Ibuot 34

Nso Iditịbe Edieke Nnyịn Ikpade?

EKEME ndidi afo emetịm ọfiọk nte ke mme owo mfịn ẹsikọri ẹsọn̄, ẹdọn̄ọ, ẹnyụn̄ ẹkpan̄a. Idem ndusụk nditọwọn̄ ẹsikpan̄a. Ndi afo ekpenyene ndikop ndịk mban̄a n̄kpa m̀mê owo ekededi emi akpade?— Nte afo ọmọfiọk se itịbede edieke nnyịn ikpade?—

Ọfọn, idụhe owo ndomokiet emi odude uwem mfịn emi akakpade onyụn̄ esetde man ekpetịn̄ ọnọ nnyịn se isitịbede ke ini owo akpade. Edi utọ owo oro ama odu ke ini Jesus, kpa Akwa Andikpep, okodude ke isọn̄. Nnyịn imekeme ndikpep se isitịbede inọ mbon oro ẹkpan̄ade ebe ke ndikot mban̄a enye. Owo oro ekedi ufan Jesus okonyụn̄ odụn̄ ke Bethany, ekpri obio emi mîyomke usụn̄ ikpọn̄ Jerusalem. Enye ekekere Lazarus, ndien enye ama enyene nditọeka iban iba emi ẹkekerede Martha ye Mary. Yak ise nte Bible etịn̄de aban̄a se iketịbede.

Usen kiet Lazarus ọdọn̄ọ idiọk idiọk. Ke ini oro, Jesus odu ke anyan usụn̄. Ntre Martha ye Mary ẹdọn̄ isụn̄utom eketịn̄ ọnọ Jesus nte ke eyeneka mmimọ, Lazarus, ọdọdọn̄ọ. Mmọ ẹnam emi koro mmọ ẹfiọk ẹte ke Jesus ekeme ndidi ndinam eyeneka mmọ okop nsọn̄idem. Jesus idịghe abiausọbọ, edi Abasi ọnọ enye odudu man enye ekeme ndikọk kpukpru orụk udọn̄ọ.—Matthew 15:30, 31.

Nte ededi, mbemiso Jesus akade okokụt Lazarus, Lazarus enen̄ede ọdọn̄ọ tutu akpa. Edi Jesus ọdọhọ mme mbet esie ete ke Lazarus edede ye nte ke Imọ iyaka man ikedemede enye. Mme mbet ifiọkke se ikọ Jesus ọwọrọde. Ntre Jesus ọdọhọ in̄wan̄-in̄wan̄ ete: “Lazarus ama  akpa.” Nso ke emi owụt aban̄a n̄kpa?— Ih, owụt nte ke n̄kpa etie nte ọkpọsọn̄ idap. Enye edi ata ọkpọsọn̄ idap oro owo mîkam idabake ndap.

Idahaemi Jesus ke edi ndise Martha ye Mary. Ediwak ufan mmọ ẹma ẹdedi ẹdisịm do. Mmọ ẹdi man ẹdidọn̄ iban emi esịt koro eyeneka mmọ akpade. Ke ini Martha okopde ete ke Jesus ke edi, enye ọwọrọ aka ndisobo ye enye. Ibịghike Mary n̄ko ọwọrọ aka ndikụt Jesus. Enye enen̄ede ofụhọ onyụn̄ atua, ndien enye ọduọ Jesus ke ukot. Mme ufan eken oro ẹsan̄ade ye Mary ke ẹtuan̄a n̄ko.

Akwa Andikpep obụp ebiet emi mmọ ẹbụkde Lazarus. Ekem, mme owo ẹda Jesus ẹka abaitiat emi ẹkebụkde Lazarus. Ke ini Jesus okụtde nte kpukpru owo ẹtuan̄ade, enye ọtọn̄ọ nditua n̄ko. Enye ọfiọk ubiak oro editaba owo ima ke n̄kpa akamade.

