2 Ndidem 14;1-29
14 Ke ọyọhọ isua iba emi Jehoash+ eyen Jehoahaz edidem Israel akarade, Amaziah+ eyen Jehoash edidem Judah akabade edi edidem.
2 Enye ekedi isua edịp ye ition ke ini ọtọn̄ọde ndikara, onyụn̄ akara ke Jerusalem ke isua edịp ye usụkkiet. Eka esie ekekere Jehoaddin+ okonyụn̄ oto Jerusalem.
3 Ndien enye aka iso anam se inende ke enyịn Jehovah,+ n̄kukụre edi nte ke enye ikanamke nte David ete ete esie.+ Enye onyụn̄ anam kpukpru se ete esie Jehoash akanamde.+
4 N̄kukụre edi nte ke mme edikon̄ ebiet ẹkesụk ẹdodu.+ Mme owo ke ẹkesụk ẹwa uwa ẹnyụn̄ ẹnam nsụn̄ikan̄ uwa ọwọrọ ọdọk ke mme edikon̄ ebiet.+
5 Edikem ke ndondo oro obio ubọn̄ ọsọn̄ọde esịne enye ke ubọk, enye ọtọn̄ọ ndiwot+ mme asan̄autom esie emi ẹkewotde ete esie edidem.+
6 Edi enye ikowotke nditọ mme owotowo emi, man ekekem ye se ẹwetde ke n̄wed ibet Moses oro Jehovah okowụkde ete:+ “Ẹkûwot mme ete ke ntak nditọ, ẹkûnyụn̄ ẹwot nditọ ke ntak mme ete; edi ẹwot owo kiet kiet ke ntak idiọkn̄kpọ esie.”+
7 Ndien enye owot mbon Edom+ ke Itịghede Inụn̄,+ irenowo tọsịn duop, onyụn̄ ada ekọn̄ ọbọ Sela enyene, ndien osio obio emi enyịn̄ Joktheel tutu esịm mfịn emi.
8 Ekem Amaziah ọdọn̄ mme isụn̄utom ọnọ Jehoash eyen Jehoahaz eyen Jehu edidem Israel, ete: “Di, nnyịn isobo iso ye iso.”+
9 Ntem Jehoash edidem Israel ọdọn̄ ẹkedọhọ Amaziah edidem Judah, ẹte: “Mbiet n̄kukịm emi odude ke Lebanon ọkọdọn̄ ẹkedọhọ cedar+ emi odude ke Lebanon ete, ‘Men eyen fo an̄wan nọ eyen mi ọdọ.’ Edi unam ikọt emi odude ke ikọt Lebanon edisan̄a ebe edịghi mbiet n̄kukịm oro.+
10 Afo omosobo+ Edom, ndien esịt fo anam fi atan̄ idem.+ Bọ ukpono+ nyụn̄ dụn̄ ke ufọk fo. Ntak, ndien, emi afo ekpetịbede en̄wan+ ke ini odude ke idiọk idaha,+ ndien ọduọ, afo ye Judah?”
11 Edi Amaziah ikopke.+
Ntre Jehoash edidem Israel ọdọk edi, ndien mmọ ẹdisobo iso ye iso,+ enye ye Amaziah edidem Judah, ke Beth-shemesh+ emi enyenede mbon Judah.
12 Ndien Israel ẹkan Judah,+ ntre mmọ kiet kiet ẹfen̄e ẹnyọn̄ọ mme tent mmọ.
13 Ndien Jehoash edidem Israel omụm Amaziah edidem Judah, eyen Jehoash, eyen Ahaziah, ke Beth-shemesh, ekem mmọ ẹdi Jerusalem, ndien enye etịbi ndudu ke ibibene Jerusalem cubit ikie inan̄ ke Inuaotop Ephraim+ tutu esịm Inuaotop Inụk.+
14 Ndien enye atan̄ kpukpru gold ye silver ye kpukpru n̄kpoduoho emi ẹdude ke ufọk Jehovah+ ye ke itie ubon n̄kpọuto ufọk edidem ye mbon oro ẹmụmde ke ukat, ndien ekem afiak ọnyọn̄ Samaria.
