“Tsitretsitsi li.”—Dɔwɔwɔwo 24:15, Xexe Yeye Gɔmeɖeɖe.

Afa akɔ na wò ne wò ame vevi aɖe ku.—2 Korintotɔwo 1:3, 4.

Ana be màganɔ vɔvɔ̃m na ku wu ale si dze o.—Hebritɔwo 2:15.

Mɔkpɔkpɔ si ŋu kakaɖedzi le asu asiwò be àgava wɔ ɖeka kple wò ame vevi siwo ku la ake.—Yohanes 5:28, 29.

Ɛ̃, míate ŋu aka ɖe edzi, le susu etɔ̃ ya teti ta:

• Mawu gbɔe agbe dzɔ tso. Biblia gblɔ tso Yehowa Mawu ŋu be: “Gbɔwòe agbedzɔƒe le.” (Psalmo 36:9; Dɔwɔwɔwo 17:24, 25) Esi Mawue na agbe nu gbagbewo katã ta la, ŋusẽ le esi be ne ame ku la, ate ŋu ana wòagava nɔ agbe ake.

• Mawu fɔ ame kukuwo ɖe tsitre le blema. Biblia ƒo nu tso ame vovovo enyi siwo ku gake wofɔ wo ɖe tsitre wogava nɔ agbe le anyigba dzi la ŋu; ŋutsuwo, nyɔnuwo, ɖeviwo, kple ame tsitsiwo siaa le wo dome. Wo dometɔ aɖewo ku ɣeyiɣi kpui aɖe megbe koe wofɔ wo ɖe tsitre, gake wo dometɔ ɖeka ya nɔ yɔdo me ŋkeke ene sɔŋ!—Yohanes 11:39-44.

• Mawu di vevie be yeagafɔ ame kukuwo ɖe tsitre ake. Yehowa lé fu ku; eyɔe be futɔ. (1 Korintotɔwo 15:26) Ele edzrom vevie be yeaɖe futɔ sia ɖa; edi be yeato tsitretsitsia dzi aɖu ku dzi. Ame aɖewo le eƒe susu me, siwo wòdi vevie be yeafɔ ɖe tsitre ahakpɔ wo woagava nɔ agbe le anyigba dzi ake.—Hiob 14:14, 15.