N̄wam Eyen Fo ke Ini Mfụhọ

MMA kiet ama ayat esịt ye anyam n̄wed ke akamba itie unyamn̄wed kiet ete: “N̄wed ẹyọyọhọ ufọkurua fo, edi n̄kwe ndomokiet oro n̄kpadade n̄n̄wam eyen mi!” Owo mmọ akakpa, ntre enye okoyom n̄wed oro edidọn̄de ekpri eyen esie esịt.

An̄wan̄a ntak emi mma emi akayatde esịt. Esidi n̄kpọ mfụhọ didie ntem ekpri eyenọwọn̄ ndifiọk ke owo imọ akpa! Nditọwọn̄ ẹsinam ọfọn ke ini ubon mmọ ẹsede mmọ enyịn, edi n̄kpa ekeme ndinam eyenọwọn̄ ataba owo emi enye ekenen̄erede ama. Edieke edide ete m̀mê eka, didie ke ekeme ndin̄wam eyen fo ke ini okụtde ke owo mbufo ọmọn̄ akpa m̀mê ke ini enye akpade?

Ke ini owo fo akpade, afo emekeme ndidomo ndimụm idem n̄kama, mfụhọ ekeme ndimen fi mmen, omonyụn̄ ekeme ndikpa ekikere. Edi inaha efre ke eyen fo oyom un̄wam fo. N̄wed oro ufọkibọk emi odude ke Minnesota ke U.S.A. ẹkenọde mme owo ọdọhọ ete: “Nditọwọn̄ ẹsikop mme owo ẹnemede nneme ke inọ utọn̄, ndien mmọ isiwakke ndifiọk se ẹtịn̄de ẹban̄a, mîdịghe mmọ ẹsikere ke enyene se itịbede.” Enye aka iso ete: “Ọkpọfọn ẹtịn̄ akpanikọ ẹnọ nditọwọn̄.” Ntre, ọkpọfọn etịn̄ se itịbede ọnọ nditọ fo ke usụn̄ oro edin̄wan̄ade mmọ. Emi imemke utom, sia n̄kpọ esin̄wan̄a nditọwọn̄ nsio nsio.—1 Corinth 13:11.

Nte Ẹkpetịn̄de Se N̄kpa Edide

Ndusụk mme anam-ndụn̄ọde ẹdọhọ ke mme ete ye eka ikpenyeneke ndidọhọ nditọ mmọ ke owo oro akpade “edede,” m̀mê “ke aka isan̄.” Mme utọ ikọ emi ẹkeme ndifịna nditọwọn̄ edieke owo mînamke an̄wan̄a. Edi akpanikọ ke Jesus ama ọdọhọ ke akpan̄kpa edede, ndien emi ikọdiọkke sia enye iketịn̄ke ikọ inọ nditọwọn̄. Akan oro, enye ama etịn̄ se ikọ esie ọkọwọrọde. Jesus ọkọdọhọ mme anditiene enye ete: “Lazarus ufan nnyịn aka ndiduọk odudu.” Okposụkedi mme mbet Jesus ẹkedide ikpọ owo, “mmọ [ẹkekere] ke enye eketịn̄ aban̄a ndide idap nduọk odudu.” Ntre, Jesus ama anam ikọ esie an̄wan̄a ete: “Lazarus ama akpa.”  (John 11:11-14) Edieke okoyomde ẹtịn̄ se n̄kpa edide in̄wan̄-in̄wan̄ ntem ẹnọ ikpọ owo, nso kaban̄a nditọwọn̄?

Mary Ann Emswiler ye James P. Emswiler emi ẹdide mme ewet n̄wed ẹdọhọ ke “eka ekeme ndidomo nditịn̄ se n̄kpa edide nnọ eyen esie ke usụn̄ oro mîdinamke enye ndịk, edi emi ekeme ndinam eyen oro ọtọn̄ọ ndikere se enye mîkekereke, onyụn̄ ekeme ndinam enye ndịk m̀mê afịna enye.” Ke uwụtn̄kpọ, ndidọhọ eyenọwọn̄ ke akpan̄kpa edede ekeme ndinam enye okop ndịk ekere ke ekeme ndidi imọ ididemekede aba edieke idede idap okoneyo. Edieke ẹdọhọde ekpri eyenọwọn̄ ke akpan̄kpa “aka isan̄,” enye ekeme ndikere ke enye imaha imọ.

