1. Nsɛm a wɔkae wɔ 2023 afrenhyia nhyiamu no ase no bi nye dɛn?

 AFE 2023 afrenhyia nhyiamu no ase no, yenyaa nkyerɛkyerɛmu afofor a ɔfa nsɛm bi a yɛgye dzi ho. a Afei so, wɔdze amandzɛɛbɔ a ɔhyɛ nkuran a ɔfa hɛn asɛnka edwuma no ho so too gua. Nkyerɛkyerɛmu afofor a yenyae no mu bi nye dɛ, sɛ wɔsɛɛ Babylon Kɛse no wie mpo a, obotum aba dɛ nyimpa binom benya hokwan abɛka Jehovah n’asomfo ho. Afei so, wɔdze too gua dɛ ofitsi November 2023 rokɔ no, ɔnnyɛ biribiara a adawurbɔfo bɛyɛ wɔ asɛnka edwuma no mu no na wobobu ho akontaa. Nsesa ahorow a wɔayɛ yi kyerɛ dɛ ɔnnsɛ dɛ yɛyer hɛnho wɔ asɛnka edwuma no mu bio anaa? Ɔnntse dɛm koraa!

2. Adze rekye a adze resa nyina, ebɛnadze ntsi na no ho hia paa dɛ yɛyer hɛnho yɛ asɛnka edwuma no? (Mark 13:10)

² Adze rekye a adze resa nyina, yehu dɛ no ho hia paa dɛ yɛyer hɛnho yɛ asɛnka edwuma no. Ebɛnadze ntsi a? Osiandɛ ber a wɔaka no suar. Ma yɛnhwɛ asɛm a Jesus kae faa asɛnka edwuma a yɛreyɛ wɔ ewiei mber yi mu no ho. (Kenkan Mark 13:10.) Dɛ mbrɛ Matthew so no kyerɛwtohɔ no ma yehu no, Jesus kaa dɛ wɔbɛka asɛmpa no wɔ wiadze nyina ansaana “ewiei no” aba. (Matt. 24:14) “Ewiei no” yɛ aber a wobeyi Satan no wiadze bɔn yi efi hɔ korakora. Nsɛm ahorow a ɔrennkyɛr obesisi no, Jehovah ahyɛ ‘da nye dɔn’ a obesisi no ato hɔ dada. (Matt. 24:36; 25:13; Andw. 1:7) Adze kye hɛn biara a,  nna bɛn ara na yɛrebɛn Jehovah ne da no. (Rom. 13:11) Naaso, ɔsɛ dɛ yɛkɔ do ka asɛmpa no kesi dɛ ewiei no bɛba.

3. Ebɛnadze na okenyan hɛn ma yɛka asɛmpa no?

³ Sɛ yesusu asɛnka edwuma no a yɛreyɛ no ho a, yebotum ebisa hɛnho dɛm asɛm a no ho hia paa yi: Ebɛnadze ntsi na yɛka asɛmpa no? Asɛm no ara nye dɛ ɔdɔ na okenyan hɛn ma yɛka asɛmpa no. Sɛ yɛka asɛmpa no a, ɔkyerɛ dɛ asɛmpa no da hɛn akoma do, yɛdɔ nyimpa na dza ɔkyɛn ne nyina no, yɛdɔ Jehovah na ɔyɛ hɛn dɛw dɛ ne dzin da hɛn do. Hom mma yensusu siantsir a yɛka asɛmpa no mu biara ho.

ASƐMPA NO DA HƐN AKOMA DO, NTSI NA YƐKA HO ASƐM KYERƐ NKORƆFO NO

4. Sɛ yɛtse asɛmpa bi a, ɔyɛ a yɛyɛ dɛn?

⁴ Ekaa ber bi a etsee asɛmpa bi a? Etsee nka dɛn? Bi a etsee dɛ wo busuanyi bi awo anaa wo nsa kaa edwuma bi a nna erohwehwɛ no dzendzenndzen no. Ekyingye biara nnyi ho dɛ w’enyi gyee araa ma nna woho per wo dɛ ebɛka ho asɛm akyerɛ w’ebusuafo nye w’anyɛnkofo. Aber a etsee asɛmpa a ɔsen biara a ɔno nye Nyankopɔn n’Ahendzi ho asɛmpa no, dɛmara so na etsee nka anaa?

