene la hnei nyiso hna troa inin?” Öni nyidrëti e sa ka hape: “Lo itus hnenge hna hamë eö.” Öninge jë hi: “Ase asë hë ni e!” Öni Jim e qaja amenyikën koi ni ka hape: “Ka loi! Nga tro hë nyiso a ce wange la pane meken.” Ame hë e cili, eni a sesëkötr laka tru la itre ithuemacanyi hnenge hna trian. Hnei nyidrëti hna sipo ni troa goeëne la itre xötre ka nyimutre ngöne la Tusi Hmitrötre i King James. Matre, eni ha hane atre e cili la nyipi Akötresie. Ame ngöne la hmakanyi cili, hnei nyiho hna ce wange la köni mekene la itus Vérité. Thupene lai, e nöjei Draikaco, nyiho a ce wange la köni meken. Madrine catre ni la itre ijine cili. Ketre ewekë ka tru koi ni la troa kapa la ini qaathene la ketre trejin hna iën, nge ka atre Charles T. Russell hnyawa!
Ite Huliwa 20:20) Hnene la ixatua i nyidrë, matre eni a hnine la huliwa ne cainöj. Ame koi eni, ketre manathithi ka tru la huliwa cili. Atraqatre la madrineng laka, ijijinge fe hi troa hane ce huliwa me Akötresie!—1 Korinito 3:9.
Itre wiike thupene hë la hna ini Tus, hna kepe ni troa hane cainöjëne la maca ka loi. Tha ka hmaloi kö koi ni troa cainöj, ngo hnei Jim hna xatua ni troa elë hune la xoung. (AQANE XÖTREI CIA LA IHNIMING KOI IEHOVA
Tro hë ni enehila a qaja la ketre ewekë ka traqa koi ni matre cia jë la hniminge koi Iehova. (Hna Amamane 2:4) Hnene la ihnimi cili koi Iehova hna xatua ni troa xomihnine la itre mekune qa ngöne la isi ka akötrëne la meleng me itre xa jole ju kö.—Isaia 65:17.
Ihniming koi Iehova la ka xatua ni troa xomihnine la itre mekune qa ngöne la isi ka akötrëne la meleng me itre xa jole ju kö
Hna bapataiso ni lo Julai 1971 ngöne la Asabele Ka Tru, “Ëje i Akötresie” e Yankee Stadium
Ame lo 1971, hna upi ni qa ngöne la hnalapa hna nue koi ni troa mele ngön hnene la keme me thineng. Pine nemen? Xele kö la föi nenë matre troa lapane lai uma hnene la ketre Atre Anyipici Iehova! Tha tru kö hnei manienge ngöne la ijine cili. Kola nyithupei eni e nöjei lue wiik hnei pital, nge ijije hi troa itö iheetr thatraqane la huliwa ne cainöj, ke ajange troa anyipici Iehova hnyawa. Hetre mani hnenge hna nango amë acone ngöne baak, ngo eje e Michigan, traone hnenge hna tru ngön. Matre ame ngöne la itre hnepe ijine cili, eni pe hi a mele me meköle ngöne la lotong. Eni a si me icinyi ngöne la itre hnë xomi saas ne itre loto.
Ame la ketre drai ne eni petre kö a mele ngöne la lotong, eni a fenesi qaa hna huliwa e pital, nge eni a tro kowe la Uma Ne Baselaia, itre hawa qëmekene troa icasikeu göi cainöje trootro. Eni a lapa ngöne la pune la Uma Ne Baselaia matre pëkö ka öhnyi ni, ame hna traqa hmaca koi eni la itre mekune hnenge hna melën e Vietnam. Kösë eni a drenge la punepunene la ngönetrei ne atr hna dreuth, me goeëne la madra ne la itre atr, nge eni fe hë a nyiqaane xou. Nge eni a drenge me goeëne la itre thöth a xëwe koi eni me hape: “Tro jë kö ni a mel? Tro jë kö ni a mel?” Atre hi ni ka hape,
angatre hë a troa mec, ngo eni a thele troa akeukawanyi angatr, me qaja ka hape, ‘The ange seseu kö!’ Eni a lapa e cili, nge kola traqa koi ni la nöjei pengöne mekun.E traqa ha koi ni la ketre jol, eni a thele troa mekune hmaca lo iijine kola xötrei cia theng la ihniming koi Iehova
Eni a treije lapa la eni a thithi koi Iehova. (Salamo 56:8) Eni ha mekune catrëne la melehmaca. E cili hi la eni a atrehmekune la esisitriane la mejiune celë! Tro Iehova a amelene hmaca la itre thöthi celë, nge tro hë angatr a hane atre la nyipici göi Nyidrë. Tro la melehmaca a apëne la akötr me hleuhleu ka ej the së. (Ite Huliwa 24:15) Ame hë la eni a trotrohnine lai, kökötre catre jë hi la ihniminge koi Iehova. Ketre drai lai ka sisitria koi eni. Qaane ju hi lai, e traqa ha la ketre jole ngöne la meleng, eni a kuca asë la hnenge hna atreine matre tro hmaca ni a mekune lo ihnimi cili, lo drai ne kola xötrei cia theng.
