NIU YOKA—Era curu vakailoa na ovisa ena dua na gauna ni nodra sokalou na iVakadinadina i Jiova ena yakavi ni ika25 ni Me, 2017. E vesu kina e dua na turaga ni Denmark, e lewenivanua e Rusia. Qori e salavata kei na lewa e tauca na Mataveilewai Cecere ni Rusia ena ika20 ni Epereli 2017 me baleti ira na iVakadinadina i Jiova.

Era curu vakailoa e rauta ni 15 na ovisa vakaiyaragi kei ira na vakailesilesi ni veitaqomaki ni matanitu (Federal Security Service) ena nodra soqo ni lotu na iVakadinadina i Jiova ena korolevu o Oryol (e kilai tale ga me o Orel), e laurai toka ena itaba. Era kumuna na ovisa na kedra itukutuku kece na tiko e kea ra qai taura na nodra iyaya vakalivaliva. Era vesuka tale ga na vakailesilesi ni veitaqomaki e dua na turaga ni Denmark o Dennis Christensen, e iVakadinadina i Jiova. Oti ga ya, era yanaraka na ovisa e va na vale ni iVakadinadina i Jiova ena korolevu.

Eratou vesuki koya ena bogi qori na vakailesilesi ni veitaqomaki (FSB), ia nikua e vakadonuya na Mataveilewai e ra (Soviet District Court) e Oryol na nodratou kerekere na vakailesilesi ni veitaqomaki (FSB), e vakarota tale ga me vesu tu vakawawa o Christensen me oti mada na nodratou veivaqaqai. O Christensen, na imatai ni vulagi e vakayacori vua na ivakarau qo me tekivu ena gauna e tauca kina na Mataveilewai Cecere e Rusia na lewa me baleti ira na iVakadinadina i Jiova e kea. Ke vakadinadinataki ni cala, e rawa ni balavu nona vesu.

Sa yaco oti e sivia ni 40 na ivakarau voravora va qo vei ira na iVakadinadina i Jiova, wili kina na kena qo nira vakaitavi kina na vakailesilesi ni matanitu kei na so tale, ni oti nona vakatakilakilataki ira na Mataveilewai Cecere e Rusia nira dau vakavuna na tikoyavavala qai vakatabuya na Valenivolavola e kea kei na 395 tale na isoqosoqo vakalawa ni iVakadinadina i Jiova ena vanua taucoko vakaRusia.

Oti ga e vica na aua nona vakataulewa na Mataveilewai Cecere ena ika20 ni Epereli, era vakacaca eso na tagane ena dua na vale levu era dau sokalou kina na iVakadinadina i Jiova e St. Petersburg ra qai vakarerei ira na tiko e loma. Era vakacaca tale ga ena vo ni vale ni sokalou kei na nodra dui vale na iVakadinadina i Jiova ena yasayasa o Kaliningrad, Moscow, Penza, Rostov, St. Petersburg, Sverdlovsk, Voronezh, kei Krasnoyarsk. Dua tale na gauna, ena ika24 ni Me 2017, ena tauni o Zheshart ena Komi Republic, e vakacacani e dua na vale era dau sokalou kina na iVakadinadina i Jiova ni vakamai. Me ikuri ni nodra curu vakailoa na ovisa kei na vakacaca, era mokulaki tale ga na iVakadinadina i Jiova, vakarerei e koronivuli kei na vanua ni cakacaka, se vakacegui mai na nodra cakacaka.

E kaya o David A. Semonian, na mata ni iVakadinadina i Jiova ena nodra itikotiko liu: “Keimami leqataka vakalevu na iVakadinadina i Jiova e veiyasa i vuravura na kedra ituvaki na taci keimami e Rusia. E vakavuna na tikoyavavala na lewa tawadodonu e tauca na Mataveilewai Cecere e Rusia me baleti keimami. Keimami kerea ena ika19 ni Me, 2017 me rogoci tale. Qo e gauna vinaka me muduka kina o Rusia na nona ivalavala tawadodonu vei keimami na iVakadinadina i Jiova. Keimami kerea tale ga me dikevi tale nona vesu vakatawadodonu na taci keimami o Dennis Christensen.”

Gusunivosa:

Veiyasa i vuravura: David A. Semonian, Valenivolavola ni iTukutuku, +1-845-524-3000