Ndɛ, Jehovah Adasefo nsa ka Bible ho nwoma nye video ahorow pii wɔ elɛktrɔnek mfir do sen aber biara a abɛsen kɔ. Naaso sɛ ekɔ wiadze n’afa ahorow pii a, osiandɛ intanɛt no bo yɛ dzen ntsi hɛn nuanom no nntum nntɔ. Afei so, wɔ mbea afofor so no, intanɛt no nnyɛ papa na ɔtaa tsew kɔ anaa mpo dɛ ibi nnyi hɔ koraa.

 Naaso iyi nyina ekyir no, seseiara hɛn nuanom no mu dodowara tum twe nwoma nye video ahorow wɔ elɛktrɔnek mfir do a wɔmmfa intanɛt nndzi dwuma! Iyi si dɛn yɛ yie?

 JW Box yɛ efir kakraba bi a wɔdze ma asafo ahorow a hɔn intanɛt nnyɛ papa no. Computer Department a ɔwɔ Bethel no ayɛ kɔmpiwta do dwumadzi bi, na wɔtɔ router wɔ edwumayɛkuw bi hɔ dze ka ho yɛ JW Box no. Na wowie a wɔdze nwoma nye video ahorow a ɔwɔ jw.org do no bi gu do. JW Box kor biara no bo yɛ bɛyɛ dɔla 75 ($75 U.S.).

 Wɔ Ahendzi Asa do no, enuanom sɔ Wi-Fi a ɔwɔ hɔn elɛktrɔnek mfir do no dze kɔnɛt JW Box no, na wotum twe nwoma nye video ahorow no. Hɔn a wokitsa elɛktrɔnek mfir a no bo nnyɛ dzen anaa wɔayɛ dadaw no mpo tum dze kɔnɛt. Naaso sɛ intanɛt nnyi bea a asafo bi wɔ no a, wosi dɛn nya nwoma nye video afofor a wɔaba no wɔ JW Box no do? Edwumayɛbea nkorbata no twe ndzɛmba afofor a wɔaba wɔ jw.org do no dze gu pendrive do dze mona asafo ahorow a wɔtse dɛm no. Dɛm pendrive yi kor no bo yɛ bɛyɛ dɔla 4 ($4 U.S.).

 Ebɛn kwan do na JW Box yi aboa hɛn nuanom yi? Egya bi a wɔfrɛ no Nathan Adruandra a ɔwɔ Democratic Republic of Congo kãa dɛ: “Mobɔɔ mbɔdzen mpɛn pii dɛ mobɔtwe ‘O Jehovah, Wo mu na Medze Mo Werɛ Mahyɛ’ nye Kaa Lot Ne Yer No drama no bi naaso nna ɔnnyɛ yie, ntsi iyi maa m’abaw mu bui. Naaso sesei dze, mubotum atwe dɛm video ahorow yi egu mo fon do, na dɛ awofo no, iyi boa hɛn ma yetum kyerɛkyerɛ hɛn mba no yie.”

 Onua bi a ɔboa asafo ahorow a wɔwɔ Nigeria ma wɔhyehyɛ hɔn JW Box no kãa dɛ: “Enuanom no hu JW Box no dɛ akyɛdze soronko a ofi Jehovah hɔ. Ɔyɛ hɔn enyigye papaapa dɛ seseiara wobotum atwe nwoma nye video ahorow a ɔwɔ hɛn Edwindadze Etsitsir A Yɛdze Kyerɛkyerɛ no mu a wɔmmberɛ ho koraa.”

 Wɔdze JW Box bɔbor 1,700 akɛma hɛn nuanom a wɔwɔ Africa, Oceania, nye South America, na wogu do ara reyɛ nhyehyɛɛ mbrɛ ɔbɛyɛ a asafo ahorow pii so nsa bɛka bi. Wonya sika wɔ hen dze tua iyinom nyinara ho kaw? Dze nam ntoboa ahorow a woyi dze boa wiadze nyina ɔsom edwuma no do. Woyi no mu dodowara fa donate.pr418.com do. Yɛda hom ase wɔ ntoboa a hom fi hom pɛ mu yi no ho.