Nsɛm A Akenkamfo Bisa

Asɛmfua “hɔn a wɔnngye nndzi” a Paul dze dzii dwuma wɔ 2 Corinthfo 6:​14 no, nna woananom ho asɛm na ɔreka?

Asɛm a ɔwɔ 2 Corinthfo 6:​14 no ka dɛ: “Mma hom nye hɔn a wɔnngye nndzi nntwe kɔndua kor.” Sɛ yɛhwɛ dza Paul reka ho asɛm a, ɔda edzi dɛ hɔn a wonnyi Christianfo asafo no mu no ho asɛm na ɔreka. Paul dze nsɛmfua ‘nyia ɔnngye nndzi’ anaa “hɔn a wɔnngye nndzi” dzii dwuma wɔ kyerɛwnsɛm afofor mu, na iyi foa dɛm ntseasee yi do.

Dɛ nhwɛdo no, Christianfo a wɔdze hɔn nuanom kɔr “hɔn a wɔnngye ndzi enyim” wɔ asɛndzibea no, Paul twuuw hɔn enyim dzendzenndzen. (1 Corinthfo 6:6) Hɔn a wɔnngye nndzi a Paul kaa hɔnho asɛm wɔ ha no yɛ atsɛmbuafo a wɔwɔ Corinth asɛndzibea no. Paul kae wɔ ne krataa a otsĩa ebien no mu dɛ Satan “efura hɔn a wɔnngye nndzi no enyi.” Wɔdze “nkataenyim” akata hɔn a wɔnngye nndzi a wɔtse dɛm no enyi wɔ asɛmpa no ho. Dɛm nkorɔfo yi nnyɛɛ hɔn adwen koraa dɛ wɔbɔsom Jehovah. Asɛm a Paul kae no ma yehu nokwasɛm yi. Ɔkaa dɛ: ‘Sɛ wɔdan ba Jehovah nkyɛn a, wobeyi nkataenyim no.’​—2 Corinthfo 3:​16; 4:4.

Nyimpa binom a wɔnngye nndzi dze hɔnho hyɛ basabasayɛ anaa abonsonsɔr mu. (2 Corinthfo 6:​15, 16) Naaso, ɔnnyɛ hɔn nyina na wɔkasa tsia Jehovah n’asomfo. Binom kyerɛ nokwar no ho enyigye. Hɔn mu pii so wɔ awar mu ahokafo a wɔyɛ agyedzifo, naaso wɔwɔ ɔpɛ dɛ wɔnye hɔn bɛtsena. (1 Corinthfo 7:​12-​14; 10:27; 14:22-​25; 1 Peter 3:​1, 2) Naaso, dɛ mbrɛ yeedzi kan aka no, aber biara a Paul dze asɛmfua “hɔn a wɔnngye nndzi bedzi dwuma no,” ɔdze gyina hɔ ma hɔn a wɔnnka Christianfo asafo a no mufo yɛ hɔn a ‘wɔgye Ewuradze dzi’ no ho.​—Asomafo Ndwuma 2:​41; 5:​14; 8:​12, 13.

Ngyinadosɛm a ɔwɔ 2 Corinthfo 6:​14 yɛ akwankyerɛ pa a ɔkyerɛ Christianfo kwan wɔ asetsena afa nyina mu. Wɔtaa fa dɛm asɛm kor yi ara do so tu Christianfo a wɔrohwehwɛ awar mu ahokafo no fo. (Matthew 19:​4-6) Nsonsonee kɛse da nokwar Christiannyi nye hɔn a wɔnngye nndzi no hɔn abrabɔ, hɔn botae, nye hɔn gyedzi mu. Dɛm ntsi, Christiannyi a oehyira noho do ma oenuma no fi nyansa mu kwetsir dɛ ɔbɔhwehwɛ awar mu hokafo wɔ hɔn a wonngye nndzi mu.

Na hɔn a worusua Bible no na wɔnye Christianfo asafo no bɔ no so ɛ? Na adawurbɔfo a wɔmbɔɔ hɔn esu no so ɛ? Ana wɔyɛ hɔn a wɔnngye nndzi? Oho. Onnyi dɛ yɛfrɛ hɔn a wɔabɛgye nokwar asɛmpa no ato mu na worinya nkɔenyim aper edu enuma ho dɛ wɔyɛ hɔn a wɔnngye nndzi. (Romefo 10:10; 2 Corinthfo 4:​13) Ansaana Cornelius rebɛyɛ obi a oenuma no no, nna ɔyɛ “nyimpa nyamesuronyi.”​—Asomafo Ndwuma 10:2.

Sɛ yɛbɛka no yie paa a, Paul n’afotu a ɔwɔ 2 Corinthfo 6:​14 no mmfa hɔn a wɔagye hɔn ato mu dɛ adawurbɔfo a wonnumaa hɔn no ho. Naaso, ana ɔbɛyɛ dza nyansa wɔ mu dɛ Christiannyi a oehyira noho do ma oenuma no nye ɔdawurbɔfo a wonnumaa no bɛyɛ awar nhyehyɛɛ awar? Oho, nyansa nnyi mu. Ebɛnadze ntsi a? Afotu tsenn a Paul dze maa Christianfo mbaa a wɔyɛ ekunafo no ma yehu siantsir no. Paul kaa dɛ: ‘Ɔwɔ hokwan dɛ ɔwar obiara a ɔpɛ, Ewuradze mu nko na ɔnyɛ.’ (1 Corinthfo 7:​39) Dza ɔnye dɛm afotu yi hyia no, wotu Christianfo a woehyira hɔnho do dɛ wɔnhwehwɛ awar mu ahokafo wɔ hɔn a wɔwɔ “Ewuradze mu nko.”

