UTOM ubọpufọk ikedịghe obufa n̄kpọ inọ Bezalel ye Oholiab. Ke ini mmọ ẹkedide ifịn ke Egypt, mmọ ẹma ẹsinam ata ediwak kọrikọri (bricks). Utom emi ama okpon ufen tutu; etie nte mmọ ikesimaha nditi nte utom oro eketiede. Edi idahaemi ẹnọ mmọ utom emi mînyeneke mbiet. Ẹdọhọ mmọ ẹda usụn̄ ke utom ubọp tent utuakibuot. (Ex. 31:1-11) Edi owo ifan̄ kpọt ẹdikụt ndiye n̄kpọ emi mmọ ẹdibiatde ini inam. Ndi mmọ ẹyesụk ẹma ndida ofụri esịt mmọ nnam n̄kpọ emi ata ediwak owo mîdikwe? Ndi mmọ ẹma ẹyom mme owo ẹkụt se mmimọ inamde? Ndi afo emesiyom mme owo ẹkụt se anamde ọnọ Abasi?

Ndusụk n̄kpọ emi ẹkenamde ẹbon ke tent utuakibuot ẹma ẹye ẹnana ndo. Ke uwụtn̄kpọ, apostle Paul ọdọhọ ke cherub o-gold iba emi ẹkedoride ke enyọn̄ ekebe ediomi ẹma ‘ẹnyene ubọn̄.’ (Heb. 9:5) Kere nte cherub emi ẹdade ata eti gold ẹdom ekeyede!—Ex. 37:7-9.

Ekpedi idahaemi, ẹkpenịm cherub emi Bezalel ye Oholiab ẹkenamde ke nye-n̄kan itie ubon n̄kpọeset, ndien mme owo ẹkpesikpekpe okụk ẹdụk ẹkese. Edi ke ini mmọ, owo ifan̄ kpọt ẹkekụt ndiye n̄kpọ emi mmọ ẹkenamde mi. Cherub o-gold oro ekesidu ke Ata Edisana, ndien akwa oku kpọt ekesidụk do ini kiet ke isua, ke Usen Usio-Isop. (Heb. 9:6, 7) Ntre, ediwak owo ikekwe se Bezalel ye Oholiab ẹkenamde.

Ekpedi afo ekedi Bezalel m̀mê Oholiab, ndi ekpekesịn idem anam utọ akamba utom oro kpa ye oro ọfiọkde ke n̄kpata owo ifan̄ kpọt ẹdikụt se anamde? Ibuot esikpon mme owo etieti mfịn ke ini mme ufan mmọ ẹtorode mmọ ke se mmọ ẹnamde. Ediwak owo ẹsida emi ẹdiọn̄ọ m̀mê se ikanamde ama ọfọn. Edi ikọt Jehovah itiehe ntre. Nnyịn itie nte Bezalel ye Oholiab. M̀mê mbon en̄wen ẹkụt se nnyịn inamde m̀mê ikwe, esịt esinem nnyịn ndinam se Jehovah ọdọn̄de nnyịn sia imọfiọk ke se inamde enem enye.

Ke eyo Jesus, mme adaiso ido ukpono ẹma ẹsima ndibọn̄ akam ke an̄wa man mme owo ẹkụt. Jesus ọkọdọhọ mbet esie ẹkûkpebe mmọ, edi yak  mmọ ẹbọn̄ akam ke ofụri esịt, idịghe man mme owo ẹkụt. Ntak-a? Sia ‘Ete mmọ emi esede ke ndịbe ọyọnọ mmọ utịp.’ (Matt. 6:5, 6) Emi owụt ke se mbon en̄wen ẹkerede ẹban̄a akam nnyịn idịghe akpan n̄kpọ nte se Jehovah ekerede. Edi idịghe ye akam kpọt, imenịm ke nte Jehovah esede se ededi oro inamde inọ enye enen̄ede edi akpan n̄kpọ. Nnyịn isibetke mbon en̄wen ẹtoro nnyịn man idiọn̄ọ m̀mê se inamde ọfọn m̀mê ifọnke.

Ke ini ẹkebọpde tent utuakibuot ẹma, obubịt enyọn̄ ama ọtọn̄ọ ndifụk tent oro, ubọn̄ Jehovah onyụn̄ ọyọhọ do. (Ex. 40:34) Jehovah akada emi owụt ke imọ imama ofụri utom emi ẹkenamde do! Afo ekere ke eketie didie Bezalel ye Oholiab ke idem? Kpa ye oro owo mîkewetke enyịn̄ mmọ ke n̄kpọ ndomokiet emi mmọ ẹkenamde, esịt ama enem mmọ ndifiọk ke Abasi ama ofụri se mmimọ ikanamde. (N̄ke 10:22) Imọfiọk ke ama enem mmọ ndikụt nte ẹdade se mmọ ẹkebọpde ẹnam n̄kpọ Jehovah ke ediwak isua. Ke ini Bezalel ye Oholiab ẹdisetde ẹdi ke obufa ererimbot, esịt eyenem mmọ ndikop ke ẹma ẹnam n̄kpọ Jehovah ke ofụri isua 500 ke tent utuakibuot oro!

Ke esop Jehovah mfịn, nditọete ẹdu emi ẹsiwetde n̄wed nnyịn, ndusụk ẹwet ndiye ndise ẹnọ nnyịn, ndusụk ẹsio ndise, ndusụk ẹkwọ ikwọ, ndusụk ẹkabade n̄wed, edi mmọ ndomokiet iyomke ẹsiak mmimọ enyịn̄. Imekeme ndidọhọ ke mme owo “ikwe” se mmọ ẹnamde. Se isitịbede edi emi ke se ibede esop 110,000 emi odude ke ofụri ererimbot. Anie esikụt ini emi asan̄autom oro esede aban̄a okụk esop ewetde n̄kpọ enịm ke utịt ọfiọn̄? Anie esikụt ini emi ewetn̄wed esop adiande ibatutom an̄wautom man ọnọ n̄kọk itieutom? Owo ifan̄ isikụt ini emi ndusụk nditọete ẹkade ẹkediọn̄ n̄kpọ emi abiarade ke Ufọkmbono Obio Ubọn̄?

Owo ikọnọhọ Bezalel ye Oholiab n̄weditoro ke utọ utom oro mmọ ẹkenamde man mmọ ẹkpeda ẹnam inua. Edi mmọ ẹma ẹnyene se ifọnde ikan oro—Jehovah ama ama se mmọ ẹkenamde. Imenen̄ede inịm ke Jehovah ama okụt se mmọ ẹkenamde. Yak isụhọde idem n̄ko inam n̄kpọ Jehovah nte Bezalel ye Oholiab.