2 Ndidem 18;1-37
18 Edikem ke ọyọhọ isua ita emi Hoshea+ eyen Elah edidem Israel akarade, Hezekiah+ eyen Ahaz+ edidem Judah akabade edi edidem.
2 Enye ekedi isua edịp ye ition ke ini ọtọn̄ọde ndikara, enye onyụn̄ akara isua edịp ye usụkkiet ke Jerusalem. Eka esie ekekere Abi, okonyụn̄ edi eyen Zechariah.+
3 Ndien enye anam se inende ke enyịn Jehovah,+ nte ekemde ye kpukpru se David ete ete esie akanamde.+
4 Edi enye okosion̄o mme edikon̄ ebiet+ efep onyụn̄ obom mme adaha utuakibuot+ n̄ken̄e n̄ken̄e onyụn̄ esịbe eto utuakibuot+ onyụn̄ anuak urụkikọt okpoho+ oro Moses akanamde+ mbai mbai; koro tutu esịm ini oro nditọ Israel ke ẹkesụk ẹfọp uwa+ ẹnọ enye, ẹkenyụn̄ ẹkot mbiet emi urụkikọt okpoho.+
5 Enye ọkọbuọt idem ye Jehovah Abasi Israel;+ ndien baba owo kiet ikebietke enye ke otu kpukpru ndidem Judah,+ idem kpa ye mbon oro ẹkebemde enye iso ẹdu.+
6 Ndien enye ama ọsọn̄ọ eyịre ye Jehovah.+ Enye iketreke nditiene enye, edi aka iso enịm mme ewụhọ oro Jehovah okowụkde Moses.+
7 Ndien Jehovah odu ye enye.+ Enye onyụn̄ anam n̄kpọ ye eti ibuot+ ke ebiet ekededi eke enye akade; ndien enye ọsọn̄ ibuot ye edidem Assyria inyụn̄ inamke n̄kpọ esie.+
8 Enye ama osobo mbon Philistia+ tutu esịm Gaza+ ye mme obio esie, ọtọn̄ọde ke tọwa+ mbon ukpeme tutu esịm obio ibibene.
9 Edikem ke ọyọhọ isua inan̄ emi Edidem Hezekiah akarade, oro edi, ke ọyọhọ isua itiaba emi Hoshea+ eyen Elah edidem Israel akarade, Shalmaneser+ edidem Assyria ọdọk edi en̄wan ke Samaria onyụn̄ edikan enye okụk.+
10 Ndien mmọ ẹn̄wana ẹkan enye+ ke utịt isua ita; ke ọyọhọ isua itiokiet emi Hezekiah akarade ke mmọ ẹken̄wana ẹkan Samaria, oro edi, ke ọyọhọ isua usụkkiet emi Hoshea edidem Israel akarade.+
11 Ekem edidem Assyria+ ada Israel aka ntan̄mfep+ ke Assyria, okobon mmọ ke Halah+ ye Habor+ ke Akpa Gozan ye ke mme obio mbon Media,+
12 koro mmọ mîkokopke+ uyo Jehovah Abasi mmọ, edi ẹbiatde ediomi+ esie, kpa kpukpru se Moses+ asan̄autom Jehovah okowụkde mmọ.+ Mmọ ikokopke ikonyụn̄ inamke.
13 Ndien ke ọyọhọ isua duopenan̄ emi Edidem Hezekiah akarade, Sennacherib+ edidem Assyria+ ọdọk edi en̄wan ye kpukpru obio ibibene Judah onyụn̄ akan mmọ okụk.
14 Ntre Hezekiah edidem Judah ọdọn̄ ẹkedọhọ edidem Assyria ke Lachish, ẹte: “Mmanam idiọkn̄kpọ. Fiak edem nyụn̄ tre ndibịne mi. Nyanam se ededi emi afo ọdọhọde nnam.”+ Ntre edidem Assyria ọdọhọ Hezekiah ọnọ imọ talent silver+ ikie ita ye talent gold edịp ye duop.
