JESUS kyerɛkyerɛɛ kwan a ɔwɔ dɛ yɛfa do bɔ mpaa ho adze mpɛn pii. Wɔ n’aber do no, nna nyamesom akandzifo a wɔyɛ Jewfo no taa bɔ mpaa wɔ “abɔntsen ntoaado.” Ebɛnadze ntsi a? “Ma nyimpa eehu hɔn.” Ɔda edzi dɛ, nna wɔpɛ dɛ afofor hu hɔn dɛ wɔmmfa hɔn som nndzi agor. Nna hɔn mu pii bɔ mpaa tsentsenntsen na wɔkã nsɛm kor noara mpɛn pii. Nna wɔma ɔyɛ dɛ, sɛ obi annkasa dodow a, Nyankopɔn rinntsie ne mpaabɔ. (Matthew 6:​5-8) Jesus maa ɔdaa edzi dɛ mfaso biara nnyi do dɛ obi bɛyɛ dɛm, na ɔnam dza ɔyɛe yi do boaa nyimpa akomapafo ma wohun dza nna ɔsɛ dɛ wokwetsir aber a wɔrobɔ mpaa no. Naaso, ɔnnyɛ ndzeyɛɛ a ɔsɛ dɛ yekwetsir nkotsee na Jesus kyerɛkyerɛe faa mpaabɔ ho.

Jesus kyerɛkyerɛɛ dɛ ɔsɛ dɛ yɛbɔ mpaa dɛ Nyankopɔn ne dzin ho ntsew, n’Ahendzi mbra, na N’apɛdze nyɛ hɔ. Jesus sanee so kyerɛkyerɛɛ dɛ ɔnnyɛ mfom dɛ obi bɛkã n’ehiadze ho asɛm akyerɛ Nyankopɔn wɔ ne mpaabɔ mu dze ahwehwɛ mboa efi no hɔ. (Matthew 6:​9-​13; Luke 11:​2-4) Jesus nam mfatoho ahorow do daa no edzi dɛ, sɛ yɛpɛ dɛ Nyankopɔn tsie hɛn mpaabɔ a, ɔsɛ dɛ yɛbɔ hɛn haw no ho mpaa mpɛn pii, yenya gyedzi na yɛda ahobrɛadze edzi. (Luke 11:​5-​13; 18:​1-​14) Afei, ɔdze nankasa no nhwɛdo sii dza ɔkyerɛkyerɛe no do dua.​—Matthew 14:23; Mark 1:​35.

Ekyingye biara nnyi ho dɛ, dɛm akwankyerɛ yi a Jesus dze maa n’esuafo no boaa hɔn ma wotuu mpon wɔ hɔn mpaabɔ mu. Naaso, Jesus tweɔnee kesii anafua a otwa tun wɔ n’asaase do asetsena mu ansaana ɔrekyerɛ n’esuafo no esuadze tsitsir bi a ɔfa mpaabɔ ho.

Anafua a otwa tun wɔ Jesus n’asaase do asetsena mu no, ɔdze ne ber fã kɛsenara hyɛɛ n’asomafo anokwafo no nkuran. Nna ɔyɛ ber a oye papaapa dɛ ɔma wohu biribi fofor. Jesus kãa dɛ; “Emi nye ɔkwan no, nye nokwar no, nye nkwa no; obi mmba Egya no hɔ, gyedɛ ɔnam mo do.” Ekyir yi ɔhyɛɛ hɔn bɔ dɛ: “Biribiara a hom bɛserɛ wɔ me dzin mu no, ɔno na mebɛyɛ, ama Egya no eenya enyimnyam wɔ Ba no mu. Sɛ hom serɛ biribi wɔ me dzin mu a, mebɛyɛ.” Iyi maa hɔn akomatɔyamu papanara. Aber a nna ɔdze no nkɔmbɔ no reba ewiei no, ɔkãa dɛ: “Ɔdze bodu sesei hom nnserɛɛ hwee wɔ me dzin mu: hom nserɛ na hom benya, ma hom dɛw aahyɛ mã.”​—John 14:​6, 13, 14; 16:24.

Nsɛm a Jesus kãe no no ho hia papaapa. Nhwehwɛmu nwoma bi kã dɛ, iyi yɛ “aber a ndzɛmba sesae koraa wɔ mpaabɔ abakɔsɛm mu.” Nna ɔnnyɛ dɛ Jesus pɛ dɛ afofor gyaa dɛ wɔbɔbɔ Nyankopɔn mpaa na wɔbɔ ɔno mbom mpaa. Mbom no, nna ɔrema woehu kwan fofor a wobotum afa do nye Jehovah Nyankopɔn akasa.