5. Aber a odzi kan a ibohun nokwasɛm a ɔwɔ Nyankopɔn n’Asɛm mu no, etsee nka dɛn? (Hwɛ mfonyin ahorow no so.)

⁵ Kaakaa mbrɛ etsee nka aber a odzi kan a ibohun nokwasɛm a ɔwɔ Bible mu no. Ibohun dɛ wo sor Egya no dɔ wo na ɔpɛ dɛ ebɛka n’asomfo ho. Afei so, ibohun dɛ ɔahyɛ bɔ dɛ obeyi yaw na amandzehu nyina efi hɔ, na ibenyaa enyidado dɛ ebɛsan ehu w’adɔfo a woewuwu no bio wɔ wiadze fofor no mu. Ɔnnyɛ iyi nko, isuaa ndzɛmba pii so kaa ho. (Mark 10:​29, 30; John 5:​28, 29; Rom. 8:​38, 39; Nyi. 21:​3, 4) Dza isuae yi kaa w’akoma paa na ɔmaa w’enyi gyee. (Luke 24:32) W’enyi bɛgyee dza isuae no ho araa ma nna irunntum mmfa nnhyɛ woho, ntsi nna epɛ dɛ eka ho asɛm kyerɛ nkorɔfo!—Fa toto Jeremiah 20:9 ho.

6. Ebɛnadze na esua efi Ernest na Rose hɔn suahu no mu?

 ⁶ Hom mma yɛnhwɛ onua bi a wɔfrɛ no Ernest b no suahu. Ber a odzii mfe du no, ne papa wui. Ernest kaa dɛ: “Mibisaa moho dɛ: ‘Ɔkɔ sor anaa? Anaa murunnhu no bio?’ Sɛ muhu mbofra a hɔn papa tse ase a, nna m’enyi ber hɔn.” Nna Ernest taa kɔ esiei hɔ, na ɔkɔ ne papa ne nda do kobu ntwɛr bɔ mpaa dɛ: “Nyankopɔn, meserɛ wo, kyerɛ me beebi a me papa wɔ.” Ernest ne papa wui bɛyɛ mfe 17 ekyir no, Jehovah Adasefo kaa kyerɛɛ no dɛ wɔpɛ dɛ wɔnye no sua Bible no, na ɔgyee too mu ntsɛmara. Aber a obohun dɛ sɛ nyimpa wu a onnyim hwee na ɔtse dɛ obi a ɔada hatsee, na Bible no so ahyɛ bɔ dɛ wobenyan hɔn a woewuwu no, n’enyi gyee paa. (Ɔsɛnk. 9:​5, 10; Andw. 24:15) Ewiei koraa no, nsɛm bi a nna Ernest dze mfe pii ebisa no, onyaa ho mbuae. Nokwasɛm a nna Ernest rusua efi Bible no mu no, n’enyi bɛgyee ho paa. Ne yer Rose so bɛkaa no ho ma wosuaa Bible no, na noara so n’enyi bɛgyee dza nna orusua no ho. Afe 1978 na wonumaa hɔn. Dza wosuae no, nna ɔsom bo ma hɔn paa ntsi wɔyeer hɔnho kaa ho asɛm kyerɛɛ hɔn ebusuafo, hɔn anyɛnkofo nye obiara a nna obetsie hɔn no. Osiandɛ Ernest na Rose enyi gye asɛmpa no ho ntsi, woetum aboa nyimpa bɔbor 70 ma woenuma.

7. Sɛ dza yeesua efi Bible mu no ka hɛn akoma paa a, ebɛnadze na yɛbɛyɛ? (Luke 6:45)

⁷ Nokwasɛm nye dɛ, dza yeesua efi Bible mu no, sɛ ɔka hɛn akoma paa a, yerunntum nnka hɛn ano nnto mu. (Kenkan Luke 6:45.) Mbrɛ yesi tse nka no, dɛmara na Jesus n’esuafo a wɔtsenaa ase tsetse no so tsee nka. Wɔkaa dɛ: ‘Dza yeehu na yɛatse no, yerunntum nngyaa ho asɛm ka.’ (Andw. 4:20) Hɛn enyi gye nokwasɛm a yeesua no ho araa ma yɛpɛ dɛ yɛka ho asɛm kyerɛ nyimpa dodow biara a yebotum.

YƐKA ASƐMPA NO OSIANDƐ YƐDƆ NYIMPA

8. Ebɛnadze na okenyan hɛn ma yɛka asɛmpa no kyerɛ nkorɔfo? (Hwɛ adakaba a wɔato dzin “ Dɔ Nyimpa—Ma Wɔmbɛyɛ Esuafo.”) (Hwɛ mfonyin no so.)