HNA HNIMI NI HNEI IEHOVA
Tha ka loi kö la itre huliwa hna kuca hnene la itre atr ngöne la ijine isi, nge eni fe hi la ketre. Ngo hna akeukawanyi ni hnene la hnenge hna mekune ajuine la lue xötre ka tru koi eni. Ame la hnapan, tre Hna Amamane 12:10, 11, eje a qaja ka hape, tha tro hmekuje kö a ngaa Diabolo hnene la huliwa ne cainöje së, ngo hnene fe la madra hna anenine hnei Iesu. Ame la hnaaluen, tre Galatia 2:20 ka amekunë ni ka hape, hnei Iesu hna mec thatraqai eni. Tru la olenge kowe la mele hna huujëne hnei Keriso, ke jëne ej, Iehova a sengetrije la itre ngazo hnenge hna kuca. Matre, wië hë la mekuthetheung enehila, nge hetre trenge ajange troa qeje Iehova, Akötresie ka utipin, kowe la itre atr!—Heberu 9:14.
E tro hmaca ni a mekune la hnenge hna melën, mama hnyawa hi koi eni ka hape, hnei Iehova pala hi hna thupë ni. Ame la ketre drai, atre ju hi Jim ka hape, eni a mele ngöne la lotong, ame hnei nyidrëti hna tro sai ni kowe la ketre trejine föe ka loue hnahage ngöne la hnalapa i eahlo. Xecie hnyawa ha koi eni ka hape, Iehova la ka thue umange ka lolo jëne Jim memine lai trejine föe. Lolo catre Iehova! Eje hi laka, Nyidrëti a thupëne la itre hlue i Nyidrë ka mele nyipici.
ENI A ININE TROA CATRE CAINÖJ ME TULUTHE LA ITRE ITHANATA
Ame lo treu Mei 1971, hnenge hna tro Michigan eë. Ngo, qëmekene tro ni a tro qaa Floride, hnenge hna nyialiene la pune la lotong hnene la itre itus ka nyimutre, nge thupene lai eni a nyapën la itre gojenyi gaa nanyi ne tro kolopi. Qëmekene tro ni a tro qaa Georgie, götrane nöje gaa easenyi hi, pëhë aliene la pune lotong, tro asë hi lo la itre itus. Hnenge hna catre cainöjëne la maca ka loi ne la Baselaia ngöne la nöjei götrane hnenge hna tro ngön. Hnenge fe hna cainöje ngöne la itre kalabus, me hamëne la itre tarak kowe la itre atr ngöne la itre hnë mano trootro ngöne la itre gojeny. Eni hmaca a mekune la itre atr hnenge hna ithanata kow, maine jë atre fe hë angatre enehila la nyipici.—1 Korinito 3:6, 7.
Eje hi laka, ame ngöne la eni a xötrei atre la nyipici, tha hnenge kö hna tuluthe la aqane ithanatange kowe la hnepe lapa i eni. Ame itre xa ijin, hnenge hna qaja mekötine la itre ewekë. Tru la hnenge hna hnime la lue trejine me eni, John me Ron. Matre ame la eni a cainöje koi nyidro, eni a uku nyidro troa kapa la itre ini hnenge hna xötrei kapa. Ame hë e thupen, hnenge hna qeje menu koi nyidro hnene la aqane catre la itre ithanatang. Ngo eni pala hi a thith matre tro nyidroti a kapa la nyipici. Qaane ju hi lai, hnei Iehova hna xatua ni troa atreine tuluthe la itre ithanatang la eni a cainöje trootro me hamë ini.—Kolose 4:6.