Itiat ebere ke iso abaitiat oro, ntre Jesus ọdọhọ ete: “Ẹkpat itiat ẹsio.” Ndi mmọ ẹkpenyene ndinam emi?— Martha ikereke ke emi edi eti ekikere. Enye ọdọhọ ete: “Ọbọn̄, ke emi okpo ke etebe, koro enye akakpa esịm usen inan̄.”

Edi Jesus ọdọhọ enye ete: “Nte n̄kọdọhọke fi nte, edieke enịmde ke akpanikọ, oyokụt ubọn̄ Abasi?” Ikọ Jesus ọwọrọ ete ke Martha oyokụt n̄kpọ oro edidade ukpono isọk Abasi. Nso ke Jesus oyom ndinam? Ke ini ẹkpatde itiat oro ẹfep, Jesus ọbọn̄ akam uyo ọwọrọ ọnọ Jehovah. Ekem Jesus ọdọhọ ke ọkpọsọn̄ uyo ete: “Lazarus, wọrọ di.” Nte enye ọwọrọ edi? Nte enye ekeme ndiwọrọ ndi?—

Ọfọn, nte afo emekeme ndidemede owo emi edede idap?— Ih, edieke afo okotde enye ke ọkpọsọn̄ uyo, enye eyedemede. Edi nte afo emekeme ndidemede owo emi akpade?— Baba. Inamke n̄kpọ m̀mê afo okot uyo ọsọn̄ adan̄a didie, owo emi akpade idikopke. Idụhe n̄kpọ ndomokiet emi ami m̀mê afo m̀mê owo efen ekededi ke isọn̄ mfịn ekemede ndinam man edemede akpan̄kpa.

 Edi Jesus edi isio. Abasi ọnọ enye san̄asan̄a odudu. Ntre ke ini Jesus okotde Lazarus, n̄kpọ n̄kpaidem etịbe. Owo emi akakpade ke usen inan̄ ọwọrọ ke abaitiat edi! Ẹnam enye afiak odu uwem! Enye ekeme ndifiak n̄kot ibifịk onyụn̄ asan̄a onyụn̄ etịn̄ ikọ! Ih, Jesus anam Lazarus eset ke n̄kpa.—John 11:1-44.

Kere idahaemi: Nso iketịbe inọ Lazarus ke ini enye akakpade? Ndi ubak idem esie—ukpọn̄ m̀mê spirit—ama ọkpọn̄ ikpọkidem esie okodụn̄ ke ebiet efen? Ndi ukpọn̄ Lazarus ama aka heaven? Ndi enye ama odu uwem ke usen inan̄ do ye Abasi ye ndisana angel?—

Baba, enye ikodụhe. Ti, Jesus ọkọdọhọ ke Lazarus edede. Esitie didie ke ini afo edede idap? Ke ini afo edede ata ọkpọsọn̄ idap, afo usufiọkke se itịbede ye afo, nte emesifiọk?— Ndien ke ini afo edemerede, afo usufiọkke adan̄a anyan ini oro ekedede tutu afo ese n̄kanika.

 Ukem oro ke edi ye mme akpan̄kpa. Mmọ ifiọkke n̄kpọ ndomokiet. Mmọ ikopke ntụk ndomokiet. Ndien mmọ ikemeke ndinam n̄kpọ ndomokiet. Ukem oro ke ekedi ye Lazarus ke ini enye akakpade. N̄kpa etie nte ọkpọsọn̄ idap emi owo mîtịghi n̄kpọ ndomokiet. Bible ọdọhọ ete: “Ama edi mme akpa-n̄kpa, mmọ ifiọkke baba n̄kpọ kiet.”—Ecclesiastes 9:5, 10.

