1-3. (a) O njika ponda yen ebe Mwenge mu londe̱ 147 mu tilabe̱no̱ e? (b) Nje jokwa la Mwenge mu londe̱ 147 di mokwe̱le̱no̱ biso̱ e?

MOTO a londise̱ te̱ m’bē̱ mu bolabe̱ mo̱ bwam to̱so̱ a lee̱le̱ te̱ bede̱mo ba Kriste̱n ba bwam angame̱n sesabe̱. Yete̱na nika ńe mbale̱ o nje e mobweye̱ bato ba benama, ke̱ di be̱n so̱ njo̱m jita o sesa Yehova Loba! Je ná di sesa mo̱ ońola ngiń’ao ni pakapakan, ni me̱ne̱ne̱ o bewekedi bao be betańsedi, to̱so̱ ońola bedangwedi bao ba ndolo o mbasanedi ma mbel’a moto, jabea la diko̱ti la mpo̱m mao ma muna di mabola mboṅ a nika.

² Mutiled’a mwenge mu londe̱ 147 a sesi Yehova. A tute̱le̱ pe̱ bape̱pe̱ o sesa Loba mulemlem.​—Langa Myenge 147:1, 7, 12. *

³ Di si bi nja nu tili mun mwenge, nde yen ebe e me̱ne̱ne̱ biana mulo̱ngedi a ta longe̱ ni ponda Yehova a busise̱no̱ tumba la Israel o mukoma o Babilon, a timbane̱ babo̱ o Yerusalem. (Mye. 147:2) Ye̱ke̱i te̱ timbisabe̱ la tumba la Loba o epol’a jowe̱ di sangi di tute̱le̱ mulo̱nge̱ myenge o sesa Yehova. To̱ na  nika a kiki njo̱m ipe̱pe̱ ya bola nika. Njika mo̱ yi e? Njika njo̱m o be̱nno̱ o kwala ná “Haleluya!” o longe̱ lo̱ngo̱ e?​—Mye. 147:1.

4. Ne̱ni Bonaisrael ba ta o mukoma ba sengino̱ ponda Kiṅe̱ Kores a bolino̱ doi ná ba timbe, na ońola nje e?

⁴ Dutea te̱ ne̱ni Bonaisrael ba ta o mukoma o Babilon ba tano̱ ba senga. Bano̱nge̱ babo̱ mukoma ba ta be̱ ba yo̱ye̱ babo̱ na kwala ná: “Lo̱ngea biso̱ mwenge ma Sion mō̱.” Yerusalem ni ta babo̱ lambo la bwane̱ Yehova muńe̱nge̱ mu peti e ta e mábulabe̱le̱. (Mye. 137:1-3, 6) Bonayuda ba si ta ba be̱ne̱ ńo̱ngi o lo̱ngo̱. Milema mi ta mi ńo̱sea babo̱, e ta e pula babo̱ ja la bwam na lo̱ko̱mea. Nde kaponda eyal’edinge̱ ya Loba, ba sungabe̱ tongwea na Kores, kiṅ’a Persia. A ta a buka Babilon, a kwala ná: “Yehova, . . . anedi mba ná na longeye mo̱ ndabo o Yerusalem . . . To̱ nja ńe ńa tumba lao, Yehova, Loba lao, a be̱ na mo̱, ale.” (2 Myan. 36:23) Nika e kwangwe̱le̱ Bonaisrael ba ta ba ja o Babilon milema.

5. Njika lambo mulo̱ngedi a makino̱ jombwea ngiń’a Yehova ńa bo̱lise̱ e?

⁵ Yehova a s’embe̱ buka te̱ tumba la Israel, embe̱ pe̱ mō̱ ńabu te̱. Ye pe̱ nde nje a mabolano̱ we̱nge̱. Mulo̱ngedi a tili jombwea Loba ná: “A mabo̱lise̱ ba milema mi ńo̱sedi, a makaka bebango babu.” (Mye. 147:3) E, Yehova a mombwea ba bena ba be̱n mitakisan—e be̱ o eyobo to̱ o besengedi. O nin we̱nge̱ Yehova a le̱le̱m o jembe̱ na lo̱ko̱ bebango basu ba mulema. (Mye. 34:19; Yes. 57:15) A mabola biso̱ dibie̱ na ngudi o lembe̱ to̱ njika mitakisan di be̱nno̱.​—Yak. 1:5.