15 Ntre Hezekiah atan̄ kpukpru silver emi ẹdude ke ufọk Jehovah+ ye ke itie ubon n̄kpọuto ufọk edidem ọnọ enye.+
16 Adan̄aoro ke Hezekiah ekesịbe mme usụn̄ temple Jehovah+ ye mme obubọk enyịnusụn̄ oro Hezekiah edidem Judah akadade gold ofụk+ onyụn̄ ada mmọ ọnọ edidem Assyria.
17 Ekem edidem Assyria+ etie ke Lachish+ ọdọn̄ Tartan+ ye Rabsaris ye Rabshakeh+ ete ẹsan̄a ye akwa udịmekọn̄ ẹka ẹkesobo ye Edidem Hezekiah ke Jerusalem, man mmọ ẹdọk ẹkesịm Jerusalem. Ntre mmọ ẹdọk ẹka ẹketuak ẹda ke afan̄ mmọn̄+ ke n̄kan̄ enyọn̄ enyọn̄ n̄kpọdiọhọ mmọn̄,+ emi odude ke ọkpọusụn̄ in̄wan̄ eyetọfọn̄.+
18 Ndien mmọ ẹfiori ẹkot edidem, edi Eliakim+ eyen Hilkiah, emi edide etubom mbonufọk, ye Shebnah+ ewetn̄wed, ye Joah eyen Asaph andiwet n̄kpọ nnịm, ẹwọrọ ẹdisobo ye mmọ.
19 Ntem Rabshakeh+ ọdọhọ mmọ ete: “Mbọk ẹdọhọ Hezekiah ẹte, ‘Ntem ke akwa edidem,+ kpa edidem Assyria ọdọhọ ete: “Nso ibetedem idi emi eke afo ọbuọtde idem ke enye ntem?+
20 Afo ọdọhọ (edi, edi ikọ n̄kpọkinua) ete, ‘Mmenyene item+ ye odudu un̄wana ekọn̄.’ Ndien afo ọbuọt idem ye anie eke esịnde fi ọsọn̄ ibuot+ ye ami?
21 Ke emi, sese! afo ọbuọt idem ke un̄wam ọkpọ nnyanyan̄a emi anuahade,+ kpa Egypt,+ emi edide, edieke owo eberede ke enye, oyodụk enye ekaubọk onyụn̄ ekịm enye. Ntem ke Pharaoh+ edidem Egypt etie ye kpukpru mbon oro ẹbuọtde idem ye enye.
22 Ndien edieke mbufo ẹdọhọde mi ẹte, ‘Nnyịn ibuọt idem+ ye Jehovah+ Abasi nnyịn,’ nte idịghe enye ke Hezekiah+ okowụri mme edikon̄ ebiet+ ye mme itieuwa esie, ke adan̄aemi enye ọdọhọde Judah ye Jerusalem ete, ‘Mbufo ẹtuak ibuot ke iso itieuwa emi ke Jerusalem’?”’+
23 Ke emi, mbọk, mia ata+ ise ye ọbọn̄ mi edidem Assyria, nyụn̄ yak mi nnọ fi enan̄-mbakara tọsịn iba man ise m̀mê afo eyekeme ndidori mme andiwat ke mmọ.+
24 Afo edikeme didie ndien ndinam andikara emi edide kiet ke otu n̄kpri-n̄kan asan̄autom ọbọn̄ mi+ afiak edem ke adan̄aemi afo ọbuọtde idem ke Egypt oyom mme chariot+ ye mme andiwat enan̄-mbakara?+
25 Nte idịghe Jehovah ọnọ mi odudu ndidọk ndi mi man ndisobo obio emi? Jehovah ọkọdọhọ mi ete,+ ‘Dọk kan̄wana ye isọn̄ emi, nyụn̄ sobo enye.’”
