O Via Kila na Ka Dina?

SARAVA/ROGOCA

O Via Kila na Ka Dina?

NA KA dina me baleta na cava? Me baleta e so na taro bibi eda dau taroga. Rairai o dau vakasamataka tale ga e so na taro va qo:

E kauaitaki keda beka na Kalou?
Ena oti beka na ivalu kei na rarawa?
E bula tale tiko e dua na ka nida sa mate?
Na cava na inuinui me baleti ira na sa mate?
Na masu vakacava e rogoca na Kalou?
Rawati vakacava na marau?

O na qara e vei na isaunitaro qori? Ke o tarogi ira e so, ena duidui na nodra isaunitaro. Ena veicalati tale ga na nodra isaunitaro na iliuliu ni lotu. O na rairai kunea ena laibri se sitoa ni ivola e drau vakadrau na ivola era kaya ni tiko kina na isaunitaro. Ia e sega ni tautauvata na veika e volai kina. E so tale e veiveisau na kena ivakamacala ni toso na yabaki se sosomitaki ena dua tale na ivola.

Ia e tiko e dua na ivola ena sauma vinaka na taro kece oya qai kune kina na ka dina. A kaya o Jisu Karisito ena nona masu vua na Kalou: “Sa ka dina na nomuni vosa.” (Joni 17:17) Qori e vakaibalebaletaka na iVolatabu. Ena tabana e tarava, o na raica kina na isaunitaro vakaivolatabu me baleta na taro mai cake.

E Kauaitaki Keda Beka na Kalou?

Duri tu e dua na turaga ena kedra maliwa e dua na ilawalawa

VUNA E TAROGI KINA: Eda bula tu qo ena vuravura e levu kina na veivakalolomataki. Levu na lotu era vakavulica ni veika rarawa eda sotava e loma ni Kalou.

NA KA E KAYA NA IVOLATABU: Na Kalou e sega ni vakavuna na ca. E kaya na Jope 34:10: ‘E yawa vua na Kalou me caka ca: yawa tale ga vua sa Kaukauwa me sega ni dodonu.’ E tiko na inaki loloma ni Kalou me baleti keda. Ya na vuna a vakavulici keda kina o Jisu meda masuta: “Tamai keimami mai lomalagi,…me yaco mai na nomuni matanitu, me caka na lomamuni e vuravura, me vaka sa caka tiko mai lomalagi.” (Maciu 6:9, 10, VV) E kauaitaki keda dina na Kalou ena nona solia mai na luvena me mate ena vukuda me vakayacori kina nona inaki.—Joni 3:16.

Raica tale ga na Vakatekivu 1:26-28; Jemesa 1:13; 1 Pita 5:6, 7.

Ena Oti Beka na iValu kei na Rarawa?

VUNA E TAROGI KINA: Levu era mate ena ivalu. Eda sotava kece tale ga na rarawa.

NA KA E KAYA NA IVOLATABU: Sa parofisaitaka tu na Kalou na gauna ena tekivu kina na bula vakacegu e vuravura taucoko. O ira era bula ena ruku ni veiliutaki ni nona Matanitu, era na “tukitukia na nodrai seleiwau mei bati ni siviyara,…ra na sega ni vulica tale nai valu.” (Aisea 2:4) Ena vakaotia na Kalou na veika tawadodonu kei na rarawa. E yalataka na iVolatabu: “Na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa [okati kina na veika tawadodonu kei na rarawa da sotava tu nikua].”—Vakatakila 21:3, 4.

Raica tale ga na Same 37:10, 11; 46:9; kei na Maika 4:1-4.

E Bula Tale Tiko e Dua na Ka Nida sa Mate?

VUNA E TAROGI KINA: Levu na lotu era vakavulica ni bula tiko e dua na ka nida sa mate. So era kaya ni rawa vei ira na mate mera vakasagai keda, se ra kaya ni Kalou e totogitaki ira na ca mera vakararawataki tawamudu ena drano bukawaqa i eli.

NA KA E KAYA NA IVOLATABU: Nida mate, sa sega tale ni bula tiko e dua na ka. Kaya na Dauvunau 9:5: “Ko ira na mate era sa sega ni kila e dua na ka.” Kena ibalebale nira sega ni rawa ni vakasagai keda se vukei keda, nira sa sega ni vakila e dua na ka.—Same 146:3, 4.

Raica tale ga na Vakatekivu 3:19 kei na Dauvunau 9:6, 10.

Na Cava na iNuinui me Baleti Ira na Mate?

VUNA E TAROGI KINA: Eda vinakata meda bula qai marau vata kei ira na wekada lomani. Kena ivakarau ga meda via raici ira tale na wekada lomani era sa takali.

