«Nork bere zama eraman beharko baitu»

«Guztiok eman beharko diogu Jainkoari nork bere buruaren kontu» (Erromatarrei 14:12).

1. Zer erantzukizun asumitu zuten hiru hebrearrek?

 BABILONIAN bizi diren hiru hebrear gaztek hil ala biziko erabaki bat hartu behar dute. Ahuspeztuko al dira irudi handi baten aurrean, bertako legeak agintzen duen bezala? Ala irudi hau adoratzeari uko egingo diote, suzko labe batera jaurtiak izanez? Xadrak, Mexak eta Abed-Negok ez zuten inori aholku eskatzeko denborarik izan, ezta hori egiteko beharrik izan ere. Zalantzarik egin gabe, honela erantzun zuten: «Jakin ezazu, errege jauna, ez ditugula zerbitzatuko zure jainkoak, ezta gurtuko ere zuk eraiki duzun urrezko irudia» (Daniel 3:1-18). Hiru hebrearrek euren erabakiaren erantzukizuna asumitu zuten.

2. Pilatoren ordez, berez nortzuk hartu zuten Jesu Kristorekin zer egiteari buruzko erabakia? Errugabe egin al zuen honek erromatar gobernaria?

² Sei mende igaro dira. Gobernari batek akusatu baten kargu guztiak entzun ditu. Kasu osoa entzun ondoren, ziur dago errugabea dela. Jendetzak exekutatua izateko eskatzen du. Hasiera batean, gobernariak ez du hau egin nahi, baina ez duenez bere ardura asumitu nahi, azkenean presioaren aurrean etsi egiten du. Eskuak garbituz, honakoa dio: «Ez naiz gizon honen heriotzaren erantzule!». Orduan, jendeak gizon hau habean exekutatua izatea baimentzen du. Bere erantzukizuna bete eta Jesu Kristorekin zer egin erabaki beharrean, besteek bere ordez erabaki hura hartzea utzi du. Eskuak garbitu baditu ere, Jesu Kristo injustuki kondenatzeagatik errudun izaten jarraitzen du (Mateo 27:11-26; Lukas 23:13-25).

3. Zergatik ez genuke utzi behar besteek gugatik erabakirik hartzen?

³ Erabaki bat hartu behar duzunean, zer egiten duzu zuk? Hiru hebrearrak bezalakoa zara ala besteek zure ordez erabakitzea uzten duzu? Erabakiak hartzea ez da erraza. Izan ere, erabaki onak hartzeko, heldutasuna behar da. Adibidez, gurasoek euren adin txikiko seme-alaben alde erabaki onak hartu behar dituzte. Noski, erabaki bat hartzea ez da erraza egoera konplexua denean eta hainbat gauza kontuan hartu behar direnean. Adindunek eta laguntzaileek gure «zama» batzuk eramaten lagundu ahal badigute ere, beraiek ezin dute gugatik erabakirik hartu, hori ez baita beraien ardura (Galaziarrei 6:1, 2). Horren ordez, «guztiok eman beharko diogu Jainkoari nork bere buruaren kontu» (Erromatarrei 14:12). Izan ere, Bibliak honakoa dio: «Nork bere zama eraman beharko baitu» (Galaziarrei 6:5). Orduan, nola hartu ditzakegu erabaki onak? Lehenik, laguntza behar dugula onartu behar dugu eta, ondoren, erabaki zuhurrak nola hartu ikasi.

Erabaki onak hartzeko ezinbestekoa den baldintza

4. Zer irakaspen garrantzitsu ikasten dugu lehenengo bikotearen desobedientziatik?

⁴ Giza historiaren hasieran, lehen bikoteak ondorio latzak ekarri zituen erabaki bat hartu zuen. Ongiaren eta gaizkiaren ezagutzaren zuhaitzetik jatea erabaki zuten (Hasiera 2:16, 17). Zertan oinarritu zuten euren erabakia? Bibliaren arabera, «Ikusi zuen emakumeak fruitua gozoa zela, arbola ikusgarria eta […] desiragarria. Hartu zuen, beraz, haren fruituetariko bat eta jan egin zuen. Gero, bere senarrari eman eta honek ere jan egin zuen» (Hasiera 3:6). Ebaren erabakia desio berekoietan oinarritu zen eta Adamek gauza bera egin zuen. Ondorioz, bekatua eta heriotza «gizon-emakume guztiengana zabaldu zen» (Erromatarrei 5:12). Adam eta Ebaren desobedientziatik, gizakiak dituen mugekin lotutako irakaspen garrantzitsu bat ikasten dugu: Jainkoaren gida jarraitzen ez dugunean, gizakiok erabaki txarrak hartzeko joera izaten dugu.

