Mme angel ẹdi spirit, kpa nte Abasi edide Spirit. Nnyịn ikemeke ndikụt mmọ sia mmọ “inyeneke obụk ye ọkpọ.” Mme angel ẹdụn̄ ke heaven, ndien mmọ ẹsikụt Abasi iso.​—Luke 24:39; Matthew 18:10; John 4:24.

Mme angel ẹma ẹsikabade ẹtie nte owo man mme owo ẹkeme ndikụt mmọ ke ini mmọ ẹdide isọn̄ ndinam utom emi Abasi ọkọdọn̄de mmọ, ekem ẹfiak ẹkabade spirit ẹnyọn̄ heaven.​—Judges 6:​11-23; 13:​15-20.

Kpa ye oro Bible esitịn̄de aban̄a mme angel nte irenowo, oro iwọrọke ke ndusụk angel ẹdi irenowo ndusụk ẹdi iban. Mmọ isidọhọ ndọ inyụn̄ ibonke nditọ. N̄ko, mmọ ikodụhe kan̄a ke isọn̄ nte nseknditọ m̀mê ikpọ owo mbemiso ẹkade ẹkedi angel ke heaven. Sia edide Jehovah okobot mme angel, Bible okot mmọ “nditọ ata Abasi.”​—Job 1:6; Psalm 148:​2, 5.

Bible etịn̄ aban̄a “usem mme owo ye eke mme angel.” Emi ọwọrọ ke mme angel ẹnyene usem mmọ. Kpa ye oro Abasi ekesidọn̄de mme angel utom ọnọ mme owo, enye inyịmeke nnyịn ikpono mme angel m̀mê ibọn̄ akam inọ mmọ.​—1 Corinth 13:1; Ediyarade 22:​8, 9.

Mme angel ẹwak ẹsịm “tọsịn duop ke itie tọsịn duop ye mme tọsịn ke mme itie tọsịn.” Emi ọwọrọ ke mmọ ẹsịm ediwak miliọn m̀mê ediwak biliọn.​—Ediyarade 5:11; Daniel 7:10.

Mme angel ẹnen̄ede ‘ẹkop odudu’ ẹnyụn̄ ẹfiọk n̄kpọ ẹkan mme owo. Mmọ ẹsọp usọp etieti; idụhe n̄kpọ ndomokiet ke ererimbot emi ekemede ndikpan mmọ ndisịm ebiet emi mmọ ẹkade ke ini emi mmọ ẹyomde.​—Psalm 103:20; Daniel 9:​20-23.

Kpa ye oro mmọ ẹnen̄erede ẹnyene odudu ẹnyụn̄ ẹfiọkde n̄kpọ ẹkan nnyịn, enyene mme n̄kpọ emi mmọ mîkemeke ndinam, onyụn̄ enyene mme n̄kpọ emi mmọ mîfiọkke.​—Matthew 24:36; 1 Peter 1:12.

Angel kiet kiet ẹnyene edu mmọ ẹnyụn̄ ẹnyene ifụre ndimek se mmọ ẹdinamde. Ntre, mmọ n̄ko ẹkeme ndimek ndinam eti m̀mê idiọk. Enyene ndusụk angel emi ẹkekam ẹmekde ndisọn̄ ibuot ye Abasi.​—Jude 6.