6. Njika tombwane̱ byala ba mulo̱ngedi o Myenge 147:4 beno̱ ná be wanea biso̱ e? (Ombwa duta la bebotedi ba jokwa.)

⁶ Denge̱ mulo̱ngedi a mombwa o mo̱ń, na mo̱ a kwala ná Yehova “a mate̱se̱ muso̱ngi ma ngengeti” na ná “a mapo̱sea ye̱se̱ mina.” (Mye. 147:4) Ońola nje a tukono̱ ekwali o kwalea ońola bewekedi be o mo̱ń e? Dutea te̱ ná: Mulo̱ngedi a wusa je̱ne̱ ngengeti na miso̱ mao m’eyobo, nde a si ta a be̱ne̱ so̱ṅtane̱ la ngengeti ininga ye o mo̱ń. Na ponda, muso̱ngi ma ngengeti jeno̱ ná je̱ne̱ mu to̱ndi o dime̱ne̱ lasam. Bō̱ ba mo̱nge̱le̱ ná mwindi ma ngengeti we̱ni ngo̱nd’asu e maso̱be̱no̱ mu belabe̱ ná mukoko ma ńambe mu be̱n lodun la ngengeti. Nde misipo mi be̱n lodun la lodun la mīndi ma ngengeti! Na mbale̱ di titi ná di so̱nge̱le̱ ngengeti! Nde Muwekedi a mabele̱ po̱ te̱ na dina. Nika e mapula kwala ná Yehova a bi ngengeti te̱. (1 Kor. 15:41) Bewekedi bao ba benama pe̱ be o wase e? Loba lena di bi we̱ni ngengeti te̱ ńeno̱ di bi pe̱ wa tobotobo—di bi ná te̱ite̱i we̱ni weno̱, besengedi bo̱ngo̱ ba mulema, na nje e mapule̱ wa.

7, 8. (a) Nje Yehova a mombwano̱ ke̱ a mapula sunga baboledi bao o mitakisan mabu e? (b) Bola eyembilan ya ne̱ni nded’a Yehova e mongwane̱no̱ bato ba benama ba titi ke̱nke̱nge̱.

⁷ Yehova a si mombwea wa tobotobo buka te̱, nde a be̱n pe̱ ngudi na so̱ṅtane̱ di mapule̱ o jongwane̱ wa o mitakisan mo̱ngo̱. (Langa Myenge 147:5.) We ná wo̱nge̱le̱ ná bete̱medi bo̱ngo̱ be ndutu jita na bodilo pe̱ o bambe̱. Loba a bi myoyo mo̱ngo̱, “a so̱ṅtan ná je nde dibudu.” (Mye. 103:14) Kana di titino̱ ke̱nge̱nge̱ di matimbise̱le̱ milemlem ma mawuse̱. Di yo̱ki jombwe̱ byala di to̱pino̱, ńo̱ng’a bepuledi b’eyobo di bono̱, na eko̱n di ko̱no̱ne̱no̱ bane̱. Yehova  a si be̱n diwuse̱, nde dibie̱ a be̱nno̱ o so̱ṅtane̱ biso̱ di si be̱n dime̱ne̱.​—Yes. 40:28.

