2 Ndidem 22;1-20
22 Josiah+ ekedi isua itiaita ke ini enye ọtọn̄ọde ndikara, enye onyụn̄ akara isua edịp ye duopekiet ke Jerusalem. Ndien eka esie ekekere Jedidah eyen Adaiah emi okotode Bozkath.+
2 Ndien enye anam se inende ke enyịn Jehovah+ onyụn̄ asan̄a ke kpukpru usụn̄ David ete ete esie,+ inyụn̄ iwọn̄ọkede ika nnasia m̀mê ufien.+
3 Edikem ke ọyọhọ isua efịteta emi Edidem Josiah akarade, edidem ọdọn̄ Shaphan+ eyen Azaliah eyen Meshullam ewetn̄wed utom ke ufọk Jehovah, ete:
4 “Dọk ka ke ọtọ Hilkiah+ akwa oku,+ ndien yak enye ọbọ kpukpru okụk+ oro ẹdade ẹdi ufọk Jehovah+ emi mme ekpeme-usụn̄+ ẹbọde mme owo;
5 ndien yak mmọ ẹyak enye ẹsịn ke ubọk mbon emi ẹnamde utom,+ kpa mbon emi ẹmekde, ke ufọk Jehovah man mmọ ẹmen enye ẹnọ mme anamutom emi ẹdude ke ufọk Jehovah ẹda ẹdiọn̄ mme ebiet oro ẹsiahade ke ufọk oro,+
6 ẹnọ mme anamutom usọ ye mme ọbọpufọk ye mme ọkọkufọk, ẹnyụn̄ ẹdep mme eto ye mme itiat emi ẹsọide-sọi man ẹda ẹdiọn̄ ufọk oro.+
7 Edi yak owo okûkot mbon emi ẹyakde okụk oro ẹsịn mmọ ke ubọk ẹte ẹdinam ibat,+ koro mmọ ẹnamde utom emi ke esịt akpanikọ.”+
8 Ekem Hilkiah+ akwa oku ọdọhọ Shaphan+ ewetn̄wed+ ete: “Mmokụt n̄wed ibet+ ke ufọk Jehovah.” Ntre Hilkiah ayak n̄wed oro ọnọ Shaphan, ndien enye ọtọn̄ọ ndikot.
9 Ndien Shaphan ewetn̄wed odụk edi ke ọtọ edidem edidọhọ enye ete: “Mme asan̄autom fo ẹn̄wan̄a okụk oro ẹkụtde ke ufọk Abasi ẹsio, mmọ ẹnyụn̄ ẹyak enye ẹsịn ke ubọk mme anamutom, kpa mbon oro ẹmekde, ke ufọk Jehovah.”+
10 Ndien Shaphan ewetn̄wed ọdọhọ edidem ete: “Enyene n̄wed+ emi Hilkiah oku ọnọde mi.” Ndien Shaphan ọtọn̄ọ ndikot n̄wed oro ke iso edidem.
11 Edikem ke ndondo oro edidem okopde mme ikọ n̄wed ibet emi, inikiet inikiet enye awak ọfọn̄idem+ esie.
12 Ekem edidem owụk Hilkiah oku ye Ahikam+ eyen Shaphan ye Achbor eyen Micaiah ye Shaphan ewetn̄wed ye Asaiah+ asan̄autom edidem, ete:
13 “Ẹka, ẹkebụp+ uyo Jehovah ẹnọ mi ye mbio obio ye ofụri Judah ẹban̄a ikọ n̄wed emi ẹkụtde mi; koro akwa ifụtesịt Jehovah+ obụberede asak ye nnyịn ke ntak emi mme ete ete nnyịn+ mîkakpan̄ke utọn̄ inọ ikọ n̄wed emi ndinam kpukpru se ẹwetde ẹban̄a nnyịn.”+
14 Ntem Hilkiah oku ye Ahikam ye Achbor ye Shaphan ye Asaiah ẹka ẹbịne Huldah prọfet an̄wan+ kpa n̄wan Shallum eyen Tikvah eyen Harhas, emi ekesede aban̄a ọfọn̄,+ ke adan̄aemi enye odụn̄de ke obufa ikpehe obio Jerusalem; ndien mmọ ẹketịn̄ ikọ ye enye.+
15 Ndien n̄wan emi ọdọhọ mmọ ete: “Ntem ke Jehovah Abasi Israel ọdọhọ ete,+ ‘Ẹdọhọ owo emi ọdọn̄de mbufo utom ọnọ mi, ẹte:
16 “Ntem ke Jehovah ọdọhọ ete, ‘Sese, ami mmọn̄ nda afanikọn̄+ ntiene ebiet emi ye mme andidụn̄ enye,+ kpa kpukpru ikọ+ n̄wed emi edidem Judah okotde;+
17 koro mmọ ẹkpọn̄de mi ẹnyụn̄ ẹkade ẹkenam nsụn̄ikan̄ uwa ọwọrọ ọdọk ọnọ mme abasi+ efen man ẹyat mi esịt ke kpukpru utom ubọk+ mmọ, ndien ifụtesịt mi asak nte ikan̄ ke ebiet emi, idinyụn̄ inịmeke.’”’+
18 Amaedi edidem Judah emi ọdọn̄de mbufo ete ẹdibụp uyo Jehovah, mbufo ẹdọhọ enye ẹte, ‘Ntem ke Jehovah Abasi Israel ọdọhọ ete: “Amaedi ikọ emi afo okopde,+
19 ke ntak emi afo akanamde esịt+ fo emem onyụn̄ osụhọrede idem+ ke ntak Jehovah ke ini okopde se n̄ketịn̄de mban̄a ebiet emi ye mme andidụn̄ enye, nte ke enye ayakabade ana ndon onyụn̄ edi n̄kpọ isụn̄i,+ ndien afo awak+ ọfọn̄idem fo onyụn̄ atua ke iso mi, ami mmokop,” ntem ke Jehovah ọdọhọ.+
20 “Ke ntak oro, sese, ami mmọn̄ nnam+ fi osụhọde ana ye mme ete ete fo, ndien ẹyemen fi ẹsịn ke udi fo ke emem,+ enyịn fo idinyụn̄ ikwe kpukpru afanikọn̄ oro ndidade ntiene ebiet emi.”’” Ndien mmọ ẹda ibọrọ emi ẹsọk edidem.