Asɛm “Ewuradze mu” nye “Christ mu” no kyerɛ dɛn? Paul kaa enuanom binom ho asɛm wɔ Romefo 16:​8-​10 nye Colossaefo 4:7 dɛ wɔwɔ “Christ mu” anaa “Ewuradze mu.” Sɛ ekenkan dɛm kyerɛwnsɛm no a, ibohu dɛ dɛm enuanom no yɛ ‘hɛn afɛ dwumadzifo,’ ‘hɔn a wɔagye hɔn ato mu,’ ‘Ewuradze mu adɔfo,’ ‘asomfo anokwafo,’ nye ‘hɛn mfɛfo nkowaa.’

Ebɛn aber na obi ba bɛyɛ ‘ewurakowaa wɔ Ewuradze mu’? Ɔyɛ ber a ofi ne pɛ mu yɛ dza ɔwɔ dɛ akowaa yɛ na ɔpa noho ekyir. Jesus kyerɛɛ mu dɛ: ‘Sɛ obi pɛ dɛ odzi m’ekyir a, ma ɔmpa noho ekyir, na ompegya n’asɛndua na ɔnka mo do.’ (Matthew 16:24) Obi fi ase dzi Christ ekyir ber a oehyira noho do ama Nyankopɔn na ɔdze noho nyina ama dɛ ɔbɛyɛ Nyankopɔn ne pɛ. Iyi ekyir no, wonuma no ma ɔbɛyɛ Nyankopɔn no somfo a ɔwɔ gyinabea pa wɔ Jehovah Nyankopɔn enyim. * Dɛm ntsi, ‘Ewuradze mu a yɛbɔwar no’ kyerɛ dɛ yɛbɔwar obi a ɔada noho edzi dɛ ɔyɛ gyedzinyi mapa, obi a ɔdze noho ama dɛ “Nyankopɔn nye Ewuradze Jesus Christ akowaa.”​—James 1:1.

Ɔwɔ dɛ yɛkamfo obi a ɔnye Jehovah Adasefo rusua Bible a ɔnye Nyankopɔn ntamu ebusuabɔ reyɛ dzen no. Naaso, dɛm nyimpa no nnhyiraa noho do mmaa Jehovah na ɔmmfaa noho nnsii hɔ dɛ ɔdze noho bɔbɔ afɔr asom no. Ɔda ho ara reyɛ nsakyer ahorow a ɔfata. Ɔwɔ dɛ owie nsakyer akɛse a ɔma obi bɛfata dɛ Christiannyi a oehyira noho do na oenuma no ansaana oesusu nsakyer akɛse afofor a obi yɛ wɔ n’asetsena mu, tse dɛ awar ho.

Ana ɔbɛyɛ dza ɔfata dɛ Christiannyi nye obi a akɛyɛ tse dɛ mbrɛ orinya nkɔenyim a ɔfata wɔ ne Bible adzesua mu bɛyɛ awar nhyehyɛɛ a bi a adwen no nye dɛ ɔbɔtweɔn ma woenuma no, na ɔno ekyir no ɔaawar no? Oho. Sɛ Bible suanyi bi bohu dɛ Christiannyi bi a oehyira noho do pɛ dɛ ɔwar no, naaso ɔrotweɔn ma oeenuma no ana ɔaawar no a, obotum ama adwen pa a Bible suanyi no dze rusua adze no aayɛ basaa.

Mpɛn pii no, sɛ obi bɛyɛ ɔdawurbɔfo a wonnumaa no a, ɔnnkyɛr ana oenuma no. Dɛm ntsi, afotu a yɛaka ho asɛm dɛ Ewuradze mu nkotsee na war no nnyɛ adze a ntseasee nnyi mu. Na sɛ enye ɔdawurbɔfo a wonnumaa no a ɔaso awar a wɔtsetsee no wɔ Christianfo ebusua mu na ɔnye asafo no abɔ mfe pii yɛ awar nhyehyɛɛ so ɛ? Sɛ dɛm na asɛm no tse a, ɔnodze ebɛnadze na osiw no kwan ma onntum nhyiraa noho do mmaa Jehovah? Ebɛnadze ntsi na ɔtwentweɔn n’ananadze dɛ ɔbɛyɛ dɛm? Aso n’adwen mu yɛ no konsee wɔ ahyehyɛdze no ho? Yerunntum nnka dɛ ɔyɛ obi a ɔnngye nndzi, naaso yerunntum nnka dɛ ɔwɔ “Ewuradze mu.”

Afotu a ɔfa awar ho a Paul dze ama no do wɔ mfaso ma hɛn. (Isaiah 48:17) Sɛ nyimpa beenu a wɔayɛ awar nhyehyɛɛ no ehyira hɔnho do ama Jehovah a, ɔma ahofama a wobenya ama hɔnho wɔ awar mu no bɛyɛ dza odzi mu, na ɔma wɔdze Nyankopɔn yɛ hɔn awar no ne fapem. Nyimpa beenu a wɔtse dɛm no wɔ gyinapɛn na botae kor. Iyi ma wotum nya enyigye kɛse wɔ hɔn awar mu. Bio so, sɛ ‘yɛwar wɔ Ewuradze mu a,’ ɔkyerɛ nokwar a yedzi ma Jehovah, na iyi ma yenya nhyira pii osiandɛ ‘nokwardzifo na Jehovah nye no bedzi no nokwar mu.’—Ndwom 18:25.

[Ase Hɔ Asɛm]

[Mfonyin]

‘Nokwardzifo na Jehovah nye no bedzi no nokwar mu’