Ena ika7 ni Seviteba 2022, e kaya na komiti e valataka nodra dodonu na lewenivanua na United Nations Human Rights Committee (CCPR), ni beca na matanitu o Tajikistan na nodra dodonu na tacida. Ena ika7 ni Julai 2022, e tokoni ira na CCPR me baleta na kisi na Adyrkhayev v. Tajikistan. Qori na nona sega ni vinakata o Tajikistan me vakalawataki ira, e vakatabuya tale ga na nodra cakacaka.

E sivia e 50 na yabaki nodra marautaka tu na tacida nodra sokalou e Tajikistan. Ena 1994, e rejisitataki na nodra cakacaka, ra qai kilai kina vakalawa me Religious Association of Jehovah’s Witnesses (RAJW). Ia ena ika11 ni Okotova 2007, e bokoca na tabana ni matanitu na Ministry of Culture na nodra rejisita, qai vakatabuya na nodra sokalou. E kaya ni vakavuna na tikoyavavala na nodra vakaitavi ena vunau, sega ni via curu ena mataivalu, ra qai vakabauta nira lotu dina. E vakavica nodra sega ni vakadonui mera rejisita tale.

Na lewa qai tau oti ga qo, e kaya kina na CCPR ni cala vakalawa na kena vakatabui nodra cakacaka na tacida e Tajikistan. E kaya ni “sega ni dua na vuna” me vakatabuya o Tajikistan na isoqosoqo na RAJW, kei na nona sega ni vakadonuya me rejisita tale.

E kaya tale ga ni qori e vakavuna na nodra “vesu, vakatarogi, caka na vaqaqara e nodra vale, mokulaki, kau nodra ivola vakaivolatabu, qai vakatalai [e dua] na iVakadinadina i Jiova.” E kaya na CCPR ni o Tajikistan e vakalolomataki ira na tacida, e beca nodra dodonu, qai sega ni tokona na veidinadinati ni United Nations International Covenant on Civil and Political Rights.

E vakataulewataka na CCPR me dikeva tale o Tajikistan na nodra kerekere mera rejisita tale, me saumi ira tale ga vakailavo na tacida e beci na nodra dodonu. E tukuni tale ga vua “me cakava na ka kece e rawata me kua ni beci tale kina nodra dodonu ena gauna mai muri.”

Na ka e cakava qo na CCPR ena rawa ni sere kina o Brother Shamil Khakimov, e yabaki 71. E vesu ena Feperueri 2019 ena vuku ni nona vakabauta. E vesu ena gauna era tekivu vakatabui kina na tacida.

Na vakatulewa qo ni CCPR ena rawa nira sokalou kina ena galala na tacida e Tajikistan. Meda masulaka mada ga ni na vakalougatataka o Jiova na sasaga ni kena “taqomaki na itukutuku vinaka, qai tauyavutaki vakalawa.”—Filipai 1:7.