⁸ Yen ebe o ta o máje̱ne̱ dia la ngińa la Yehova ke̱ we oteten a mitakisan. (Yes. 41:10, 13) No̱ngo̱ k’eyembilan Kyoko, munańango ńe paonia ńena mulema mu bo̱bino̱ ponda alono̱ bolea wuma ipe̱pe̱. Ne̱ni Yehova a lee̱le̱no̱ ná a maso̱ṅtane̱ mitakisan mao e? O bete̱medi bao ba peńa, Kyoko a ta a dingabe̱le̱ na bato ba maso̱ṅtane̱ besengedi bao ba teten. A so̱ṅtane̱ ná Yehova a ta nde a kwalane̱ mo̱ ná: “Na to̱ndi wa, seto̱ buka te̱ ońolana we paonia, nde ońolana we nde mun’am ńa muto nu boli mba kakane̱. Na mapula ná o bwane̱ longe̱ lo̱ngo̱ muńe̱nge̱ ka Mboṅ a Yehova!” Ne̱ni Ńangum a lee̱le̱no̱ wa ná “dibie̱ lao di si be̱n dime̱ne̱” e?

9, 10. Njika jongwane̱ Yehova a mase̱le̱no̱ wana e? Bola eyembilan.

⁹ Ponda iwo̱ bepuledi bo̱ngo̱ be nde ná be be̱ b’eyobo. K’eyembilan, we ná o taka o mulema ná o si me̱nde̱ be̱ne̱ eyek’a da o da. Nde, Yehova nde a weki mudiyo mu mapule̱ o pume̱le̱ da, nate̱na mo̱me̱ne̱ ońola bana ba bese̱se̱. (Langa Myenge 147:8, 9.) Yete̱na a mabenga dese̱ bese̱se̱, we ná o lakisane̱ ná Yehova a me̱nde̱ pe̱ bola wa nje e mapule̱ wa.​—Mye. 37:25.

¹⁰ Nje ye mweńa jita ye nde ná Yehova a mombwea pe̱ biso̱ o mbad’a mudī, a mabola biso̱ “musango ma Loba mwena mu buki dibie̱ le̱se̱.” (Fil. 4:6, 7) K’eyembilan, di kwaleye te̱ ońola Mutsuo na munj’ao bena be̱n dia la ngińa la Yehova ombusa mpupe ma Yapan ma 2011. Bondedi o muńua ná ba sunge malonge̱ mabu. Nde bo buńa ba bo̱lo̱ne̱ nje ye̱se̱ ba tano̱ ba be̱ne̱. Ba tombise̱ nde bulu o nde̱ki nilonde̱ iba ńa ndabo abu ni buledi oteten a mulo̱lo̱ko̱ munde̱ne̱. Idiba yese̱le̱no̱, ba wasi jongwane̱ la mudī. Nde mpo̱m ma kalati ba so̱ino̱ mu ta nde kalat’a mbu ńa Mboṅ a Yehova ńa 2006. Dibokime̱ne̱ na diso̱ la Mutsuo di ko̱ o tema “Le tsunami le plus meurtrier jamais recensé (mpupe mu bo bato buka me̱se̱).” Y’ekwali e ta nde yombwea soa la mińangadu o Sumatra o mbu ma 2004 lena di ta na ngo̱ ninde̱ne̱ ni si ta ni máje̱ne̱ne̱. Mutsuo na munj’ao ba kom miso̱di ponda ba langino̱ mi myango. Ba sengi mbidimbidi ma we’a ndol’a Yehova nu wanedi babo̱ jongwane̱ la mudī o ponda ni te̱nge̱n. Yehova ombwedi pe̱ babo̱ o mbad’eyobo. Ba kusane̱ bonasango sango. Nde lambo lembe̱ babo̱ buka me̱se̱ le nde ponda mwemba mabu mu kusino̱ pe̱pe̱le̱ la bonasango bebokedi be lomno̱. Mutsuo mo̱ ná: “Na sengi nde biana Yehova a te̱m mō̱ ńasu te̱ o mbasan, nde ombwea pe̱ biso̱. A se̱ lo̱ko̱mea e!” Jongwane̱ la mudī nde Loba a mase̱le̱no̱ wana denge̱ a mombwea mpuli masu m’eyobo.

