1 Kronika 20:1-8
20 Esi ƒe trɔ,* eye fiawo ƒe aʋahoɣi ɖo la, Yoab+ kplɔ aʋakɔ la woyi ɖagblẽ Amonitɔwo ƒe anyigba, eye wòɖe to ɖe Raba,+ ke David ya nɔ Yerusalem.+ Yoab dze Raba dzi hegbãe.+
2 Ke David ɖe Malkam ƒe fiakuku le eta, eye wòkpɔ be eƒe kpekpeme le sika talento ɖeka,* eye kpe xɔasiwo le eŋu; eye woɖɔe na David. Elɔ aboyonu gbogbo aɖewo hã tso dua me.+
3 Ekplɔ dua me tɔwo dzoe, eye wòna wowɔ kpekpakpadɔwo+ eye wòɖo gadɔwɔnu ɖaɖɛ kple fía dɔwo na wo. Alea David wɔ Amonitɔwo ƒe duwo katã. Mlɔeba David kple aʋakɔ blibo la gbugbɔ va Yerusalem.
4 Le esia megbe la, wowɔ aʋa kple Filistitɔwo le Gezer. Ɣemaɣie Husatɔ Sibekai+ wu Sipai,* si tso Refaim+ ƒe dzidzimeviwo dome la, eye wobɔbɔ wo ɖe anyi.
5 Eyome wogawɔ aʋa kple Filistitɔwo; eye Yair vi Elhanan wu Gititɔ Goliat+ nɔvi Lakmi, ame si ƒe akplɔti le abe avɔlɔ̃la ƒe agbabɔ+ ene.
6 Ke aʋa gadzɔ le Gat,+ eye ŋutsu dzɔtsu+ aɖe si to asibidɛ adeade kple afɔbidɛ adeade, eye wo katã le blaeve vɔ ene la nɔ afi ma; eya hã tso Refaim ƒe dzidzimeviwo+ dome.
7 Enɔ alɔme ɖem+ le Israel ŋu. Eya ta Yonatan, David nɔvi Simei+ ƒe vi wui.
8 Ame siawoe tso Refaim ƒe dzidzimeviwo+ dome le Gat;+ eye David kple eƒe aʋawɔlawo wu wo.