NA KA E KAYA NA IVOLATABU: Levu era sa mate era na vakaturi. E yalataka o Jisu ni ‘o ira kece na tu ena ibulubulu era na lako cake mai.’ (Joni 5:28, 29, VV) Me lako vata kei na inaki taumada ni Kalou, era na rawa ni bula tawamudu tale ga ena vuravura parataisi na vakaturi. (Luke 23:43) E okati ena yalayala qo na bula uasivi kei na bula tawamudu vei ira na talairawarawa. E kaya na iVolatabu: “Era na taukena na vanua ko ira na yalododonu, ka tiko kina ka sega ni mudu.”—Same 37:29.

Raica tale ga na Jope 14:14, 15; Luke 7:11-17; kei na Cakacaka 24:15.

Na Masu Vakacava e Rogoca na Kalou?

VUNA E TAROGI KINA: Era dau masu na tamata kece e tiko na nodra lotu. Ia, e levu era nanuma ni sega ni saumi nodra masu.

NA KA E KAYA NA IVOLATABU: A vakavulica o Jisu meda kua ni “cavuta tiko ga e dua na qaqanimasu” me vakataki ira e so. (Maciu 6:7, NW) Ke da vinakata me rogoca na Kalou na noda masu, dodonu meda masu ena sala e vakadonuya. Ena rawa qori ke da vulica nona inaki, qai salavata noda masu kei na lomana. Na imatai ni Joni 5:14 e kaya: “Kevaka eda sa kerea e dua na ka me vaka na lomana [ni Kalou], sa rogoci keda ko koya.”

Raica tale ga na Same 65:2; Joni 14:6, 14; kei na 1 Joni 3:22.

E Rawati Vakacava na Marau?

Wili iVolatabu e dua na marama ni qara na marau

VUNA E TAROGI KINA: Levu era vakabauta ni na vakamarautaki ira na ilavo, rogo, se na kedra irairai. Ra vakaliuca kina na veika qo-ra qai kila nira sega ni marau.

NA KA E KAYA NA IVOLATABU: A vakaraitaka o Jisu na sala me rawati kina na marau ena nona kaya: “Era marau o ira e gu na lomadra mera vulica na vosa ni Kalou.” (Maciu 5:3, NW) Ena rawati ga na marau dina ke da saga meda kila na ka dina me baleta na Kalou kei na nona inaki me baleti keda. E kunei qori ena iVolatabu. Nida kila na ka dina, eda na qai kila na veika e bibi kei na kena e sega. Ena dusimaki keda ena noda vakatulewa kei na ka eda cakava, qai vakainaki kina noda bula.—Luke 11:28.

Raica tale ga na Vosa Vakaibalebale 3:5, 6, 13-18 kei na 1 Timoci 6:9, 10.

Qo na ivakamacala lekaleka ga ni kena saumi vakaivolatabu e ono na taro. O via kila tale e levu na ka? Ke ‘gu na lomamu mo vulica na vosa ni Kalou,’ sega ni vakabekataki ni o na via kila e levu tale na ka. O na rairai lomatarotarotaka e so na taro me vaka: ‘Ke kauaitaki keda dina na Kalou, cava e vakatara tiko kina na ca kei na rarawa? Au na vakavinakataka vakacava na noqu bula vakavuvale?’ Na taro qori kei na vuqa tale ena sauma vinaka na iVolatabu.

Ia ena dredre beka vei ira e levu nikua mera dikeva na ka e kaya na iVolatabu. Era nanuma ni sa rui ivola levu qai dredre meda kila. O na vinakata beka me dua e vukei iko ena kena saumi na nomu taro mai na iVolatabu? E vakarautaka na iVakadinadina i Jiova na ivukevuke mo dusimaki kina.

iMatai, na ivola Na Cava Sara Mada e Kaya na iVolatabu? e vakarautaki me yaga vei ira na osooso ena kena saumi vakamatata mai na iVolatabu na taro bibi. Na ikarua ni ivukevuke na ituvatuva ni vuli iVolatabu e sega ni saumi kei na dua na iVakadinadina i Jiova. Ena rawa ni lako sara ga yani e vale ena veimacawa se na dua tale na vanua veiganiti e dua na iVakadinadina i Jiova e rawa ni veivakavulici ena iVolatabu qai tiko e nomuni yasayasa. E sa yaga vei ira e milioni e vuravura raraba na ituvatuva qo. Levu era kaya ni “qo sara ga na ka dina!”

E sega ni dua tale na ka e uasivita na iyau vakayalo. E sereki keda na ka dina ena iVolatabu mai na vakatevoro, veilecayaki, kei na rere vakalialia. E solia vei keda na inuinui, vakainaki noda bula, da qai vakila na marau. E kaya o Jisu: “Dou na kila na ka dina, ia na ka dina ena sereki kemudou.”—Joni 8:32.