11. Nje Loba a mengane̱no̱ ba bena ba mapule̱ tombwane̱ ngiń’ao ńa besungedi e?

¹¹ Yehova a le̱le̱m ponda ye̱se̱ o “sue̱le̱ batakedi.” (Mye. 147:6a) Nde ne̱ni k’ao ni le̱le̱m o wana jongwane̱ ńeno̱ ná e wanea biso̱ tombwane̱ e? E mapula ná di be̱ne̱ malatako ma bwam na mo̱. Ná di be̱ne̱ mu mulatako jangame̱n be̱ne̱ “mulema mu sibi” to̱so̱ sibise̱ la ńolo. (Sef. 2:3) Bamulema mu sibi ba menge̱le̱ ná  Loba a po̱ngulane̱ to̱ njika bobe na bo̱le̱ si te̱me̱ la sim ba makusano̱. Yehova a do̱lisane̱ i ńai a bato.

12, 13. (a) Ná di tombwane̱ jongwane̱ la Loba, nje jangame̱nno̱ bola e? (b) Nja Yehova a do̱lisanno̱ e?

¹² O mune̱ mudi, Loba “a masibise̱ babobe nate̱na wase.” (Mye. 147:6b) Ben byala be ngińa! Ná di tombwane̱ ndol’a jemea ńa Yehova na samba malinga mao, jangame̱n o singe̱ nje a singe̱no̱. (Mye. 97:10) K’eyembilan, jangame̱n singe̱ musonje. Nika e mapula kwala ná jangame̱n panda na to̱ njika lambo le ná di die̱le̱ biso̱ o musonje, nika e mombwea pe̱ bedinge̱dinge̱ ba maye̱. (Mye. 119:37; Mat. 5:28) Nika ńe ná e be̱ ewe̱nji ende̱ne̱, nde ná di do̱lisane̱ Yehova yangame̱n ná di po̱nge mi miwe̱n.

¹³ Di lakisane̱ nde Yehova o jana yen ewe̱nji, seto̱ biso̱me̱ne̱. Mo̱, a me̱nde̱ be̱ muńe̱nge̱ yete̱na di keki o sunga biso̱me̱ne̱ na “ngiń’a wo̱si,” nika ńe nde epolo we̱ni bato ba mawasano̱ jongwane̱ e? Ke̱m! Di si lakisane̱ pe̱ to̱ “myende myango ma moto,” di bola biana biso̱ to̱ moto nupe̱pe̱ e ná a wana jongise̱. (Mye. 147:10) O diwengisan, di siseye be̱be̱ na Yehova, jakwane̱ mo̱ jongwane̱ lao. O diwengisan na bato ba mabole̱ malea, a si mawo̱lo̱ le̱ke̱ye̱ mika masu matoi, to̱ di baise̱ nde mo̱ jongwane̱ epu n’epu. “Yehova a to̱ndi ba ba mabwe̱ mo̱ bo̱ngo̱, bena ba pite̱ nded’ao.” (Mye. 147:11) Je ná di lakisane̱ ná ońola nded’ao, a me̱nde̱ tika be̱ na biso̱ na jongwane̱ pe̱ biso̱ o buka bepuledi basu ba bobe.

14. Njika mbaki ńembe̱ mulo̱ngedi e?

¹⁴ Yehova a mabola biso̱ njo̱m ya be̱ mbaki ná a me̱nde̱ jongwane̱ bona bao ke̱ e mapula. Mulo̱ngedi o̱nge̱le̱ timbisabe̱ la Yerusalem peńa na mo̱ a lo̱ngo̱ ná: “Embe̱ bekwesan ba mo̱mbe̱ mo̱ngo̱, a namse̱ye̱ wa bana o mundi mo̱ngo̱. A mabola musango o myoyo mo̱ngo̱.” (Mye. 147:13, 14) A se̱ lo̱ko̱mea mulo̱ngedi a kusino̱ o bia ná Loba a me̱nde̱ jembe̱ mo̱mbe̱ ma mundi o tata ba ba mowe̱ mo̱!