Ke ini ediwak ete ye eka ẹdomode nditịn̄ se n̄kpa edide nnọ nditọ mmọ, mmọ ẹsikụt ke nditịn̄ ikọ in̄wan̄-in̄wan̄ esisọp an̄wan̄a nditọwọn̄ akan ebetọ ikọ. (1 Corinth 14:9) Mme anam-ndụn̄ọde ẹdọhọ esịn udọn̄ ọnọ eyen fo obụp mbụme onyụn̄ etịn̄ se ifịnade enye. Ndineme nneme kpukpru ini idiyakke eyen ekere se enye mîkpekereke onyụn̄ ekeme ndinam ọfiọk usụn̄ en̄wen oro akpan̄wamde enye.

Ebiet Oro Ẹkemede Ndikụt Eti Ndausụn̄

Ke ini owo mbufo akpade, eyen fo oyoyom ndausụn̄ ye un̄wam, onyụn̄ oyom ọbọrọ mme mbụme imọ. Ewe n̄wed ke ekeme ndida nnam enye ọfiọk se n̄kpa enen̄erede edi? Ediwak owo ẹkụt ke Bible ọnọ ndọn̄esịt ye idotenyịn oro ẹkemede ndiberi edem. Enye etịn̄ nte n̄kpa ọkọtọn̄ọde, idaha mme akpan̄kpa, ye se iditịbede inọ mme akpan̄kpa. In̄wan̄-in̄wan̄ akpanikọ emi nte ke “mme akpa-n̄kpa . . . ifiọkke baba n̄kpọ kiet” ekpenyene ndinam eyen fo ọfiọk ke owo imọ oro akpade ibọhọ ufen. (Ecclesiastes 9:5) Akan oro, ke Bible, Abasi anam nnyịn inyene idotenyịn nte ke iyafiak ikụt mbon ima nnyịn oro ẹkpan̄ade ke Paradise isọn̄.—John 5:28, 29.

Afo emekeme ndida Edisana N̄wed Abasi nnam eyen fo ọfiọk ke N̄wed Abasi ọnọ eti ndausụn̄ ye ndọn̄esịt ke kpukpru idaha oro ẹsinamde owo ofụhọ. Eyen fo oyonyụn̄ okụt ke afo esiberi edem ke Ikọ Abasi.—Mme N̄ke 22:6; 2 Timothy 3:15.

Ẹbọrọ Mme Mbụme Fo

Ke ini odomode ndidọn̄ eyen fo esịt ke ini owo mbufo akpade, emekeme nditie ndusụk ini ufiọkke se akpanamde. Nso ke akpanam edieke emi etịbede? * Ẹyak ineme ndusụk mbụme oro ẹkemede ndibụp.

• Ndi n̄kpenyene ndidedịbe mfụhọ mbak eyen mi edikụt? Edi ndammana n̄kpọ owo ndiyom ndikpeme eyen esie. Edi nte akwan̄a eyen fo ndikụt ke ofofụhọ? Ediwak ete ye eka ẹfiọk ke ọfọn ndifụhọ ke iso nditọ mmimọ, koro emi ayanam mmọ ẹfiọk ke edi ndammana n̄kpọ ndifụhọ. Ndusụk mmọ ẹnam nditọ mmọ ẹfiọk ke Bible etịn̄ nte mme owo ẹkefụhọde ke eferife. Ke uwụtn̄kpọ, Jesus ama atua eyet ke ini Lazarus edima ufan esie akakpade. Jesus ikedịpke nte etiede imọ ke idem.—John 11:35.

• Ndi ekpri eyen mi ekpenyene ndidụk edinam ubụkowo? Edieke eyenọwọn̄ oyomde ndidụk, ọkpọfọn ẹnam enye ọfiọk se enye edikụtde, ọkọrọ ye ntak oro ẹnamde edinam ubụkowo oro. Nte ededi, ke ndusụk idaha, mme ete ye eka ẹkeme ndibiere ke idifọnke nditọ mmimọ ẹdụk edinam ubụkowo m̀mê nditie tutu enye asuana. Nditọwọn̄ oro ẹdụkde edinam ubụkowo oro Mme Ntiense Jehovah ẹnịmde ẹkeme ndibọ ufọn nto  utịn̄ikọ Bible oro ẹnọde. Ke adianade do, ‘ima ima’ usụn̄ oro mme andidụk edinam emi ẹnamde n̄kpọ ekeme ndinen̄ede ntụk nnyụn̄ ndọn̄ kpukpru owo esịt, ọkọrọ ye nditọwọn̄.—Rome 12:10, 15; John 13:34, 35.

