¹⁶ Kenkan Nyikyerɛ 18:​2, 4, 5, 8. Dɛm kyerɛwnsɛm yi ma yehu biribi fofor so a Jehovah pɛ dɛ n’asomfo yɛ. Ɔsɛ dɛ nokwar Christianfo nyina hwɛ dɛ wɔremmfa hɔnho nnhyehyɛ biribiara a ɔfa Babylon Kɛse no ho mu. Ansaana Bible suanyi bi rubohu nokwar no, bi a nna ɔdze noho abɔ ator som bi. Bi mpo a nna ɔkɔ asɔr bi, na ɔdze noho hyehyɛɛ ɔsom no no mu dwumadzi ahorow mu. Anaaso mpo dɛ bi a nna oyi sika dze boa asɔr no. Ansaana wɔbɛgye Bible suanyi bi ato mu dɛ ɔdawurbɔfo a wonnumaa no no, ɔwɔ dɛ ɔtwe noho fi ator som ho korakora. Ɔwɔ dɛ ɔkyerɛw krataa dze kɛma asɔr no dɛ ɔnye hɔn too nkwanta a, ɔapaa. Anaaso ɔsɛ dɛ ɔma wohu dɛ ɔnye hɔn nnyi hwee yɛ bio. Dɛmara so na sɛ ɔdze noho abɔ ahyehyɛdze bi a ɔnye Babylon Kɛse no wɔ biribi yɛ a, ɔwɔ dɛ ɔtwe noho fi ho korakora. *

17. Ebɛn edwuma na onnyi dɛ Christiannyi yɛ, na ebɛnadze ntsi a?

¹⁷ Ɔsɛ dɛ nokwar Christiannyi hwɛ hu dɛ edwuma a ɔyɛ no nye Babylon Kɛse no nnyi hwee yɛ. (2 Cor. 6:​14-​17) Dɛ nhwɛdo no, onnyi dɛ ɔma asɔr bi fa no wɔ edwuma mu. Bio so, Christiannyi a edwumakuw bi afa no wɔ edwuma mu no, ɔnnsɛ dɛ ɔdze ne ber pii yɛ edwuma wɔ ɔdan bi ho a ɔbɛma ator som enya nkɔenyim. Sɛ nankasa yɛ n’edwuma a, onnyi dɛ ɔkɛgye edwuma anaa contract a ɔnye Babylon Kɛse no wɔ biribi yɛ. Ebɛnadze ntsi na yɛfa dɛm asɛm yi enyibersɛm? Ator som ahyehyɛdze ahorow no, hɔn nkyerɛkyerɛ nye hɔn ndwuma ho nntsew wɔ Nyankopɔn enyim, dɛm ntsi yɛmmpɛ dɛ yenya mu kyɛfa.​—Isa. 52:11. *

18. Onua bi sii dɛn dze Bible mu afotu yɛɛ edwuma wɔ n’edwuma mu?

¹⁸ Mfe pii a abɛsen kɔ no, contractor bi kãa kyerɛɛ onua bi a nankasa yɛ n’edwuma dɛ, ɔnkɛyɛ kapenta edwuma kakraabi wɔ asɔr dan bi a ɔwɔ kurow a onua no tse mu no mu. Nna contractor no nyim dɛ onua no akã kyerɛ no dɛ ɔnnyɛ asɔrdan ho edwuma. Naaso, dɛm aber yi dze, nna contractor no enyi aber repɛ obi a ɔbɛyɛ dɛm edwuma no. Onua no dze Bible mu afotusɛm yɛɛ edwuma ntsi ɔannkɛyɛ dɛm edwuma no. Dapɛn a odzi hɔ no, dawurbɔ krataa bi a wotsintsim wɔ kurow mu hɔ no dze kapentanyi fofor bi ne mfonyin baa krataa no mu. Nna kapentanyi fofor no dze mbeamudua bi robɔ asɔrdan no ho. Sɛ hɛn nua no ammfa Bible mu afotusɛm annyɛ edwuma a, bi a nnkyɛ no mfonyin na ɔbɛba dawurbɔ krataa no mu. Ɔwodze dwen ho hwɛ, nkyɛ iyi bɛsɛɛ onua ne dzin wɔ no nuanom Christianfo mu! Na Jehovah so ɛ? nkyɛ no werɛ bɔhow paa!