15-17. (a) Ne̱ni ponda iwo̱ di yo̱kino̱ je̱ne̱ mitakisan masu, nde ne̱ni Yehova a mabolane̱no̱ eyal’ao o jongwane̱ biso̱ e? (b) Bola eyembilan ya ne̱ni ‘doi la Loba di mawamse̱no̱ dangwa.’

¹⁵ We ná o be̱ oteten a mitakisan mi mabwese̱ mulema mo̱ngo̱ ndutu. Yehova e ná a bola wa dibie̱ o lembe̱ mo̱. Mulo̱ngedi a kwali ońola Loba lao ná “a maloma eyal’ao wase, doi lao di mawamse̱ dangwa.” Denge̱ a mato̱pea ońola Yehova ka nu nu ‘mabole̱ sino, nu mamyase̱le̱ pud’a mayiba, nu mangwe̱ ais ao o wase,’ mulo̱ngedi a baise̱ ná: “Nja nu mawe̱le̱ mulo̱lo̱ko̱ mao e?” Na mo̱ a bata ná Yehova “a lom te̱ eyal’ao, na mo̱ e ńamwa.” (Mye. 147:15-18) Loba lasu di be̱n ngińa na dibie̱ ba pakapakan, nu nu be̱n ngińa omo̱ń a ais na sino, e ná ongwane̱ wa o buka to̱ njika mikidi me wa oboso.

¹⁶ Yehova a madie̱le̱ nde biso̱ we̱nge̱ n’Eyal’ao, Bibe̱l. “Doi lao di mawamse̱ dangwa” ninka ná a mapomane̱ bola biso̱ bediedi ba mudī o ponda e mapulano̱ biso̱ mo̱. Dutea te̱ ne̱ni o tombwane̱no o langa Bibe̱l, na kalati ya “mūt’a jemea na jangwa,” o jombwa la JW Broadcasting, o pe̱pe̱le̱ jw.org, o kwala na batudu, na be̱ne̱ mundenge ma bonasango. (Mat. 24:45) Mo̱ o se̱n ná Yehova e makwasi o wanea wa bediedi bao e?

¹⁷ Simone e̱n ngiń’a Eyal’a Yehova. A ta a ye̱use̱ mo̱me̱ne̱ nate̱na dime̱ne̱ lena a si tano̱ a dube̱ ná e nde pat’a moto  Loba eno̱ ná a lakisane̱. Nde, niponda mulema mu tano̱ mu ńo̱sea mo̱, a ta titimbe̱ o muka, a baise̱ jongwane̱ la Yehova. A ta pe̱ alane̱ jokwa lao la Bibe̱l la mo̱me̱ne̱ oboso. Mo̱ ná: “Na si bedi be̱ o bete̱me̱di to̱ bō̱ bena na si kusino̱ ngińa na bediedi ba Yehova.” Nika ńongwane̱ mo̱ o be̱ ngińa.

18. Ne̱ni o masengano̱ o bia ná o do̱lisane̱ Loba e, na njika njo̱m pe̱ o be̱nno̱ o kwala ná “Haleluya!” e?

¹⁸ Mulo̱ngedi a ta a bia njik’edube tumba la Loba la kwaṅ di tano̱ di be̱ne̱. Mo̱ nde di ta mu mpo̱m ma tumba mu bolabe̱ “eyal’a” Loba na “myeka mao na bete̱sedi bao.” (Langa Myenge 147:19, 20.) Nin we̱nge̱, di namsabe̱ ná biso̱ mo̱me̱ne̱ mō̱ nde di bambe̱ dina la Loba o wase ńe̱se̱. Bia la Yehova na we̱le̱ la Eyal’ao o ebolo o longe̱ lasu longwane̱ biso̱ o be̱ne̱ mulatako ma tobotobo na mo̱. Kana mutiled’a kalat’a Myenge 147, mo̱ o si be̱n njo̱m jita o kwala ná “Haleluya!” na jembe̱ pe̱ bane̱ o bola nika e?