Ɔwɔ mu, ofi tsetseetse na Nyankopɔn etsie n’asomfo anokwafo mpaabɔ. (1 Samuel 1:​9-​19; Ndwom 65:2) Naaso, ofitsi aber Nyankopɔn nye Israelfo no dzii ahyɛmu reba no, nna ɔsɛ dɛ hɔn a wɔpɛ dɛ Nyankopɔn tsie hɔn mpaabɔ nyinara gye to mu dɛ Israelman no yɛ ɔman a Nyankopɔn apaw hɔn. Na ekyir yi, ofitsi Solomon ne ber do reba no, nna ɔsɛ dɛ wohu dɛ asɔrfi no yɛ bea a Nyankopɔn apen do dɛ wɔmbɔ afɔr mma no wɔ hɔ. (Deuteronomy 9:​29; 2 Mbermunsɛm 6:​32, 33) Naaso, nna dɛm nhyehyɛɛ yi a wɔfa do som Nyankopɔn yi renntsena hɔ daa. Dɛ mbrɛ ɔsomafo Paul kyerɛwee no, mbra a wɔdze maa Israelfo no nye afɔr ahorow a nna wɔbɔ wɔ asɔrfi hɔ no yɛ “ndzepa a ɔbɛba no no sunsuma na nnyɛ ndzɛmba no suban ankasa.” (Hebrewfo 10:​1, 2) Nna ɔsɛ dɛ dza ɔbɛba ankasa no besi sunsuma no ananmu. (Colossaefo 2:​17) Ofitsi afe 33 H.B. reba no, sɛ obi pɛ dɛ ɔnye Jehovah nya ebusuabɔ a, nna no ho nnhia dɛ odzi Moses Mbra no do. Mbom no, ɔsɛ dɛ dɛm nyimpa no tsie nyia Mbra no twee adwen sii no do no​—Christ Jesus.​—John 15:14-​16; Galatiafo 3:​24, 25.

Jesus kyerɛɛ kwan a ɔkyɛn biara a obi botum afa do nye Nyankopɔn akasa. Ɔdaa noho edzi dɛ nyɛnko a ɔwɔ tum a ɔma ɔyɛ yie dɛ Nyankopɔn betsie na oeebua hɛn mpaabɔ. Ebɛnadze na ɔboa Jesus ma otum yɛ dɛm ma hɛn?

Wɔwoo hɛn nyina wɔ bɔn mu, ntsi biribiara nnyi hɔ a yɛbɛyɛ anaa afɔr biara nnyi hɔ a yɛbɔbɔ a obotum atsew hɛnho efi bɔn ho anaa ɔbɛma yenya ho kwan dɛ yɛnye hɛn Nyankopɔn a noho tsew a wɔfrɛ no Jehovah no benya ebusuabɔ. (Romefo 3:​20, 24; Hebrewfo 1:​3, 4) Naaso, Jesus dze ne dasanyi nkwa a odzi mũ no bɔɔ afɔr dze tuaa adasamba a wobotum agye hɔn no bɔn ho kaw. (Romefo 5:​12, 18, 19) Seseiara dze, obiara a ɔpɛ dɛ wɔtsew noho wɔ no bɔn ho no botum enya gyinabew pa wɔ Jehovah n’enyim na ɔdze “ndamyɛ” akɔ Nyankopɔn enyim​—naaso gyedɛ onya Jesus n’afɔrbɔ no mu gyedzi na ɔbɔ mpaa wɔ Jesus ne dzin mu.​—Ephesusfo 3:​11, 12.

Sɛ yɛbɔ mpaa wɔ Jesus ne dzin mu a, nna yɛreda no edzi dɛ dwuma ahorow a odzi wɔ Nyankopɔn ne tsirmpɔw mu no, annyɛ yie koraa no yɛgye no mu ebiasa yi dzi: (1) Ɔno nye “Nyankopɔn Eguambaa” no, na osian noho a ɔdze bɔɔ afɔr ntsi Nyankopɔn tum dze hɛn bɔn kyɛ hɛn. (2) Jehovah nyaan no, na seseiara ɔsom dɛ “sɔfopanyin” a ɔma yenya werdam no do mfaso. (3) Ɔno nkotsee nye “ɔkwan no,” kyerɛ dɛ, yɛnam no do kɔ Jehovah enyim wɔ mpaabɔ mu.​—John 1:​29; 14:6; Hebrewfo 4:​14, 15.