• Ndi n̄kpenyene nditịn̄ n̄kpọ mban̄a akpan̄kpa nnọ eyen mi? Ndusụk mme anam-ndụn̄ọde ẹdọhọ ke edieke afo mûtịn̄ke n̄kpọ ndomokiet uban̄a akpan̄kpa, ke eyen fo ekeme ndidue n̄kere ke enyene se afo edịpde imọ aban̄a akpan̄kpa oro, mîdịghe ke odomo ndifre kpukpru se iban̄ade enye. Julia Rathkey emi edide ewet n̄wed ọdọhọ ete: “Edi akpan n̄kpọ ndin̄wam eyen fo okûkop ndịk ke ini enye etide akpan̄kpa.” Nditịn̄ ikọ ifụre ifụre mban̄a akpan̄kpa, nnyụn̄ ntịn̄ mban̄a nti ido esie ẹkeme ndin̄wam ke ini owo ofụhọde. Mme ete ye eka oro ẹdide Mme Ntiense ẹsidọn̄ nditọ mmọ esịt ke ndisian mmọ ke Bible ọdọhọ ke mme akpan̄kpa ẹyeset ẹdidu ke Paradise isọn̄, kpa ebiet emi udọn̄ọ ye n̄kpa mîdidụhe aba.—Ediyarade 21:4.

• Didie ke n̄keme ndin̄wam eyen mi ke ini enye ofụhọde? Eyen fo ekeme ndidọn̄ọ ke ini enye ofụhọde. Enye ekeme ndiyat esịt mîdịghe okop editịmede esịt sia mîfiọkke se akpanamde. Kûyak idem akpa fi edieke esịt obiomde eyen fo, edieke enye mîmaha ndidianade fi ke idem, m̀mê edieke idem enyekde enye ke ini ọnyọn̄de n̄kpọ edi ke idiọk ini m̀mê ọdọn̄ọde. Didie ke afo ekeme ndin̄wam enye? Kûdedei unam enye ekere ke ufiọkke se ifịnade enye. Domo ndifiọk nte etiede enye ke idem nyụn̄ nọ enye ntịn̄enyịn. Kûkere ke se itịbede in̄wan̄ake enye, m̀mê ndida mfụhọ esie ke ekpri n̄kpọ. Dọn̄ enye esịt kpukpru ini, nyụn̄ nam enye obụp mbụme onyụn̄ etịn̄ se ifịnade enye. Afo emekeme ndida “ndọn̄esịt eke otode N̄wed Abasi” nsọn̄ọ idotenyịn oro eyen fo enyenede onyụn̄ ọsọn̄ọ okuo n̄ko.—Rome 15:4.

• Ini ewe ke ikpafiak itọn̄ọ se ikesinamde ke ubon ye mme edinam eken? Ntaifiọk ẹdọhọ aka iso anam mme n̄kpọ oro ẹkesinamde nte ekekeme. Ẹdọhọ ke akpan n̄kpọ kiet oro ekemede ndin̄wam owo ke ini mfụhọ edi ndika iso nnam mme n̄kpọ oro enye ekesinamde. Ediwak ete ye eka emi ẹdide Mme Ntiense Jehovah ẹmekụt ke ndika iso nnam mme n̄kpọ eke spirit, emi esịnede edikpep Bible kpukpru ini nte ubon ye edidụk mme mbono esop Christian ẹkeme ndisọn̄ọ ubon idem onyụn̄ anam mmọ ẹsọn̄ọ ẹda.—Deuteronomy 6:4-9; Mme Hebrew 10:24, 25.

Tutu esịm ini oro Jehovah Abasi edimende udọn̄ọ ye n̄kpa efep, nditọwọn̄ ẹyeka iso ẹtaba owo mmọ ke n̄kpa. (Isaiah 25:8) Nte ededi, edieke ẹdọn̄de nditọwọn̄ esịt ẹnyụn̄ ẹnọde mmọ ibetedem ke ini owo mmọ akpade, emi eyenen̄ede an̄wam mmọ.

[Ikọ Idakisọn̄]

[Se Ewetde ke Ikpọ Abisi ke page 19]

Sịn udọn̄ nọ eyen fo obụp mbụme onyụn̄ etịn̄ se ifịnade enye

[Ndise ke page 20]

Ka iso nam mme n̄kpọ oro ẹkesinamde, esịnede ukpepn̄kpọ Bible ubon