5. Zer gida ematen digu Jehobak? Zer egin behar dugu bere gidatik probetxu ateratzeko?

⁵ Zein pozik gauden Jehobak behar dugun gida emateaz! Bibliak honakoa esaten digu: «Zeuen belarriz entzungo duzue atzetik esaten: “Hona hemen bidea, hemendik ibili”. Noiz jo eskuinera, noiz ezkerrera erakutsiko dizue» (Isaias 30:21). Jehobak berak inspiratutako Hitzaren bidez hitz egiten digu. Beraz, Biblia aztertu eta sakonki ezagutu behar dugu. Erabaki onak hartzeko, helduentzat den janari sendoaz elikatu beharko ginateke. Gainera, «erabileraren bidez ona eta txarra bereizteko gaitasuna» entrenatzen dugu (Hebrearrei 5:14, NWT). Nola lortu dezakegu hau? Jainkoaren Hitzetik ikasten duguna praktikan jarriz.

6. Zer egin behar dugu gure kontzientziak ondo funtzionatu dezan?

⁶ Erabaki onak hartzeko, jaiotzatik jasotako kontzientziaren gaitasuna behar dugu. Kontzientziak gure erabakiak epaitu ditzake; «batzuetan salatu […] eta besteetan zuritu» egiten gaitu (Erromatarrei 2:14, 15). Baina gure kontzientziak ondo funtzionatu dezan, beharrezkoa da Jainkoaren Hitzaren gida izatea eta bertan ikasten duguna praktikan jartzea. Ez badugu gure kontzientzia ondo entrenatzen, inguruko ohituretan eta pertsonen ikuspuntuetan oinarritutako erabaki txarrak hartuko ditugu. Zer gertatuko da gure kontzientziari behin eta berriz ez badiogu kasurik egiten eta, azkenean, Jainkoa desobeditzen jarraitzen badugu? Zerbait gaizki egiten dugunean, gure kontzientziak ez gaitu salatuko. «Suz markatua» bezalako azala da: gogortu egiten da eta ez du ezer sentitzen (1 Timoteori 4:2, oharra). Bestalde, Jainkoaren Hitzak hezitako kontzientzia gida fidagarria da.

7. Zer da ezinbestekoa egitea erabaki onak hartzeko?

⁷ Erabaki onak hartzeko, ezinbestekoa da Biblia ondo ezagutzea eta bertan ikasten duguna praktikan nola jarri jakitea. Erabakiak azkarregi hartu beharrean, lehenik, pentsatzeko denbora hartu eta Biblia printzipioen gida bilatu behar dugu. Bestalde, Xadrak, Mexak eta Abed-Negok bezala, erabaki on bat azkar hartu behar dugunean, hau egiteko gai izango gara Biblia ondo ezagutzen badugu eta gure kontzientzia ondo entrenatuta badugu. Ikus ditzagun honen adibide batzuk.

Nortzuk dira gure lagunak?

8, 9. a) Zer Biblia printzipiok erakusten dute lagun txarrak saihestu behar ditugula? b) Printzipiorik gabeko pertsonak bakarrik al dira lagun txarrak? Azaldu.

⁸ Paulo apostoluak honakoa idatzi zuen: «Ez zaitzatela inork engaina! Lagun txarrek ohitura onak usteldu egiten dituzte» (1 Korintoarrei 15:33). Jesu Kristok ere hurrengoa esan zien bere jarraitzaileei: «Mundukoak ez zaretelako» (Joan 15:19). Printzipio hauetatik, honakoa argi ikusten dugu: ez dugula fornikatzaile, adulteriogile, lapur eta mozkorrak bezalako pertsonen lagun izan behar (1 Korintoarrei 6:9, 10). Honez gain, Biblian gehiago sakontzen goazen heinean, honakoaz ere konturatzen gara: aurretik aipatutako pertsona hauek pelikuletan, telebistan, interneten edo liburuetan agertzen direnez, entretenimendu mota hau aukeratzea pertsona mota hauekin denbora pasatzea bezala izango litzatekeela. Gauza bera esan daiteke «itxuratiekin», hau da, nortzuk diren ezkutatzen dutenekin, interneten txateatzeari buruz (26. Salmoa 4).

⁹ Bestalde, egokia izango al litzateke agian moralki garbiak diren, baina Jehobarengan federik ez duten pertsonekin harreman estua izatea? Bibliak «mundu osoa Gaiztoaren esku dagoela» dio (1 Joan 5:19). Aipu honek hurrengoa ulertzen laguntzen digu: pertsona moralgabeak ez direnak ere lagun txarrak izan daitezke. Beraz, zuhur jokatuko dugu Jehoba maite dutenekin bakarrik harreman estua izaten badugu.