ITRE ATR HNENGE HNA HNIM
Ame la imelekeunge me Iehova, celë hi hnenge hna amë panëne pala hi ngöne la meleng. Ngo, hetre itre atr hnenge hna hnime catrëne fe, ene la föeng, Susan. Hnenge pala hi hna ajane troa hetre föe ka troa xatua ni troa nyihlue i Iehova pala hi. Susan la ketre föe ka hnimi Iehova catr. Ame la ketre drai ngöne lo ijine nyiho a iatre, hnenge hna wai angeic e Rhode Island ngöne la hnalapa ne la keme me thine i angeic. Angeic a lapa ngöne la iverada, me e la Ita Ne Thup memine la Tusi Hmitrötr. Hna ketri ni hnyawa laka, angeic a thele asë la itre xötr hna fejan ngöne la Ita Ne Thup, uti fe
hë la itre tane mekune tha nyine tro kö a hane inine ngöne la ekalesia. Öhne hnyawa hi ni e cili laka, ka tru koi angeic la aqane imelekeu i angeic me Iehova. Hnei nyiho hna faipoipo lo Diseba 1971. Tru la madrinenge troa föene la atr ka xatua ni. Ngo ame la hnenge hna madrine catrën, tre ene laka, ngacama hnimi ni catre hnei angeic, ngo tru catre hmaca kö la ihnimi angeice koi Iehova.Eni me Susan, föeng, me lue nekö i nyiho, Paul me Jesse
Hnei Iehova hna aijijë nyiho troa hetre lue kuku trahmany, Jesse me Paul. Hnei Iehova hna tro xomi nyidro ngöne la nyidroti a tru trootro. (1 Samuela 3:19) Nyidroti a isa imelekeu hnyawa me Nyidrë, nge celë hi ka thue madrine koi nyiho. Traqa koi 20 lao macatre nge hetre munën ne isa huliwa i Akötresieti nyidro o drai. Nyidroti pala hi a nyihlue i Nyidrë, ke, tha thëthëhmine kö nyidro la kola cia la ihnim lo nyidroti a xötrei atre Nyidrë. Ketre, tru fe la madrinenge kowe la lue föene la lue nekö i nyiho, Stephanie me Racquel hnenge hna xome ceitune me lue sipu neköng. Tru la madrinenge laka, hnene la lue neköng hna faipoipo memine la lue föe ka hnimi Iehova hnene la hni ka pexej, me ka nue la mele i nyidro troa nyihlue i Nyidrë.—Efeso 6:6.
Tru la madrine hun troa ce cainöj ngöne la itre götrane hna tha kuca lapan
Traqa koi 16 lao macatre ne nyihlue i Iehova ni e Rhode Island, nge e cili tru la itre sineeng. Tha thëthëhmine kö ni la itre qatre thup hnenge hna ce huliwa memin. Tru fe la olenge kowe la itretre iwai trootro, itretre xatua ni. Ketre manathith ka tru koi eni troa ce huliwa memine la itre trejine ka tha thëthëhmine kö la pane ihnimi angatre koi Iehova. Ame *—Wange ju la ithuemacany.
lo 1987, hnei nyiho hna fek a tro Caroline du Nord, götrane nöje gaa aja ixatua troa cainöj. Ame e cili, tru mina fe hë la itre sinee i nyiho.Kola xomiujine la icasikeu göi cainöje trootro ngöne la kola iwai tootro
Ame lo treu Ogas 2002, hnenge me Susan hna kapa la ihë ne troa hane lue atrene la Bethela e Patterson. Hnenge hna huliwa ngöne la Biero Thatraqane La Huliwa Ne Cainöj, nge Susan a huliwa ngöne la hnë waasi mano, huliwa hnei nyiidro hna ajane catrën! Ame lo treu Ogas 2005, hetre manathith ka tru hnenge hna kapa, ene la troa ketre atrene la Lapa Ne Xomi Meköt. Ame koi eni, ka tru pala ha la hnëqa ka hnyipixe cili. Ketre, ame la itre huliwa ka fetra qa ngöne lai, me troa tro kowe la itre nöj, tre, celë hi ka nango axouenyi Susan. Ngacama ka xele catre Suzan ma ti avio, ngo nyiho pala hi enehila a ti avio. Tru fe la hna xatua nyiidro hnene la itre föene la itre xa atrene la Lapa Ne Xomi Meköt. Celë hi ka acatrene la aja i nyiidro troa xatua ni, nge ketre tru la ihniminge koi nyiidro pine lai!
Ame ngöne la bierong, nyimu foto ka amekunë ni la elolone la meleng. Nyimutre la itre manathith hnenge hna kapa qa ngöne la hnenge hna catre mekune pala hi la ihniming koi Iehova ngöne la qaan!
Tru catre la madrineng troa ce memine la itre atrene la hnepe lapang
^ par. 30 Maine epuni a aja itre xa ithuemacany göne la aqane nyihlue i Iehova o drai hnei Anthony Morris, wange ju la Ita Ne Thup qene Wiwi ne 15 Maac 2006, götrane 26.