ENYENE iyak kiet emi mbakara ẹkotde clown fish. Enye aka nditie nte asat. Iwakke owo emi okụtde iyak emi etre ndifiak ntuak nda nse. Etie nte ediwak owo ẹsima ndise enye ke ntak nsio nsio uduot idem esie. Uduot emi esinam ndusụk owo ẹti nsio nsio uduot ọfọn̄ emi mme enekunek ẹsidade ẹbana idem. Onyụn̄ ekeme ndidi ebiet emi iyak emi odụn̄de esikpa owo idem. Enye esidụn̄ ye unam-mmọn̄ emi etiede nte mbiet, emi esinyụn̄ otopde iyak ye unam-mmọn̄ eken.

Iyak emi isifeheke ke ini ẹyomde ndisio enye ndise. Mbon emi ẹsinịmde enịm ke mmọn̄ ẹsikụt nte iyak emi asan̄ade akada ekpere mmọ nte n̄kpọ eke ẹdọhọde ke oyom ẹsio imọ ndise. Iyak emi isifeheke owo, isinyụn̄ iwakke ndika n̄kpọ nyom usụn̄ n̄kpọn̄ itie emi enye odụn̄de.

Edi se isinamde iyak emi enen̄ede akpa owo idem edi enye ndidụn̄ ke ebiet emi etiede nte ọmọn̄ ada enye ibuot. Enye odụn̄ ye unam-mmọn̄ emi ekemede nditop enye n̄wot, ndien emi etie nte ndidụn̄ ke aba urụkikọt. Edi iyak emi ye unam-mmọn̄ emi ẹkam ẹdi itai ye aban̄. Nso inam mmọ ẹkeme ndidụn̄ ntem ke emem?

Ukem nte esidide ubọk otụk edem, edem otụk ubọk, ntre ke onyụn̄ edi ye iyak ye unam-mmọn̄ emi. Mmọ mbiba ẹsin̄wam kiet eken sia ẹdude ọtọkiet. Ntaifiọk emi ẹsikpepde n̄kpọ ẹban̄a unam-mmọn̄ ẹdọhọ ke iyak emi ikemeke ndidụn̄ ke ebiet emi unam-mmọn̄ emi mîdụhe. Iyak emi isisọpke ke esịt mmọn̄, ntre edieke unam-mmọn̄ emi mîkpodụhe ikpere enye, unam-mmọn̄ eken ye ikpọ iyak ẹkpeta enye. Edi sia unam-mmọn̄ emi esikpemede enye, iyak emi ekeme ndidu uwem nsịm isua duop.

Iyak emi esisịn nsen ekpere unam-mmọn̄ emi, ndien sia iyak eken ẹsifehede-fehe unam-mmọn̄ emi, mmọ isikemeke ndidi nditan̄ nsen oro mmen. Uman ye ayara iyak emi ẹsikpeme nsen mmọ. Ekem, ẹsikụt mmọ ye nditọ mmọ ẹnịmde enịm ẹkpere unam-mmọn̄ emi.

Nso ke iyak emi esinam ọnọ unam-mmọn̄ emi? Iyak emi esikpeme enye, iyakke mme iyak en̄wen ẹdita enye. Enyene ini emi mme anam-ndụn̄ọde ẹkedian̄arede iyak emi ẹkpọn̄ unam-mmọn̄ emi, edi eyo etisiere, owo ikwe aba unam-mmọn̄ oro. Etie nte iyak efen ekedi edita enye.

Etie nte iyak emi esitiene ọnọ unam-mmọn̄ emi odudu. Enyene mmọn̄ibọk emi iyak emi esision̄ode emi esinamde unam-mmọn̄ emi ọsọp okpon. Ndien nte iyak emi asan̄ade akanade unam-mmọn̄ emi, ntre ke enye esimen eti mmọn̄ ọsọk unam-mmọn̄ emi.

Enyene udọt emi odude mmọ ke ikpọkidem, emi mîyakke unam-mmọn̄ emi otop mmọ. Udọt emi esinam unam-mmọn̄ emi ekere ke iyak emi edi unam-mmọn̄ nte imọ.

Ndụn̄ọde kiet emi ẹkenamde owụt ke edieke iyak emi akade ndidụn̄ ye unam-mmọn̄ emi, ke enye esisan̄a ekpere unam emi, otụk enye ediwak ini man ọdiọn̄ọ utọ udọt emi enye edisiode man unam-mmọn̄ oro idikeme ndinam enye n̄kpọ. Etie nte unam-mmọn̄ emi esitop iyak emi ke nsonso oro, edi mmọ ẹma ẹmemehe, ẹdidụn̄ ntre nte ufan.

Nte iyak emi ye unam-mmọn̄ emi ẹsidụn̄de ekpep nnyịn nte mme owo ẹkpedianade kiet ẹnam utom. Mme owo ẹsito nsio nsio obio ẹdidiana kiet ẹnam n̄kpọ tutu enye enyene ibuot. Ukem nte enyene-ndyọ iyak emi, ọkpọfọn ida ekpri ini ikpep n̄kpọ iban̄a mbon emi inamde utom kiet man idiọn̄ọ nte ikpanamde n̄kpọ ye mmọ. Edieke inamde emi, iyenen̄ede idia ufọn.