Ẹdọhọ ke esida usen 21 mbemiso obufa n̄kpọ emehe owo. Edi ndụn̄ọde oro ẹnamde owụt ke obufa n̄kpọ esimehe ndusụk owo mbemiso esịmde usen 21, edi esinen̄ede ada ini mbemiso emehede mbon en̄wen. Ndi oro anam idem emem fi?

Ọfọn, yak inọ uwụtn̄kpọ ise: Yak idọhọ ke oyom ndisisịn̄ede idem ikata ke urua.

• Akpa urua, afo esịn̄ede idem ikata.

• Ọyọhọ urua iba, afo esịn̄ede ikaba.

• Ọyọhọ urua ita, afo afiak esịn̄ede ikata.

• Ọyọhọ urua inan̄, afo esịn̄ede ini kiet kpọt.

• Ọyọhọ urua ition, afo afiak esịn̄ede ikata, ndien tọn̄ọ do ka iso, edisịn̄ede idem ikata kpukpru urua.

Omokụt do ke ada fi urua ition mbemiso emehe fi ndisisịn̄ede idem ikata ke urua. Ekeme nditie fi nte ke ebịghi akaha, edi ama ememehe fi, edisinenem fi ndinam.

Itien̄wed emi owụt ke ndinam se inende idịghe n̄kpọ usen kiet. Nnyịn ikpenen̄ekede ifịna idem ke ini iduọde, se ikpebehede nnyịn ikan edi ndifiak ndaha nda.

• Edieke mûkemeke ndinam se ekebierede, kûduọk idotenyịn. Fiọk ke idịghe kpukpru ini ke n̄kpọ edisan̄a nte akaduakde.

• Kere ban̄a ini emi ekekemede ndinam se ekebierede. Ke uwụtn̄kpọ, edieke ekebierede ke imọ idisisọpke iduat nditọ imọ, bụp idemfo ete: ‘Ini ewe ke n̄koyom ndiduat nditọ emi, edi mmụm idem n̄kama? Nso ke n̄kanam? Didie ke n̄keme ndifiak nnam se n̄kanamde oro?’ Utọ mbụme emi ayanam etie ekere mme ini emi akanamde ọfọn utu ke nditie mfịna idem mban̄a ini emi mûkanamke ọfọn.

Bible ekeme ndin̄wam fi ke mme n̄kpọ en̄wen n̄ko. Ke uwụtn̄kpọ, ndi akpama ndifiọk se akpanamde ke ini esịt etịmerede fi, se akpanamde man ubon mbufo ẹdu ke emem, ye nte okpokopde ata inemesịt? Nyene nneme ye Mme Ntiense Jehovah, mîdịghe ka ikpehe Intanet nnyịn emi jw.org/efi.