Sɛ yɛbɔ mpaa wɔ Jesus ne dzin mu a, ɔkyerɛ dɛ yɛdze enyidzi rema no. Dɛm enyidzi a yɛdze bɛma no no fata, osiandɛ Jehovah ne pɛ nye dɛ “Jesus dzin mu na anankoroma nyina nkotow . . . , na tɛkyerɛma nyina mpaa mu nkã dɛ Jesus Christ nye Ewuradze nhyɛ Egya Nyankopɔn enyimnyam.” (Philippifo 2:​10, 11) Afei so, dza ɔkyɛn ne nyinara no, sɛ yɛbɔ mpaa wɔ Jesus ne dzin mu a, ɔhyɛ Jehovah, nyia ɔmaa ne Ba no bowui maa hɛn no enyimnyam.​—John 3:​16.

Mbrɛ ɔbɛyɛ a yebohu dzibew a no mu yɛ dur a Jesus wɔ no, Bible no dze abɔdzin nye edzin ahorow bi frɛ no. Iyi ma yɛtse mfaso ahorow a yenya osian dza Jesus ayɛ, ogu do reyɛ, nye dza ɔbɛyɛ ama hɛn no ase papaapa. (Hwɛ adaka a wɔato dzin “ Dwuma Tsitsir A Jesus Dzi.”) Nokwasɛm nye dɛ, wɔama Jesus ‘dzin a ɔkyɛn dzin biara.’ * Wɔdze sor nye asaase do tum nyina ama no.​—Philippifo 2:9; Matthew 28:18.

Nyew, sɛ yɛpɛ dɛ Jehovah tsie hɛn mpaabɔ a, ɔsɛ dɛ yɛbɔ mpaa wɔ Jesus ne dzin mu. (John 14:13, 14) Naaso, ɔnnsɛ dɛ asɛm “wɔ Jesus ne dzin mu” no yɛ asɛmfua bi a yɛkã ara kɛkɛ. Ebɛnadze ntsi a?

Susu dɛm mfatoho yi ho hwɛ. Sɛ wo nsa ka krataa bi fi edwumawura bi hɔ a, bi a ebɔhwɛ no nna asɛmfua “ɔyɛ wo dɔfo” na ɔwɔ krataa no n’ase hɔ. Sɛ ihu dɛm asɛmfua no a, ana ɔbɛyɛ wo dɛ edwumawura no dɔ wo papaapa ntsi na ɔkyerɛɛw dɛm asɛmfua no, anaa krataakyerɛw ho mbra bi na odzii do kɛkɛ? Asɛm no nye dɛ, sɛ yɛdze Jesus ne dzin ridzi dwuma wɔ hɛn mpaabɔ mu a, ɔsɛ dɛ ɔyɛ dza mfaso wɔ do kyɛn dɛ yɛbɛkã no kɛkɛ amma wɔannyɛ tse dɛ krataakyerɛw ho mbra bi a yedzi do aber a yɛrekyerɛw krataa bi no. Ɔwɔ dɛ ‘yefua asɔryɛ mu’ kyerɛ dɛ, yɛbɔ mpaa daa, naaso onnyi dɛ yɛbɔ mpaa osiandɛ ohia dɛ yɛbɔ ara ntsi mbom no ɔwɔ dɛ yefi hɛn ‘akoma nyina’ mu bɔ mpaa.​—1 Thessalonicafo 5:​17; Ndwom 119:145.

Ebɛnadze na ebɛyɛ a ɔbɛma ekwetsir dɛ ebɛkã asɛmfua “wɔ Jesus ne dzin mu” kɛkɛ? Ebɛnadze ntsi na enndwendwen Jesus no suban ahorow a ɔyɛ ahomka no ho? Dwendwen dza ɔayɛ ama wo nye dza ɔwɔ ɔpɛ dɛ ɔbɛyɛ ama wo no ho. Sɛ erobɔ mpaa a, da Jehovah ase na kamfo no osian ne Ba no a ɔmaa obowui maa hɛn no ntsi. Aber a ereyɛ dɛm no, ibohu dɛ ahotodo a ewɔ wɔ Jesus no bɔhyɛ yi mu no bɛyɛ kɛse. Ɔkã dɛ: “Biribiara a hom bɛserɛ Egya no wɔ me dzin mu no, ɔdze bɛma hom.”​—John 16:23.