15 Amaedi mme n̄kpọ efen emi ẹban̄ade Jehoash, se enye akanamde ye odudu esie ye nte enye akan̄wanade ye Amaziah edidem Judah, nte owo iwetke mmọ isịn ke n̄wed+ n̄kpọntịbe eyo ndidem Israel?
16 Ekem Jehoash osụhọde ana ye mme ete ete esie+ ndien ẹbụk enye ke Samaria+ ye ndidem Israel, ndien Jeroboam+ eyen esie ọtọn̄ọ ndikara ke itie esie.
17 Ndien Amaziah+ eyen Jehoash edidem Judah odu uwem isua efịt ke Jehoash+ eyen Jehoahaz edidem Israel ama akakpa.+
18 Amaedi mme n̄kpọ efen emi ẹban̄ade Amaziah, nte owo iwetke mmọ isịn ke n̄wed+ n̄kpọntịbe eyo ndidem Judah?+
19 Ekem mmọ ẹdụk odu+ ẹban̄a enye ke Jerusalem, ndien enye efehe aka Lachish;+ edi mmọ ẹdọn̄ ẹbịne enye ke Lachish, ẹkewot enye do.+
20 Ntre mmọ ẹda mme enan̄-mbakara ẹmen enye ẹkebụk+ ke Jerusalem ye mme ete ete esie ke Obio David.+
21 Ekem kpukpru mbon Judah ẹmen Azariah,+ ke ini enye edide isua efịtekiet,+ ẹnịm ke edidem ke itie Amaziah+ ete esie.
22 Enye akafiak ọbọp Elath+ onyụn̄ afiak ayak enye ọnọ Judah ke edidem ama okosụhọde ana ye mme ete ete esie.
23 Ke ọyọhọ isua efịtekiet emi Amaziah eyen Jehoash edidem Judah akarade, Jeroboam+ eyen Jehoash edidem Israel akabade edi edidem Samaria ke isua aba ye kiet.
24 Ndien enye aka iso anam se idiọkde ke enyịn Jehovah. Enye ikọwọn̄ọkede ikpọn̄ kpukpru idiọkn̄kpọ Jeroboam eyen Nebat, emi enye ekesịnde Israel ẹnam.+
25 Ndien edi enye akafiak owụk adan̄a Israel ọtọn̄ọde ke ebiet emi ẹtode ẹdụk Hamath+ tutu esịm inyan̄ Arabah,+ man ekekem ye se Jehovah Abasi Israel eketịn̄de ebe ke asan̄autom esie Jonah+ eyen Amittai, kpa prọfet emi okotode Gath-hepher.+
26 Koro Jehovah ama okụt ata ndot ndot ukụt oro ekesịmde Israel.+ Baba usụhọde owo kiet m̀mê ikpîkpu owo ekededi ikodụhe, owo eke an̄wamde Israel ikonyụn̄ idụhe.+
27 Ndien Jehovah ama ọn̄wọn̄ọ ke imọ idisọhike enyịn̄ Israel ifep ke idak ikpaenyọn̄.+ Mmọdo enye akadade ubọk Jeroboam eyen Jehoash anyan̄a+ mmọ.
28 Amaedi mme n̄kpọ efen emi ẹban̄ade Jeroboam ye kpukpru se enye akanamde ye odudu esie, nte enye akan̄wanade ye nte enye akafiakde ayak Damascus+ ye Hamath+ ọnọ Judah ke Israel, nte owo iwetke mmọ isịn ke n̄wed n̄kpọntịbe eyo ndidem Israel?
29 Ekem Jeroboam osụhọde ana ye mme ete ete esie, kpa ndidem Israel, ndien Zechariah+ eyen esie ọtọn̄ọ ndikara ke itie esie.
