‘Emem Odu ke Isọn̄ ke Otu Mbon Oro Enye Enyịmede’

“Ubọn̄ enyene Abasi ke ata enyọn̄, emem onyụn̄ odu ke isọn̄ ke otu mbon oro enye enyịmede.”—LUKE 2:14.

Ntak emi ndusụk owo ẹsidiade Christmas.

Kpukpru isua, pope ye mme adaiso ido ukpono eken ẹsikwọrọ ẹban̄a emem, ẹnyụn̄ ẹkere ke se angel eketịn̄de eyetịbe ke ini Christmas. Angel ọkọdọhọ ete: “Emem onyụn̄ odu ke isọn̄ ke otu mbon oro enye enyịmede.” Ndusụk owo ẹsikam ẹka isan̄ ke san̄asan̄a ebiet ke ini Christmas.

Ntak emi ọsọn̄de ndinyene emem?

Emem isibịghike ke ini Christmas, ekpedi esikam ododu. Ke uwụtn̄kpọ, ke December 1914, ke adan̄aemi akpa ekọn̄ ererimbot ekenen̄erede ọsọn̄ ubọk ke Europe, mbonekọn̄ Britain ye Germany ẹma ẹwọrọ ke ikọt ekọn̄ ẹditie ọtọkiet ẹdia Christmas. Mmọ ẹma ẹbuana udia, mmịn, ye sika ye kiet eken. Mmọ ẹma ẹkam ẹbre bọl. Edi emem mmọ ikebịghike. Ke leta kiet oro ẹkewetde ke iso ekọn̄, owoekọn̄ Britain kiet ọkọdọhọ ke owoekọn̄ Germany ọkọdọhọ imọ ete: “Nnyịn idu ke emem mfịn, edi n̄kpọn̄ afo ayan̄wana ọnọ idụt mbufo, ami nnyụn̄ n̄n̄wana nnọ idụt nnyịn.”

Mme edumbet Bible ewe ẹkeme ndin̄wam?

“Eyen amana ọnọ nnyịn . . . ẹyenyụn̄ ẹsio enye enyịn̄ . . . Ọbọn̄ Emem. N̄kọri ke ubọn̄ ye emem idinyeneke utịt.” (Isaiah 9:6, 7) Ndi se itien̄wed emi etịn̄de aban̄a Jesus Christ idọn̄ke fi esịt? Jesus ikamanake man anam emem odu ke isọn̄ usen kiet kpọt ke isua. Enye ke akara ke heaven, ndien enye ayanam ata emem odu ke isọn̄ ke nsinsi.

“Ntịn̄ mme n̄kpọ emi . . . man mbufo ẹkpenyene emem ebe ke ami [Jesus]. Mbufo ẹyekụt ukụt ke ererimbot, edi ẹnyene uko! Ami mmakan ererimbot.” (John 16:33) Idem mfịn emi, Jesus an̄wam mme mbet esie ẹdu ke emem ye kiet eken. Edi akpanikọ ke mme mbet Jesus ẹkụt ukụt mfịn. Kpa ye oro, Bible anam mmọ ẹfiọk ntak emi ndutụhọ odude ye nte Jesus edinamde emem odu ke isọn̄ ke nsinsi. Emi anam esịt okûtịmede mmọ.

Sia Mme Ntiense Jehovah ẹnamde se Jesus ekekpepde, mmọ ẹdu ke emem inamke n̄kpọ m̀mê mmọ ẹto ewe idụt, ẹnyene nso uduot ikpọkidem, ẹto ewe orụk, m̀mê ẹsem ewe usem. Oyokụt se itịn̄de emi edieke odụkde mbono esop ye mmọ ke Ufọkmbono Obio Ubọn̄ mmọ. Anaedi afo eyetiene okụt ke emem enye emi ọfọn akan emem ekededi oro esidude ke ini Christmas.

[Se ẹwetde ke ikpọ abisi ke page 8]

Mme Ntiense Jehovah ẹdu ke emem inamke n̄kpọ m̀mê mmọ ẹsem ewe usem ẹnyụn̄ ẹnyene nso uduot ikpọkidem. Oyokụt se itịn̄de emi edieke odụkde mbono esop ye mmọ ke Ufọkmbono Obio Ubọn̄ mmọ