“Këcïgɔ̈ɔ̈r ëbɛ̈n ee kë cï Nhialic tɔ bɔ̈ në Wëike.”—2 Timotheo 3:16, Jam De Nhialic.

Ba adhuknïïm ë thiëcdït thiekiic ke pïïr yök.—Kɛ̈ŋ 2:1-5.

Bï yïn ya nyuɔ̈th të bïï yïn ya pïïr thïn ë köölthok ëbën.—Diɛt 119:105.

Ba nɔŋ ŋɔ̈th ë pïïr bɔ̈ tueŋ.—Romai 15:4.

Ee yic, alëuku buk gam ë wɛ̈t käŋ kadiäk:

• Kä tɔ̈u ë Baibolic ëbën aa mat. Baibol acï të cït ruɔ̈ɔ̈n tiɛm tök ku buɔɔt kadhetem [1,600] nɔ̈k wään gɛ̈t yen ku ee gɛ̈t kɔc kathiërŋuan [40]. Kɔc juëc ë ke yiic aa këc kaŋ rɔ̈m. Ku yen, wël cïk ke gɔ̈t ë Baibolic ëbën aa mat ku ee tök yen yekë jäämic!

• Anɔŋic Anyikööl ë yith. Kɔc ë gɛ̈t ë kä cï röt looi ë pïïric, aa cie kärɛc cï röt luɔ̈i keek ku kɔcken ë mat anyiköölken yiic. Ku kë wääc ke kënë, kɔc ë ke gɛ̈t Baibol aacï käken cïï ke wööc ku kärɛc cï röt luɔ̈i kɔcken gät piny. —2 Lëk de Akööl 36:15, 16; Diɛt 51:1-4.

• Anɔŋic wël bï röt tiɛŋ tëden. Cït man, Baibol ee cï jam ë riäŋ ë paan ë Babilon ke ruɔ̈ɔ̈n buɔɔt karou [200] ŋoot. (Yithaya 13:17-22) Baibol ee cï jam të bïï paan ë Babilon dam thïn ku lueel rinke raan bï yen dɔm aya!—Yithaya 45:1-3

  Wël juëc kɔ̈k ë ke cïï Baibol ke lueel, aa cï röt tiɛŋ tëden ëbën ke cïn dak ë puɔ̈u. Nadɛ̈ cie yen kë lëu bïï ɣok kë ye Baibol lueel gam kan?—2 Petero 1:21.