“Nhyira akã hɔn a wotsie Nyankopɔn asɛm na wodzi do.”​—Luke 11:28, Nwoma Krɔnkrɔn, Fante Bible.

Ibenya ɔdɔ mapã wɔ w’ebusua mu.​—Ephesusfo 5:28, 29.

Obu a no mu dɔ bɛtsena w’ebusua mu.—Ephesusfo 5:33.

Awerɛhyɛmu nye koryɛ bɛba w’ebusua mu.​—Mark 10:6-9.

Nyew, nsɛm ebien a odzidzi do yi bɔboa hɛn:

• Nyankopɔn na ɔhyehyɛɛ ebusua asetsena. Bible kyerɛ dɛ Jehovah Nyankopɔn kãa nyimpa ebien a wodzi kan no bɔɔ mu dɛ awarfo. (Genesis 2:18-24) Ntsi Jehovah na ɔhyehyɛɛ ebusua asetsena. Ebɛnadze ntsi na iyi ho hia?

  Fa no dɛ iridzi edziban bi a ɔyɛ dɛw na epɛ dɛ ihu dza wɔdze yɛe, woana na ibebisa no? Ɔnyɛ dɛn ara a nyia ɔyɛɛ edziban no nna ibebisa no.

  Dɛmara na sɛ yɛpɛ dɛ yehu dza ɔdze ebusua mu enyigye ba a, ɔsɛ dɛ yebisa Jehovah, Onyii a ɔhyehyɛɛ ebusua asetsena no hɔ akwankyerɛ.

• Nyankopɔn dwen wo ho. Ohia dɛ ebusua biara hwehwɛ Jehovah n’afotu a ɔnam Bible no do dze ma hɛn no. Ebɛnadze ntsi a? “Osiandɛ ɔdwen hom do.” (1 Peter 5:6, 7) Wo yiedzi ho hia Jehovah, na n’afotu yɛ papa ber nyina.​—Mbɛbusɛm 3:5, 6; Isaiah 48:17, 18.