iMatai ni Samuela 4:1-22
4 E vosa o Samuela vei ira kece na Isireli.
Era qai lako na Isireli mera valuti ira na kai Filisitia, era lai keba volekati Epenisa, era keba tiko e Efeki na kai Filisitia.
2 Era tuva vakaivalu na kai Filisitia mera valuti Isireli, e kaukaua sara na ivalu era mani vakadrukai Isireli na kai Filisitia, era vakamatea na kai Filisitia e rauta ni 4,000 na tagane ena bucanivalu.
3 Nira lesu na tamata ina keba, era kaya na qase ni Isireli: “Na cava e vakatara kina o Jiova mera vakadrukai* keda nikua na kai Filisitia?+ Meda kauta mai Sailo na kato ni veiyalayalati i Jiova,+ me tiko vata kei keda me vakabulai keda mai na ligadra na keda meca.”
4 Era talatala na tamata i Sailo mera kauta mai kea na kato ni veiyalayalati i Jiova ni lewe vuqa* e toka e cake vei rau na jerupi na nona idabedabe vakaturaga.+ Erau tiko tale ga e kea kei na kato ni veiyalayalati ni Kalou dina na luvei Ilai, o Ofinai kei Finiasi.+
5 Ni yaco ga ena keba na kato ni veiyalayalati i Jiova, era kaila vakalevu na Isireli taucoko, e sakure kina na qele.
6 Nira rogoca na kai Filisitia na kaila, era kaya: “Na cava era kaila tiko kina vakalevu o ira na tiko ena nodra keba na Iperiu?” Era qai kila ni sa tiko ena keba na Kato i Jiova.
7 Era rere na kai Filisitia, era kaya: “Sa lako mai na Kalou ina keba!”+ Era kaya sara: “Eda sa kalouca ni se sega ni bau yaco na ka qo!
8 Eda sa kalouca! O cei ena vakabulai keda mai na liga ni Kalou lagilagi qo? Qo ga na Kalou e mokuti ira na Ijipita ena vanua talasiga ena veimataqali veivakamatei.+
9 Moni yaloqaqa, moni tu vakatagane o kemuni na kai Filisitia, moni kua kina ni qaravi ira na Iperiu me vaka ga na nodra qaravi kemuni.+ Moni tu vakatagane, moni vala!”
10 Era mani vala na kai Filisitia ra qai vakadrukai ira na Isireli,+ era dui dro ena nodra valelaca. Levu sara era mate; era mate vei ira na Isireli e le 30,000 na sotia era dau taubale.
11 E kovei tale ga na Kato ni Kalou, erau mate na luvei Ilai o Ofinai kei Finiasi.+
12 E dua na tagane vei ira na Penijamini e dro mai na bucanivalu qai yaco i Sailo ena siga tiko ga oya, e kakadresudresu na nona isulu e tauvi qele tale tu ga na uluna.+
13 Ni yaco yani, e dabe tiko o Ilai ena idabedabe volekata na batinisala qai vakararai tiko ni lomaleqataka na Kato ni Kalou dina.+ E lai tukutuku sara na tagane qori ena koro ra qai qolou na lewenikoro taucoko.
14 Ni rogoca o Ilai na qolou, e taroga: “Na cava na ibalebale ni ue qo?” E vakatotolo yani na tagane qori me tukuna na itukutuku vei Ilai.
15 (Ia sa yabaki 98 o Ilai, e raisara qai sega ni rai rawa.)+
16 E qai kaya na tagane vei Ilai: “Au lako mai na bucanivalu! Au dro mai na bucanivalu nikua.” E taroga o koya: “Na cava e yaco luvequ?”
17 E talanoataka o koya e kauta yani na itukutuku: “Era drovaki ira na kai Filisitia na Isireli, era druka vakaloloma na tamata,+ erau mate tale ga na luvemu tagane o Ofinai kei Finiasi,+ qai kovei na Kato ni Kalou dina.”+
18 Ena gauna ga e tukuna kina na Kato ni Kalou dina, e bale i muri o Ilai ena nona idabedabe volekata na matamata qai ramusu na domona mani mate, ni sa qase o koya qai bi. E lewai Isireli o koya me 40 na yabaki.
19 Ia na vugona, na wati Finiasi e bukete tiko, sa voleka sara ni sucu. Ni rogoca o koya na itukutuku ni kovei na Kato ni Kalou dina, ni sa mate tale ga o vugona kei watina, e cuva o koya qai taratara vakasauri, e vakasucu sara.
20 Ni sa voleka ni mate, era kaya na yalewa era duri volekati koya tu: “Kua ni rere ni o sa vakasucuma e dua na gonetagane.” E sega ni sauma o koya, e sega ni kauai kina.*
21 Ia e vakayacana na gonetagane me o Ikapoti,*+ e kaya: “Sa kau vakavesu na ka e dau lagilagi kina o Isireli,”+ e vakaibalebaletaka na kena kovei na Kato ni Kalou dina, kei na ka e yacovi vugona kei watina.+
22 E tomana: “Sa kau vakavesu na ka e dau lagilagi kina o Isireli ni kovei na Kato ni Kalou dina.”+
iVakamacala e ra
^ Ipe., “Na cava e vakadrukai keda kina o Jiova?”
^ Qo na mataivalu vakalomalagi.
^ Se “sega ni tugana e lomana.”
^ Kena ibalebale “I Vei na Lagilagi?”
