2 Ndidem 16;1-20
16 Ke ọyọhọ isua efịteba emi Pekah eyen Remaliah akarade, Ahaz+ eyen Jotham edidem Judah akabade edi edidem.
2 Ahaz ekedi isua edịp ke ini enye ọtọn̄ọde ndikara, enye onyụn̄ akara isua efịtekiet ke Jerusalem; ndien enye inamke se inende ke enyịn Jehovah Abasi esie nte David ete ete+ esie akanamde.
3 Ndien enye asan̄a ke usụn̄ ndidem Israel,+ onyụn̄ ọfọp eyen esie ke ikan̄,*+ nte ekemde ye mme mbubiam+ n̄kpọ mme idụt oro Jehovah ekebịnde osion̄o ke ntak nditọ Israel.
4 Ndien enye awa uwa onyụn̄ anam nsụn̄ikan̄ uwa ọwọrọ ọdọk ke mme edikon̄ ebiet+ ye ke mme n̄kpri obot+ ye ke idak kpukpru eto eke ẹsehede.+
5 Ini oro ke Rezin+ edidem Syria ye Pekah+ eyen Remaliah edidem Israel ẹkedọk ẹdi Jerusalem ndin̄wana ekọn̄ ẹnyụn̄ ẹkan Ahaz ẹkụk, edi mmọ ikekemeke ndin̄wana.+
6 Adan̄aoro ke Rezin edidem Syria akafiak ayak Elath+ ọnọ Edom, ekem osion̄o mme Jew efep ke Elath; ndien mbon Edom ẹdụk Elath ẹkedụn̄ do tutu esịm mfịn emi.
7 Ndien Ahaz ọdọn̄ mme isụn̄utom ọnọ Tiglath-pileser+ edidem Assyria, ete: “Ami ndi asan̄autom fo+ ye eyen fo. Dọk di dinyan̄a+ mi sio ke ubọk edidem Syria ye ke ubọk edidem Israel, emi ẹdahade ẹda ndin̄wana ye ami.”
8 Ndien Ahaz atan̄ silver ye gold emi ẹdude ke ufọk Jehovah ye ke itie ubon n̄kpọuto ufọk edidem,+ ọnọ ẹsọk edidem Assyria nte ubọkedem.+
9 Ndien edidem Assyria okop uyo esie onyụn̄ ọdọk aka Damascus+ akakan enye+ onyụn̄ atan̄ mbon Damascus aka ntan̄mfep ke Kir,+ enye onyụn̄ owot Rezin.+
10 Ekem Edidem Ahaz+ ọwọrọ okosobo ye Tiglath-pileser+ edidem Assyria ke Damascus, enye onyụn̄ okụt itieuwa+ emi odude ke Damascus. Ntre Edidem Ahaz ọnọ mbuwed itieuwa emi ye mbiet kpukpru utomusọ esie ẹsọk Urijah oku.+
11 Ntem Urijah+ oku ọbọp itieuwa.+ Ndien Urijah oku ọbọp enye ekekem ye kpukpru se Edidem Ahaz ọkọnọde ke Damascus ẹdi, onyụn̄ ebet ini eke Edidem Ahaz editode Damascus edi.
12 Ke ini edidem otode Damascus edi, enye edikụt itieuwa oro; ndien edidem asan̄a ekpere itieuwa+ oro onyụn̄ ọfọp uwa do.+
13 Ndien enye aka iso ndifọp+ edifọp uwa+ ye uwa n̄kpasịp+ onyụn̄ ọtọhọ edin̄wọn̄ uwa+ esie onyụn̄ esịme iyịp uwa ebuana esie ke itieuwa emi.
14 Enye onyụn̄ emen itieuwa okpoho+ emi okodude ke iso Jehovah efep ke iso ufọk oro, ke ufọt itieuwa esie ye ufọk Jehovah,+ ekenịm ke n̄kan̄ edere itieuwa esie.
15 Ndien Edidem Ahaz owụk Urijah+ oku ete: “Fọp edifọp uwa usenubọk man osio nsụn̄ikan̄ ke akwa itieuwa emi,+ ọkọrọ ye uwa n̄kpasịp mbubreyo+ ye edifọp uwa edidem+ ye uwa n̄kpasịp esie ye edifọp uwa kpukpru mbio obio ye uwa n̄kpasịp mmọ ye edin̄wọn̄ uwa mmọ; ndien sịme iyịp kpukpru edifọp uwa ye iyịp kpukpru uwa eken ke itieuwa emi. Amaedi itieuwa okpoho oro, nyekere mban̄a se ndidade enye nnam.”
16 Ndien Urijah+ oku anam kpukpru se Edidem Ahaz okowụkde.+
17 N̄ko-n̄ko, Edidem Ahaz esịbe+ mban̄+ ukpatn̄kpọ+ mbai mbai onyụn̄ odorode mme besịn+ mmọ osion̄o; ndien odorode n̄kpọ udọn̄ mmọn̄+ ke edem nyara enan̄ okpoho+ onyụn̄ odori enye ke mbot itiat.
18 Enye onyụn̄ osio efe sabbath emi mmọ ẹkebọpde ke ufọk oro ye inuaotop edidem ọkpọn̄ ufọk Jehovah ke ntak edidem Assyria.
19 Amaedi mme n̄kpọ efen emi ẹban̄ade Ahaz ye se enye akanamde, nte owo iwetke mmọ isịn ke n̄wed+ n̄kpọntịbe eyo ndidem Judah?
20 Ekem Ahaz osụhọde ana ye mme ete ete esie, ẹnyụn̄ ẹbụk enye ye mme ete ete esie ke Obio David;+ ndien Hezekiah+ eyen esie akara ke itie esie.
Mme Ikọ Idakisọn̄
^ At. Ed., “anam eyen esie ebe ke ikan̄.”