26 Ntem Eliakim+ eyen Hilkiah ye Shebnah+ ye Joah+ ẹdọhọ Rabshakeh+ ẹte: “Mbọk, tịn̄ ikọ ye mme asan̄autom fo ke usem Syrian,+ koro nnyịn imokop; kûtịn̄ ke usem mme Jew+ usịn ke utọn̄ mbon oro ẹdude ke ibibene.”
27 Edi Rabshakeh ọdọhọ mmọ ete: “Nte ọbọn̄ mi ọkọdọn̄ mi ndi nditịn̄ ikọ emi nnọ mbufo ye ọbọn̄ mbufo? Nte enye ikọdọn̄ke mi nditịn̄ ikọ emi nnọ mbon emi ẹtiede ke ibibene, man mmọ ẹtiene mbufo ẹdia ifuọ+ mmọ ẹnyụn̄ ẹn̄wọn̄ ikịm mmọ?”+
28 Ndien Rabshakeh osụk ada ofiori ke ọkpọsọn̄ uyo ke usem mme Jew;+ enye onyụn̄ ọdọhọ ete: “Mbufo ẹkop uyo akwa edidem,+ kpa edidem Assyria.
29 Ntem ke edidem ọdọhọ ete, ‘Ẹkûyak Hezekiah abian̄a mbufo, koro enye ikemeke ndinyan̄a mbufo nsio mi ke ubọk.+
30 Ẹkûnyụn̄ ẹyak Hezekiah anam mbufo ẹbuọt idem ye Jehovah,+ ọdọhọde ete: “Jehovah iditreke ndinyan̄a+ nnyịn, owo idinyụn̄ iyakke obio emi isịn edidem Assyria ke ubọk.”+
31 Ẹkûkop se Hezekiah etịn̄de; koro ntem ke edidem Assyria ọdọhọ ete: “Mbufo ẹnam emem ye ami, ẹnyụn̄ ẹwọn̄ọ ẹtiene mi, ndien yak owo kiet kiet adia vine esie, owo kiet kiet onyụn̄ adia fig+ esie, owo kiet kiet onyụn̄ ọn̄wọn̄ mmọn̄ obube udọn̄ mmọn̄ esie,+
32 tutu ndi ndida mbufo n̄ka isọn̄ emi ebietde isọn̄ mbufo,+ kpa isọn̄ wheat* ye obufa wine, isọn̄ uyo+ ye in̄wan̄ vine,+ ye isọn̄ aran olive ye eke aranọkwọk;+ man mbufo ẹdu uwem ẹkûnyụn̄ ẹkpan̄a. Ndien mbufo ẹkûkop se Hezekiah etịn̄de, koro enye atatap mbufo, ete, ‘Jehovah ayanyan̄a nnyịn.’+
33 Nte mme abasi mme idụt ẹma ẹnyan̄a+ idụt mmọ ẹsio ke ubọk edidem Assyria?+
34 Enye mme abasi Hamath+ ye Arpad?+ Enye mme abasi Sepharvaim,+ ye Hena+ ye Ivvah?+ Nte mmọ ẹma ẹnyan̄a Samaria ẹsio mi ke ubọk?+
35 Ewe ke otu kpukpru mme abasi mme idụt ẹkenyan̄a idụt mmọ ẹsio mi ke ubọk,+ eke Jehovah akpanyan̄ade Jerusalem osio mi ke ubọk?”’”+
36 Ndien kpukpru owo ẹdop uyo+ inyụn̄ ibọrọke enye+ baba ikọ kiet, koro edidem okowụkde ete: “Mbufo ẹkûbọrọ enye.”+
37 Edi Eliakim+ eyen Hilkiah, emi edide etubom mbonufọk, ye Shebnah+ ewetn̄wed ye Joah+ eyen Asaph andiwet n̄kpọ nnịm, ẹwak ọfọn̄idem+ mmọ ẹnyụn̄ ẹdi ke ọtọ Hezekiah, ẹditịn̄ ẹnọ enye se Rabshakeh eketịn̄de.
Mme Ikọ Idakisọn̄
^ Mîdịghe, emi ekeme ndidi “barley.”