10. Zerk lagunduko digu Lekukoak ez direnekin kontaktua izateari buruzko erabaki on bat hartzen?

¹⁰ Jehoba adoratzen ez dutenekin kontaktua guztiz saihestea ez da posible, ezta beharrezkoa ere (Joan 17:15). Predikatzera, eskolara edo lanera joaten garenean beraiekin gaude. Gainera, Lekuko ez den norbaitekin ezkonduta dagoenak agian Jehoba adoratzen ez duten pertsonekin kontaktu gehiago izan beharko du. Gure bereizteko gaitasuna erabiltzen badugu, honakoa ulertuko dugu: Jehoba zerbitzatzen ez dutenekin harreman mugatua izatea eta beraiekin harreman estua izatea oso desberdina dela (Santiago 4:4). Honek eskolatik edo lanetik kanpo gelakideekin edo lankideekin denbora pasako dugun erabakitzen lagunduko digu.

Lana aukeratzerako orduan

11. Zer da kontuan hartu behar dugun lehenengo gauza lana aukeratzerako orduan?

¹¹ Etxekoez arduratzeko eginkizuna betetzerako orduan, Bibliak erabaki onak hartzen ere laguntzen digu (1 Timoteori 5:8). Kontuan izan behar dugun lehenengo gauza, egingo dugun lan mota da. Gaizki dago Bibliak zuzenean kondenatutako gauzak bultzatzen dituen lan mota bat aukeratzea. Beraz, egiazko kristauok ez dugu idolatriarekin, lapurretarekin, odola gaizki erabiltzearekin edo Bibliak onartzen ez dituen beste ekintzekin lotutako lanik onartzen. Gainera, ez dugu gezurrik esaten, ezta iruzur egiten ere, nahiz eta gure nagusiak hori egiteko eskatu (Eginak 15:29; Apokalipsia 21:8).

12, 13. Zer gauza hartu beharko ditugu kontuan lanarekin lotutako erabaki bat hartzerako orduan?

¹² Eta zer gertatzen da Bibliak zuzenean kondenatzen ez duen lana bada? Bibliaren ezagueran sakontzen dugun heinean, erabaki bat hartu aurretik gauza gehiago kontuan hartu behar ditugula konturatzen gara. Adibidez, lotuta al dago lana Biblia printzipioen aurka doan ekintzaren batekin, esaterako, apustu etxe batean telefonista izatea? Bestalde, nondik jasoko dugun soldata eta lan egingo dugun tokia zein den ere kontuan hartu beharko dugu. Demagun anaia batek bere kabuz egiten duela lan. Eskainiko al lituzke bere zerbitzuak eliza bat margotzeko, erlijio faltsua bultzatzen lagunduz? (2 Korintoarrei 6:14-16).

¹³ Demagun behin gure nagusiak eliza bat margotzeko eskatzen digula. Kasu horretan, kristauok hainbat gauza hartu beharko ditugu kontuan, besteak beste, egin behar dugun lan horretan gure ardura maila zein den eta zenbateraino murgildu beharko garen. Aztertu dezagun beste egoera bat. Imajina dezagun Bibliaren aurka ez dagoen lan bat egiten dugula, adibidez, postariak garela. Lan egiten dugun auzoan gauza txarrak egiten diren tokietara ere posta eraman behar dugu. Hau bezalako egoera batean, Mateo 5:45 aipuak erabaki zuzena hartzen lagundu gaitzake (Hebrearrei 13:18). Honakoaz gain, geure buruari hurrengoa galdetu beharko genioke: «Molestatuko ote nau kontzientziak lan hau egitea onartzen badut?». Lanaren inguruan erabaki onak hartzeko, gure kontzientzia ondo hezi behar dugu.

«Zeure jarduera guztietan, izan Jauna gogoan»

14. Erabaki bat hartzerakoan, zer izan beharko genuke beti kontuan?

¹⁴ Zer gertatzen da beste gai batzuekin lotutako erabaki bat hartu behar dugunean, adibidez, zer ikasketa mota aukeratuko dugun edo tratamendu mediko bat onartuko dugun ala ez erabakitzerakoan? Hauek bezalako erabaki bat hartu behar dugunean, lehenik, Biblia printzipioak aztertu eta, ondoren, hauek praktikan nola jarriko ditugun pentsatu behar dugu. Israelgo Salomon errege jakintsuak honakoa esan zuen: «Izan bihotzez Jaunarengan konfiantza eta ez fio izan zeure adimenaz. Zeure jarduera guztietan, izan Jauna gogoan, eta berak eramango zaitu bide zuzenetik» (Esaera Zaharrak 3:5, 6).

