2 Ndidem 11;1-21
11 Ekem Athaliah+ eka Ahaziah+ okụt ke eyen imọ akpa. Ntre enye adaha ada osobo kpukpru nditọ edidem.+
2 Edi, Jehosheba+ eyen Edidem Jehoram an̄wan, eyeneka Ahaziah, eyịp Jehoash+ eyen Ahaziah, osio ke otu nditọ edidem oro ẹkeyomde ndiwot, enye ye n̄wan emi edide edep esie, onyụn̄ ada mmọ ekesịn ke esịt esịt ubet n̄kpana, mmọ ẹnyụn̄ ẹdịp+ enye mbak Athaliah edikụt enye, ndien owo iwotke enye.
3 Ndien eyen oro aka iso odu ye enye ke ufọk Jehovah onyụn̄ edịbe ke isua itiokiet, ke adan̄aemi Athaliah akarade idụt oro.+
4 Ndien ke ọyọhọ isua itiaba, Jehoiada+ ọdọn̄ ẹkeda mme etubom mme ikie mbon ukpeme Caria,+ ye mbonitọk+ ẹsọk imọ ke ufọk Jehovah, ndien enye anam ediomi+ ye mmọ, onyụn̄ anam mmọ ẹn̄wọn̄ọ un̄wọn̄ọ+ ke ufọk Jehovah, ekem enye owụt mmọ eyen edidem oro.
5 Ekem enye owụk mmọ ete: “Se mbufo ẹdinamde edi emi: Mbahade kiet ke itie ita ke otu mbufo ẹyedụk ẹdi ke sabbath ẹnyụn̄ ẹtịm ẹkpeme ufọk edidem;+
6 ndien mbahade kiet ke itie ita ẹyedu ke Inuaotop+ Itiat Idakisọn̄, mbahade kiet ke itie ita ẹyenyụn̄ ẹdu ke inuaotop oro odude ke edem mbonitọk; ndien mbufo ẹnyene nditịm n̄kpeme ufọk+ emi ke adiana ke adiana.
7 Ndien otu iba ke otu mbufo ẹnyene ndiwọrọ ofụri ofụri ke sabbath, ndien mmọ ẹnyene nditịm n̄kpeme ufọk Jehovah ke ntak edidem.
8 Ndien mbufo ẹnyene ndikanade edidem n̄kụk, owo kiet kiet ye n̄kpọekọn̄ esie ke ubọk; ndien ẹyewot owo ekededi eke ebede odụk ufọt oro. Mbufo ẹnyụn̄ ẹdu ye edidem ke ini enye ọwọrọde ye ke ini enye odụkde.”
9 Ndien mme etubom mme ikie+ oro ẹnam kpukpru se Jehoiada oku okowụkde mmọ. Ntre mmọ kiet kiet ẹda ikọt mmọ emi ẹdụkde ẹdi ke sabbath,+ ọkọrọ ye mmọ emi ẹwọrọde ke sabbath, ẹdụk ẹtiene Jehoiada oku.
10 Ndien oku emen mme eduat ye mme ekara otuekọn̄ Edidem David emi ẹkedude ke ufọk Jehovah,+ ọnọ mme etubom mme ikie emi.
11 Ndien mbonitọk+ oro ẹsụk ẹdada, owo kiet kiet akama n̄kpọekọn̄ esie ke ubọk, ọtọn̄ọde ke n̄kan̄ nnasia ufọk oro tutu esịm n̄kan̄ ufien ufọk oro, ẹkpere itieuwa+ ẹnyụn̄ ẹkpere ufọk oro, ẹda ẹkpere ẹkanade edidem.
12 Ekem enye osio eyen+ edidem oro edi onyụn̄ ediyara enye anyanya+ onyụn̄ ọkọn̄ọ enye Ntiense;+ ntre mmọ ẹnam enye edidem+ ẹnyụn̄ ẹyet enye aran.+ Ndien mmọ ẹkwak ubọk+ ẹnyụn̄ ẹdọhọ ẹte: “Yak itọn̄ uwem ọsọn̄ edidem!”+
13 Ke ini Athaliah okopde uyom mbon emi ẹfen̄ede, enye ọsọsọp edi ebịne mmọ ke ufọk Jehovah.+
14 Ndien enye okụt, ndien sese edidem adade do ekpere adaha+ nte ido esidide, onyụn̄ okụt mme etubom ye mme efri obukpon̄+ nte ẹdade ẹkpere edidem, ndien kpukpru mbio obio ke ẹdat esịt+ ke ẹnyụn̄ ẹfri obukpon̄. Inikiet inikiet Athaliah+ awak ọfọn̄idem esie onyụn̄ ofiori ete: “Odu! Odu!”+
15 Edi Jehoiada owụk mme etubom mme ikie, kpa mbon oro ẹmekde ke udịmekọn̄,+ onyụn̄ ọdọhọ mmọ ete: “Ẹmụm enye ẹsio ke udịm, ndien owo ekededi eke editienede enye, yak ẹwot owo oro ke akan̄kan̄!”+ Koro oku ọkọdọhọde ete: “Owo okûwot enye ke ufọk Jehovah.”
16 Ntre mmọ ẹmụm enye ẹdaha ẹdisịm usụn̄ emi mme enan̄-mbakara ẹsisan̄ade ẹdụk+ ufọk edidem,+ ẹnyụn̄ ẹwot enye do.+
17 Ekem Jehoiada anam ediomi+ ke ufọt Jehovah+ ye edidem+ ye mbio obio, nte ke mmọ ẹyedi ikọt Jehovah; onyụn̄ anam ediomi ke ufọt edidem ye mbio obio.+
18 Ke oro ama ekebe, kpukpru mbio obio ẹdi ufọk Baal ẹdiwụri mme itieuwa+ esie; ndien mmọ ẹbom mme mbiet esie ofụri ofụri,+ ẹnyụn̄ ẹwot Mattan+ oku Baal ke iso mme itieuwa oro.+
Ndien oku enịm mme esenyịn ke ufọk Jehovah.+
19 N̄ko, enye ada mme etubom mme ikie ye owo ukpeme obio Caria+ ye mbonitọk+ ye kpukpru mbio obio, man mmọ ẹkpeda edidem ke ufọk Jehovah ẹsụhọde; ndien mmọ ẹsan̄a ẹdisịm inuaotop+ mbonitọk ufọk edidem; ndien enye osụhọde etie ke ebekpo+ ndidem.
20 Ndien kpukpru mbio obio ẹka iso ẹdara;+ obio onyụn̄ ana sụn̄, mmọ ẹma ẹnyụn̄ ẹwot Athaliah ke akan̄kan̄ ke ufọk edidem.+
21 Jehoash+ ekedi isua itiaba ke ini enye ọtọn̄ọde ndikara.+