⁸ Jehovah na ne Ba no dɔ nyimpa, na dɛmara na hɛn so yɛdɔ nyimpa. (Mbɛ. 8:31; John 3:16) Hɔn a ‘wonnyim Nyankopɔn’ na ‘wonnyi enyidado biara’ no, hɔn asɛm yɛ mbɔbɔr paa. (Eph. 2:12) Ɔhaw a dɛm nkorɔfo yi hyia wɔ asetsena mu no, ɔtse dɛ mbrɛ wɔatɔ amona bi a no mu dɔ mu. Naaso yɛwɔ ahoma a yebotum dze eyi hɔn efi mu. Ɔno nye Nyankopɔn n’Ahendzi ho asɛmpa no. Ɔdɔ na ayamuhyehye a yɛwɔ ma dɛm nkorɔfo no kenyan hɛn ma yɛyɛ dza yebotum biara ka asɛmpa no kyerɛ hɔn. Dɛm asɛmpa a ɔsom bo yi botum ama woeenya enyidado na obotum  ama hɔn asetsena so eetu mpon. Afei so, obotum ama woeenya enyidado dɛ hɔn nsa botum aka “nokwar nkwa no” anaa daa nkwa wɔ Nyankopɔn no wiadze fofor no mu.—1 Tim. 6:19.

9. Ebɛnadze na yɛbɔ nkorɔfo kɔkɔ wɔ ho dɛ obesi daakye, na ebɛnadze ntsi a? (Ezekiel 33:​7, 8)

⁹ Afei so, ɔdɔ a yɛwɔ ma nyimpa no kenyan hɛn ma yɛbɔ hɔn kɔkɔ dɛ wiadze bɔn yi n’ewiei abɛn. (Kenkan Ezekiel 33:​7, 8.) Hɔn a wɔtse hɛn mpɔtamu nye hɛn ebusuafo a wɔnnsom Jehovah no, hɔn asɛm yɛ hɛn mbɔbɔr. ‘Ahohiahia kɛse a ofitsi wiadze ahyɛse dze bodu ndɛ ɔmmbaa da, eso ɔremmba da’ a ɔrobobɔ ba no, mbrɛ nyimpa pii si bɔ hɔn bra da biara da no ma yehu dɛ wonnyim dɛ biribi a ɔtse dɛm rebesi. (Matt. 24:21) Yɛpɛ dɛ yɛma wohu dza obesi dɛm aber no. Ɔno nye dɛ wɔbɛsɛɛ ator som na ɔno ekyir no wobeyi dɛm wiadze bɔn yi efi hɔ wɔ Amagedon. (Nyi. 16:​14, 16; 17:​16, 17; 19:​11, 19, 20) Hɛn mpaabɔ nye dɛ, nyimpa beberee betsie dɛm kɔkɔbɔ yi na wɔaabɛka hɛn ho ma yaasom Jehovah. Naaso hɛn ebusuafo a yɛdɔ hɔn nye afofor a wonntsie kɔkɔbɔ no dɛm aber yi so, ebɛn asɛm na ɔbɔto hɔn?

10. Ebɛnadze ntsi na ohia dɛ yɛkɔ do bɔ nkorɔfo kɔkɔ wɔ asɛm a ɔrennkyɛr obesi no ho?

¹⁰ Dɛ mbrɛ yɛkyerɛkyerɛɛ mu wɔ adzesua a odzi iyi enyim mu no, sɛ wɔsɛɛ Babylon Kɛse no a, hɔn a wobohu na wɔbɛsesa hɔn adwen no, bi a Jehovah bɛgye hɔn nkwa. Sɛ dɛm dze a, nna ɔno ohia paa dɛ yɛkɔ do bɔ nkorɔfo kɔkɔ. Ɔwodze hwɛ o: Dɛm aber no, bi a nsɛm a yɛka kyerɛ hɔn ndɛ no bɛma wɔakaa biribi. (Fa toto Ezekiel 33:33 ho.) Bi a wɔbɛkaa nsɛm a yɛbɔɔ hɔn kɔkɔ dɛ obesisi no, na ɔbɛma wɔabɛka hɛn ho ma yaasom Jehovah ansaana wɔaka ekyir dodo. Bible no ma yehu dɛ aber a “asaasewosow kɛse bi sii” wɔ Philippi no, ɔmaa efiadzehwɛfo bi a nna ɔwɔ hɔ no sesaa n’adwen. Ndɛ so hɔn a wonntsie asɛmpa no, sɛ hɔn mu bi hu dɛ wɔasɛɛ Babylon Kɛse no a, ɔbɛyɛ hɔn hu paa, na iyi botum ama wɔaasesa hɔn adwen.—Andw. 16:​25-34.

