iKarua ni Tui 13:1-25
13 Ena ika23 ni yabaki i Joasi+ na luvei Esaia+ na tui Juta, sa qai tui Isireli mai Samaria o Jioasi na luvei Jeu,+ e veiliutaki me 17 na yabaki.
2 E cakava tiko ga o koya na ka ca ena mata i Jiova, e muria tiko ga na ivalavala ca i Jerepoami na luvei Nipati e vakavuna me valavala ca kina o Isireli.+ E sega ni gole tani mai kina.
3 E waqa na cudru i Jiova+ vei Isireli+ qai soli ira e liga i Tui Eseli+ e Siria, kei na liga i Penietati+ na luvei Eseli ena nodra gauna kece.
4 Sa dede toka e qai vakamasuti Jiova o Jioasi, mani rogoci koya o Jiova ni raica na nona vakararawataki ira na Isireli na tui Siria.+
5 E mani solia o Jiova vei Isireli e dua na ivakabula+ me sereki ira mai na ivesu nei Siria, era mani tiko ga na Isireli ena nodra vale me vaka ga e liu.*
6 (Ia era sega ni biuta na ivalavala ca ni vuvale i Jerepoami e vakavuna mera valavala ca kina na Isireli.+ Era valavala ca* tiko ga, e tu ga na duru ni sokalou*+ mai Samaria.)
7 E vo ga vei Jioasi e dua na mataivalu e 50 na kena dauvodo ose, e 10 na qiqinivalu kei na 10,000 na sotia era taubale, ni sa vakarusai ira na tui Siria,+ e butubutuki ira mera vaka na kuvu ena gauna ni butu covuata.+
8 Na vo ni itukutuku me baleti Jioasi, na ka kece e cakava kei na nona kaukaua, e volai ena ivola ni itukutuku ni nodra gauna na tui Isireli.
9 E qai davo vata kei ira na tukana o Jioasi, era buluti koya ga e Samaria,+ e tui sara o Joasi na luvena me sosomitaki koya.
10 Ena ika37 ni yabaki i Tui Joasi e Juta, sa qai tui e Isireli mai Samaria o Joasi+ na luvei Jioasi, e veiliutaki me 16 na yabaki.
11 E cakava tiko ga na ka ca ena mata i Jiova, e sega ni biuta na ivalavala ca kece i Jerepoami na luvei Nipati e vakavuna me valavala ca kina o Isireli.+ E cakava tiko ga* o koya na ivalavala ca qori.
12 Na vo ni itukutuku me baleti Joasi, na ka kece a cakava kei na nona kaukaua kei na nona valuti Tui Emasia e Juta,+ e volai ena ivola ni itukutuku ni nodra gauna na tui Isireli.
13 E qai davo vata kei ira na tukana o Joasi, e dabe sara ena nona idabedabe vakaturaga o Jerepoami.*+ E bulu vata kei ira na tui Isireli o Joasi mai Samaria.+
14 E tauvi Ilaisa+ sara e dua na mate ena vakamatei koya, ia e lako sobu vua o Joasi na tui Isireli, e tagicaki koya, e kaya: “I tamaqu, i tamaqu! Na qiqinivalu nei Isireli kei ira nona dauvodo ose!”+
15 E qai tukuna vua o Ilaisa: “Taura e dua na dakaititi kei na so na gasau.” E taura sara o koya e dua na dakaititi kei na so na gasau.
16 E tukuna vua na tui Isireli o koya: “Taura e ligamuni na dakaititi.” E vakadreta sara e ligana, e biuta yani o Ilaisa na ligana ena liga ni tui.
17 E qai kaya o koya: “Moni dolava na katubaleka ina tokalau.” E dolava sara o koya. E kaya o Ilaisa: “Vana!” E vana sara. E kaya o Ilaisa: “Na gasau ni qaqa* nei Jiova, na gasau ni qaqa vei* Siria! Oni na mokuti* Siria e Efeki+ moni vakaotia sara.”
18 E tukuna tale: “Taura eso na gasau,” e taura sara o koya. E qai tukuna vua na tui Isireli: “Mokuta na qele.” E mokuta vakatolu na qele qai cegu.
19 E cudruvi koya na tamata ni Kalou dina, e tukuna: “A dodonu moni mokuta vakalima se vakaono na qele! Oni na mokuti Siria moni vakaotia sara, ia qo oni na mokuti Siria ga vakatolu.”+
20 Oti qori e mate o Ilaisa, mani bulu. Era dau lako yani ena vanua na ilala daukabakoro+ ni Moapi ena itekivu ni yabaki.*
21 Eso era buluta tiko e dua na tamata era mani raica na ilala daukabakoro, sega ni bera nira kolotaka na yagona ena ibulubulu nei Ilaisa, era dro yani. Ni tara ga na sui nei Ilaisa na yago ni tamata qo, e bula+ qai tucake.
22 E vakasaurarataki ira na Isireli+ o Tui Eseli+ e Siria ena gauna taucoko i Jioasi.
23 Ia e lomani ira o Jiova, e yalovinaka vei ira+ qai nanumi ira ena vuku ni nona veiyalayalati kei Eparama,+ Aisake+ kei Jekope.+ E sega ni via vakarusai ira, e sega ni biuti ira tani mai matana me yacova mai na siga qo.
24 Ni mate o Tui Eseli e Siria, e tui sara o Penietati na luvena me sosomitaki koya.
25 E mani taura lesu o Joasi na luvei Jioasi mai na liga i Penietati na luvei Eseli na koro kece a taura mai na liga i Jioasi na tamana ena ivalu. A ravuti* koya vakatolu o Joasi+ qai taura tale na koro kece e Isireli.
iVakamacala e ra
^ Oya ena vakacegu kei na sautu.
^ Raica na iVakamacala ni Vosa.
^ Ipe., “E muria tiko ga o koya.”
^ Ipe., “muria.”
^ Oya o Jerepoami na iKarua.
^ Se “veivakabulai.”
^ Se “na veivakabulai me ravuti.”
^ Se “vakadrukai.”
^ Ipe., “itekitekivu ni yabaki,” kena irairai ena vulaitubutubu.
^ Se “vakadrukai koya.”
