Ndin̄wam Mbon Oro Ẹyomde Un̄wam

“Owo eke enyenede enyịn mfọnido ọyọbọ edidiọn̄, koro enye ọnọde usụhọde owo udia esie.”—MME N̄KE 22:9.

Ntak emi ndusụk owo ẹsidiade Christmas.

Ndusụk owo ẹsiyom ndin̄wam mme ubuene, mbon udọn̄ọ, ye mbon ukụt, nte Jesus ekesinamde. Mmọ ẹsikere ke ini Christmas edi mfọnn̄kan ini ndinam emi, sia ini emi ke mme n̄ka oro ẹsin̄wamde mme owo ẹsinen̄ede ẹsịn idem ẹbọ mme owo enọ.

Ntak emi ọsọn̄de ndin̄wam mbon en̄wen?

Ke ini Christmas, ediwak owo ẹsinen̄ede ẹsịn idem ke ẹdep n̄kpọ, ẹdia uwem, ẹnyụn̄ ẹka ẹkese mme ufan ye iman mmọ. Emi isiyakke mmọ ẹnyene ekese ini, odudu, m̀mê okụk ndin̄wam mme ubuene ye mbon oro ẹyomde un̄wam. Etie nte n̄kukụre se mmọ ẹsikemede ndinam esidi nditịp okụk nnọ mme n̄ka emi ẹsin̄wamde mme owo.

Mme edumbet Bible ewe ẹkeme ndin̄wam?

“Kûtre ndinam eti n̄kpọ nnọ mbon oro ẹyomde un̄wam, ke ini ubọk fo ekemede ndinam.” (Mme N̄ke 3:27) Idịghe ini Christmas kpọt ke n̄kpọ esisọn̄ ye mme ubuene, mbon ọbiọn̄, ye mbon ukụt. Edieke “ubọk fo ekemede” ndin̄wam owo emi afo okụtde ke oyom un̄wam, ndi ọkpọfọn ebet tutu ini Christmas mbemiso an̄wamde enye? Abasi ọyọdiọn̄ fi edieke ọfọnde mme owo mfọn onyụn̄ atuade mmọ mbọm.

“Ke kpukpru akpa usen urua yak owo mbufo kiet kiet ke ufọk esie osio n̄kpọ enịm n̄kan̄ kiet adan̄a nte enye oforode.” (1 Corinth 16:2) Apostle Paul ọkọnọ mme Christian eyo esie, oro ẹkeyomde ndin̄wam mme ubuene, item emi. Ndi emekeme ‘ndisio n̄kpọ nnịm’ m̀mê ndibiere ibatokụk oro edisinọde owo m̀mê n̄ka emi esidade utọ okụk oro ẹn̄wam mme owo? Edieke anamde emi, afo eyekeme ndin̄wam mbon unana nte ukeme fo edide.

“Ẹkûfre ndinam eti n̄kpọ ndinyụn̄ mbuana n̄kpọ ye mbon en̄wen, koro orụk uwa emi enen̄erede enem Abasi esịt.” (Mme Hebrew 13:16) Omokụt ke ẹsiode ‘edibuana n̄kpọ ye mbon en̄wen’ ẹfep, ke ana nnyịn n̄ko ‘inam eti n̄kpọ’ inọ mme owo m̀mê in̄wam mmọ. Ke uwụtn̄kpọ, nti ete ye eka ẹsikpep nditọ mmọ ndinam n̄kpọ nnọ n̄kani owo; ndiwet leta nnọ mbon udọn̄ọ, ndika n̄kese mbon udọn̄ọ, m̀mê ndikot mmọ ke fon man ẹdọn̄ mmọ esịt. Ẹsinyụn̄ ẹkpep mmọ ndikere mban̄a nditọwọn̄ oro ẹdide ubuene m̀mê mbon n̄kpọnnam. Emi esinam nditọwọn̄ ẹkpep ndifọn ido nnyụn̄ ntat ubọk nnọ owo n̄kpọ kpukpru ini.

[Se ẹwetde ke ikpọ abisi ke page 6]

Nti ete ye eka ẹsikpep nditọ mmọ ndin̄wam n̄kani owo, mbon udọn̄ọ, ye nditọ nnama. Emi esinam nditọwọn̄ ẹkpep ndifọn ido nnyụn̄ ntat ubọk nnọ owo n̄kpọ kpukpru ini