YƐKA ASƐMPA NO OSIANDƐ YƐDƆ JEHOVAH NA ƆYƐ HƐN DƐW DƐ NE DZIN NO DA HƐN DO

11. Yesi dɛn dze enyimnyam nye enyidzi nye tum ma Jehovah? (Nyikyerɛ 4:11) (Hwɛ mfonyin ahorow no so.)

¹¹ Adze tsitsir paa ntsi a yɛka asɛmpa no nye dɛ yɛdɔ Jehovah Nyankopɔn, na ɔyɛ hɛn dɛw dɛ ne dzin krɔnkrɔn no da hɛn do. Yebu asɛnka edwuma no dɛ ɔyɛ kwan a yɛfa do yi hɛn Nyankopɔn a yɛdɔ no no ayɛw. (Kenkan Nyikyerɛ 4:11.) Yefi hɛn akoma nyina mu gye to mu dɛ Jehovah Nyankopɔn sɛ fata dɛ ɔgye enyimnyam nye enyidzi nye tum fi n’asomfo anokwafo hɔ. Adanse a odzi mu a ɔno nye dɛ Jehovah na ‘ɔbɔɔ adze nyina’  na sɛ ɔnnyɛ ɔno a nnkyɛ yɛnntse ase no, sɛ yɛka ho asɛm kyerɛ afofor a, ɔkyerɛ dɛ yɛdze enyimnyam nye enyidzi rema no. Sɛ yɛdze hɛn ber, hɛn ahoɔdzen nye hɛn ahodze yɛ asɛnka edwuma no dɛ mbrɛ hɛn tsebea bɛma hɛn kwan a, ɔkyerɛ dɛ yɛdze hɛn tum rema Jehovah. (Matt. 6:33; Luke 13:24; Col. 3:23) Asɛm no ara nye dɛ, hɛn enyi gye ho dɛ yɛbɛka Nyankopɔn ho asɛm kyerɛ nkorɔfo osiandɛ yɛdɔ no. Afei so, ɔdɔ a yɛwɔ ma Nyankopɔn no kenyan hɛn ma yɛka ne dzin nye no suban ahorow a ɔyɛ fɛw no ho asɛm kyerɛ afofor. Ebɛnadze ntsi na yɛreka dɛm?

12. Yesi dɛn tsew Jehovah ne dzin ho wɔ asɛnka mu?

¹² Osiandɛ yɛdɔ Jehovah ntsi yɛyɛ biribi dze tsew ne dzin ho. (Matt. 6:9) Atorsɛm a Satan aka dze egu Jehovah ne dzin ho fi no, yɛpɛ dɛ obiara hu dɛ ɔnnyɛ nokwar. (Gen. 3:​1-5; Job 2:4; John 8:44) Sɛ yɛnam asɛnka mu a, yɛayɛ krado dɛ yɛbɛka Nyankopɔn ho nokwasɛm akyerɛ obiara a obetsie no. Yɛpɛ dɛ obiara hu dɛ Nyankopɔn no su tsitsir nye ɔdɔ, na kwan a ɔfa do dzi tum no yɛ papa na asɛm biara nnyi ho. Afei so, yɛpɛ dɛ wohu dɛ n’Ahendzi no beyi amandzehu nyina efi hɔ na ɔbɛma adasamba asomu adwe hɔn na hɔn enyi aagye. (Ndw. 37:​10, 11, 29; 1 John 4:8) Sɛ yɛka dɛm nokwasɛm yi a ɔfa Jehovah ho no kyerɛ nkorɔfo a, nna yɛretsew ne dzin ho. Afei so, ɔma hɛn akoma tɔ hɛn yamu, osiandɛ yenyim dɛ dzin a ɔda hɛn do no ho edwuma ara na yɛreyɛ no. Ebɛnadze ntsi na yɛreka dɛm?