15. Erabaki bat hartzerakoan, zer ikasten dugu lehen mendeko kristauengandik?

¹⁵ Gainera, gure erabakiek besteengan eragina izango dutela kontuan hartu behar dugu. Adibidez, Moisesen Legeak janariari buruzko arauak zituen. Baina lehen mendeko kristauak ez zeuden arau hauek guztiak betetzera behartuta eta legeak garbitzat hartzen ez zituen elikagai batzuk jan ala ez erabaki zezaketen. Hala ere, Paulo apostoluak jainko faltsuei eskainitako animalien haragia jateari buruz honakoa idatzi zuen: «Nire senideari janariren bat jatea erorbide gertatzen bazaio, ez dut inoiz haragirik jango, nire senidea erorbidean ez jartzeko» (1 Korintoarrei 8:11-13). Paulo apostoluak erabaki bat hartzerakoan besteen kontzientzia kontuan hartzeko gogorarazi zien lehen mendeko kristauei. Era berean, gure erabakiek ez lukete besteentzat erorbide izan behar (1 Korintoarrei 10:29, 32).

Bilatu dezagun Jainkoaren jakinduria

16. Nola lagundu gaitzake otoitzak erabaki onak hartzen?

¹⁶ Erabaki bat hartzerakoan, oso garrantzitsua da otoitz egitea. Santiagok honakoa adierazi zuen: «Zuetakoren bat jakinduria beharrean badago, eska diezaiola Jainkoari eta eman egingo dio, eskuzabal ematen baitu, inori ezer aurpegira bota gabe» (Santiago 1:5). Ziur gaude Jehobak gure otoitzak entzungo dituela eta erabaki onak hartzeko behar dugun jakinduria emango digula. Kezkatzen gaituzten gauzei buruz Jehobari hitz egin eta laguntza eskatzen diogunean, berak ematen digun espiritu santuak Biblia aipuak hobeto ulertzen eta kontuan hartu ez ditugunak gogoratzen lagundu gaitzake.

17. Nola lagundu gaitzakete besteek erabakiak hartzerako orduan?

¹⁷ Lagundu al gaitzakete besteek erabakiak hartzen? Bai. Izan ere, Jehobari esker kongregazioan helduak diren anai-arrebak ditugu (Efesoarrei 4:11, 12). Anai-arreba hauek esperientzia dute bizitzan eta Biblia ondo ezagutzen dute. Beraz, erabaki zuzena hartzen eta «garrantzitsuenak diren gauzez» ziurtatzen lagundu gaitzakete (Filipoarrei 1:9, 10, NWT). Baina gogoan izan besteek ez dutela gugatik erabakirik hartu behar, «nork bere zama eraman beharko baitu».

Lortuko al dugu beti emaitza onik?

18. Emaitza onak lortuko al ditugu erabaki onak hartzen baditugu?

¹⁸ Ekartzen al dituzte beti emaitza onik Biblian oinarritutako erabakiek? Luzarora bai, nahiz eta hasiera batean gauzak ondo ez doazela iruditu. Xadrak, Mexak eta Abed-Negok bazekiten irudia ez adoratzea erabakitzen bazuten, agian, hilko zituztela (Daniel 3:16-19). Era berean, apostoluek sanedrin judutarrari gizakien aurretik Jainkoa obeditu behar zutela esan ziotenean, jipoituak izan ziren askatuak izan baino lehen (Eginak 5:27-29, 40). Gainera, gogoan izan behar dugu nahiz eta erabaki on bat hartu, batzuetan, gauzak oker joan daitezkeela «une txarren bat eta espero gabeko gertaeraren bat» suertatu daitekeelako (Kohelet 9:11, NWT). Erabaki zuzen bat hartu arren, nolabait sufritzen badugu ere, ziur egon gaitezke Jehobak irauten lagunduko digula eta azkenean bedeinkatuko gaituela (2 Korintoarrei 4:7).

19. Nola eraman dezake ausardiaz bakoitzak bere zama erabakiak hartzerakoan?

¹⁹ Erabakiak hartzerakoan Bibliak dioena aztertu behar dugu eta, ondoren, gure pentsatzeko gaitasuna erabili behar dugu aztertutakoa praktikan jartzeko. Jehobak espiritu santuaren eta kongregazioko anai-arreba helduen bitartez laguntzen gaitu. Zein eskertuta gauden laguntza hauek izateaz! Laguntza hauei esker, «nork bere zama eraman» ahal izango du ausardiaz erabaki zuhurrak hartzerakoan.

Zer ikasi dugu?

• Zer da ezinbestekoa egitea erabaki onak hartzeko?

• Zer eragina du heldua izateak lagunak aukeratzerako orduan?

• Zer gauza hartu beharko ditugu kontuan lanarekin lotutako erabaki bat hartzerako orduan?

• Zer laguntza ditugu eskuragarri erabakiak hartzeko?

[Ikasketako galderak]

 [Irudia 22. orrialdean]

Adam eta Ebaren desobedientziatik irakaspen garrantzitsu bat ikasten dugu

 [Irudia 24. orrialdean]

Erabaki garrantzitsu bat hartu aurretik, bilatu ditzagun Biblia printzipioak