Kere ban̄a emi n̄ko: Edieke Lazarus okpokodude ke heaven ke usen inan̄ oro, ndi enye ikpeketịn̄ke n̄kpọ iban̄a emi?— Ndien edieke enye okpokodude ke heaven, nte Jesus akpakanam enye ọkpọn̄ utịbe utịbe itie oro afiak edi isọn̄?— Ke akpanikọ ikpakanamke!

Edi, ediwak owo ẹdọhọ ke nnyịn imenyene ukpọn̄, ndien mmọ ẹdọhọ ẹte ke ukpọn̄ esika iso odu uwem ke ini ikpọkidem akpade. Mmọ ẹdọhọ ke ukpọn̄ Lazarus ama odu uwem ke ebiet efen. Edi Bible itịn̄ke ntre. Enye ọdọhọ ke Abasi akanam akpa owo oro Adam edi “ukpọn̄ eke odude uwem.” Adam ekedi ukpọn̄. Bible n̄ko ọdọhọ ete ke ini Adam akanamde idiọkn̄kpọ, enye ama akpa. Enye ama akabade edi “ukpọn̄ oro ama akakpa,” ndien enye ama afiak ke ntan emi ẹkedade ẹbot enye. Bible n̄ko ọdọhọ ete ke kpukpru nditọ Adam ẹma ẹda idiọkn̄kpọ ye n̄kpa n̄ko ẹmana.—Genesis 2:7; 3:17-19; Numbers 6:6, NW; Rome 5:12.

 Ndien, nte an̄wan̄ade, nnyịn inyeneke ukpọn̄ emi edide isio ye ikpọkidem nnyịn. Nnyịn owo kiet kiet idi ukpọn̄. Ndien sia mme owo ẹdade idiọkn̄kpọ ẹto akpa owo oro, Adam, Bible ọdọhọ ete: “Ukpọn̄ eke anamde idiọk ayakpa n̄kpa.”—Ezekiel 18:4.

Ndusụk owo ẹsikop ndịk ẹban̄a mme akpan̄kpa. Mmọ isan̄ake ikpere udi koro mmọ ẹkere ẹte ke akpan̄kpa enyene ukpọn̄ emi odude isio ọkpọn̄ ikpọkidem mmọ emi ekemede ndinọ mme odu-uwem unan. Edi nte akpan̄kpa ekeme ndinọ mme odu-uwem unan?— Baba, enye ikemeke.

Ndusụk owo ẹkam ẹnịm ke akpanikọ nte ke mme akpan̄kpa ẹkeme ndifiak ndi nte mme owo eke spirit man ẹdise mme odu-uwem. Ntre mmọ ẹsinịm udia ẹnọ mme akpan̄kpa. Edi mme owo emi ẹnamde oro inen̄ekede inịm se Abasi etịn̄de aban̄a mme akpan̄kpa ke akpanikọ. Edieke nnyịn inịmde se Abasi etịn̄de, nnyịn idikopke ndịk iban̄a mme akpan̄kpa. Ndien edieke nnyịn itịmde iwụt esịtekọm inọ Abasi kaban̄a uwem, nnyịn iyowụt emi ebe ke ndinam mme n̄kpọ oro Abasi enyịmede.

Edi afo emekeme ndikere ete: ‘Nte Abasi ayanam nditọwọn̄ oro ẹkpan̄ade ẹfiak ẹdidu uwem? Nte enye enen̄ede oyom ndinam emi?’ Yak ineme iban̄a oro.

Yak ikot ntọt efen efen ke Bible iban̄a idaha mme akpan̄kpa inyụn̄ ikot ke owo edi ukpọn̄ ke Psalm 115:17; Ps 146:3, 4; ye Jeremiah 2:34.

[Ndise ke page 179]

Nso ke Jesus anam ọnọ Lazarus?

[Ndise ke page 180]

Nso ikedi idaha Lazarus ke ini enye akakpade?

[Ndise ke page 181]

Nsinam ntak ndomokiet mîdụhe ndikop ndịk mban̄a mme akpan̄kpa?