13. Ebɛnadze ntsi na ɔyɛ hɛn dɛw dɛ wɔfrɛ hɛn Jehovah Adasefo? (Isaiah 43:​10-12)

¹³ Jehovah eyi hɛn dɛ ‘n’adasefo.’ (Kenkan Isaiah 43:​10-12.) Mfe bi a woetwa mu no, Akwankyerɛ Kuw no kae wɔ krataa bi a wɔkyerɛwee mu dɛ: “Biribiara nnyi hɔ a enyidzi wɔ mu sen dɛ wɔbɛfrɛ hɛn Jehovah Adasefo.” c  Ebɛnadze ntsi na ɔtse dɛm? Ɔwodze ma yɛnyɛ mfatoho bi. Fa no dɛ obi etwa asɛm ato wo do dɛ ayɛ bɔn bi, na epɛ obi a obedzi wo ho dase na ɔaama nkorɔfo ehu dɛ dɛm asɛm no nnyɛ nokwar. Woana na ebɛfrɛ no dɛ ombedzi wo ho dase? Nokwasɛm nye dɛ, ebɛfa obi a inyim no na egye no dzi, na afei so nkorɔfo nyim no dɛ ɔka nokwar. Dɛmara na Jehovah so afa hɛn dɛ n’Adasefo. Iyi kyerɛ dɛ onyim hɛn yie paa na ɔgye dzi dɛ yebotum ama afofor eehu dɛ ɔno nye nokwar Nyankopɔn kortsee no. Ɔyɛ hɛn dɛw dɛ yɛyɛ n’Adasefo, ntsi hokwan biara a yebenya no, yɛma nkorɔfo hu ne dzin no. Afei so, yɛma afofor hu dɛ atorsɛm beberebe a wɔakeka afa Jehovah ho no nnyɛ nokwar. Sɛ yɛyɛ dɛm a, nna yɛrekyerɛ dɛ dzin Jehovah Adasefo a ɔda hɛn do no yɛ hɛn dɛw na yɛreyɛ ho edwuma so!—Ndw. 83:18; Rom. 10:​13-15.

YƐBƆKƆ DO AKA ASƐMPA NO EKESI EWIEI

14. Ebɛn nsɛm na yɛrohwɛ kwan dɛ obotum esisi ndaansa yi ara?

¹⁴ Ebɛn nsɛm na yɛrohwɛ kwan dɛ obotum esisi ndaansa yi ara? Dze nam Jehovah no mboa do no, yɛrohwɛ kwan dɛ nkorɔfo pii bɛba abɛgye nokwar no ansaana ahohiahia kɛse no ahyɛ ase. Afei so, hɛn enyi agye paa dɛ yeebohu dɛ wɔ ahohiahia kɛse no mu mpo no, obotum aba dɛ nyimpa beberee befi Satan no wiadze a ɔregye nda ewu no mu na wɔaabɛka hɛnho ma yaasom Jehovah!—Andw. 13:48.

15-16. Ebɛnadze na yɛbɔkɔ do ara ayɛ, na yɛbɛyɛ ekesi ebɛn aber?

¹⁵ Naaso, yɛwɔ edwuma bi yɛ. Dɛm edwuma no dze, sɛ yɛyɛ wie a, yɛrennyɛ bio da. Ɔno nye Nyankopɔn n’Ahendzi no ho asɛmpa a yɛreka wɔ wiadze nyina no. Ɔyɛ hokwan kɛse paa dɛ yɛreyɛ dɛm edwuma yi bi. Ber kor no ara so, ɔsɛ dɛ yɛbɔ nkorɔfo kɔkɔ wɔ nsɛm a ɔrennkyɛr obesisi no ho. Ɔsɛ dɛ nkorɔfo hu dɛ dɛm wiadze bɔn yi n’ewiei abɛn paa. Afei sɛ ber so dɛ Jehovah sɛɛ dɛm wiadze bɔn yi a, nkorɔfo bohu dɛ saana nsɛm a yɛkae no, nna ofi Jehovah Nyankopɔn hɔ.—Ezek. 38:23.

¹⁶ Ɔnodze, ebɛnadze na yeesi hɛn bo dɛ yɛbɛyɛ? Yɛbɔkɔ do ara dze nsi na ahokeka aka asɛm no kesi dɛ Jehovah bɛka dɛ: “Oye!” Ebɛnadze ntsi a? Osiandɛ asɛmpa no da hɛn akoma do, yɛdɔ nyimpa, na dza ɔkyɛn ne nyina no, yɛdɔ Jehovah Nyankopɔn na ɔyɛ hɛn dɛw dɛ ne dzin no da hɛn do.