‘Nyankopɔn . . . bɛpepa hɔn enyiwa mu nyinsuwa nyina; na owu nnyi hɔ bio; na awerɛhow, nye sũ, nye yaw bi nnyi hɔ bio: osiandɛ nkan no ndzɛmba no etwa mu.’​—Nyikyerɛ 21:3, 4, Nwoma Krɔnkrɔn, Fante Bible.

Edwuma a ɔma akomatɔyamu.—Isaiah 65:21-23.

Yarba na amandzehu biara bɔbɔ adze.​—Isaiah 25:8; 33:24.

Enye w’ebusuafo na anyɛnkofo bɔbɔ mu atsena wɔ enyigye mu afebɔɔ.​—Ndwom 37:11, 29.

Nyew, nsɛm ebien a odzidzi do yi bɔboa hɛn:

• Ɔnnsõ Nyankopɔn yɛ dɛ ɔbɛma n’anohoba aba mu. Jehovah Nyankopɔn ne tum nnyi ano. Dɛm ntsi na Bible no frɛ ɔno nkotsee “Adze nyina do Tumfo” no (Nyikyerɛ 15:3) Ntsi ɔnnyɛ dzen koraa mma Nyankopɔn dɛ ɔbɛsesã hɛn wiadze yi ma no mu tsena ayɛ ahomka. Dɛ mbrɛ Bible no kyerɛ no, “Nyankopɔn afamu dze, adze biara nnsõ no yɛ.”​—Matthew 19:26.

• Nyankopɔn pɛ dɛ n’anohoba tsim. Dza ɔnye asɛm yi hyia no, Jehovah Nyankopɔn enyi gyina dɛ obenyan ewufo aba nkwa mu bio.​—Job 14:14, 15.

  Bible no so bɔ hɛn amandzɛɛ dɛ Jesus saa ayarfo yarba. Dɛn ntsi na ɔsaa hɔn yarba? Osiandɛ nna ɔwɔ ɔpɛ dɛ ɔbɛyɛ dɛm. (Mark 1:40, 41) Tse dɛ n’Egya no, nna Jesus wɔ ɔpɛ dɛ ɔbɔboa nyimpa a na wɔwɔ ahohia mu no.​—John 14:9.

  Ne dɛm ntsi yɛwɔ awerɛhyɛmu dɛ Jehovah nye Jesus bɔboa hɛn ma ndaamba yeedzi dɛw!​—Ndwom 72:12-14; 145:16; 2 Peter 3:9.