Uwemeyo Sunday kiet, ebe ye n̄wan emi ẹkerede Kenneth ye Filomena, ẹnyụn̄ ẹdụn̄de ke Curaçao, ẹma ẹka ndikpep ebe ye n̄wan kiet Bible nte mmọ ẹsinyụn̄ ẹnamde.

Kenneth ọdọhọ ete: “Ke ini ikesịmde ufọk mmọ, ẹma ẹkọbi usụn̄, moto mmọ ikonyụn̄ inaha ke an̄wa. Edi esịt kiet ama ọdọhọ n̄kot n̄wan esie ke fon.”

N̄wan esie ama ọbọrọ onyụn̄ ọdọhọ ke ebe imọ aka utom. Edi ke ndondo oro enye ọkọfiọkde ke Kenneth ye Filomena ẹda ke esịt okụre mmimọ ẹkot, enye ama ọsọsọp ediberede usụn̄ onyụn̄ ọdọhọ mmọ ẹdụk ẹdi.

Mmọ ẹma ẹkụt ke enye akatatua. Ke Kenneth ama ọkọbọn̄ akam man ẹtọn̄ọ ukpepn̄kpọ oro, mma oro ama afiak obom eyet. Ntre, mmọ ẹma ẹbụp enye m̀mê nso itịbe.

Enye ama ọdọhọ mmọ ke ikoyom ndiwot idem uwemeyo oro. Ke ikosụk iwet leta emi idinịmde inọ ebe imọ ke ini Kenneth okotde imọ ke fon. Enye ama ọdọhọ mmọ ke esịt esitetịmede imọ kpukpru ini. Ntre mmọ ẹma ẹda Bible ẹdọn̄ enye esịt, ndien oro ama anam enye okûkere ndiwot idem aba.

Kenneth ọdọhọ ete: “Imọkọm Jehovah ke ndikanam ikeme ndin̄wam n̄wan emi okoyomde ndiwot idem do. * Se inen̄ede itụk nnyịn edi nte Abasi akanamde ikot mma oro ke fon. Ekeme ndidi angel m̀mê edisana spirit Esie akanam nnyịn inam emi.”

Ndi enen ebe ye n̄wan emi ndidọhọ ke Abasi akada angel m̀mê edisana spirit esie anam mmimọ inyan̄a mma oro? Mîdịghe ndi Kenneth okonyụn̄ ada ifiọk ibuot esie okot enye?

Nnyịn ifiọkke. Edi se ifiọkde edi ke Abasi esinam mme angel ẹn̄wam mbon emi ẹyomde ndifiọk n̄kpọ mban̄a enye. Ke uwụtn̄kpọ, Bible ọdọhọ ke Abasi ama anam angel ọdọhọ Philip aka akan̄wam owo Ethiopia emi okoyomde owo emi edinamde Ikọ Abasi an̄wan̄a imọ.​—Utom 8:​26-31.

Nsio nsio ufọkabasi ẹdọhọ ke nti angel ẹdu emi ẹsinamde uduak Abasi ẹnyụn̄ ẹkpemede mme owo. Ediwak owo ẹnịm ke mme angel ẹdu, ke mmọ ẹsinyụn̄ ẹn̄wam mmimọ. Edi mbon emi mînịmke ke angel ẹdu ẹwak n̄ko.

Ndi edi akpanikọ ke mme angel ẹdu? Edieke edide ntre, mmọ ẹketo m̀mọ̀n̄ ẹdidu? Nso ke Bible etịn̄ aban̄a mme angel? Ndi enyene se mmọ ẹkemede ndinam nnọ fi? Yak ise nte Bible ọbọrọde mme mbume emi.