Jeremaia 44:1-30
44 Na vosa e tukuni vei Jeremaia me baleti ira kece na Jiu era tiko ena vanua o Ijipita,+ o ira na tiko e Mikitoli,+ e Tapenesi,+ e Nofi,*+ kei na vanua o Pacirosi:+
2 “Qo na ka e kaya o Jiova ni lewe vuqa,* na Kalou ni Isireli: ‘Oni sa raica na ca kece au kauta yani e Jerusalemi+ kei na koro kece e Juta, sa rusa tu nikua, e sega tale ga ni dua e tiko kina.+
3 Ena vuku ni itovo ca era vakayacora mera vakacudrui au kina nira lai vakacaboisoro+ mera qarava na kalou tani era sega ni kila, o kemuni se o ira na tukamuni.+
4 Au talai ira tiko ga yani vei kemuni na noqu dauveiqaravi kece na parofita, au talai ira wasoma* yani, au kaya: “Yalovinaka, moni kua ni cakava na itovo vakasevaki qo au cata.”+
5 Ia era sega ni rogoca se vakatudaliga mera biuta na nodra itovo ca mera kua ni vakacaboisoro vei ira na kalou tani.+
6 Au mani sova na noqu cudru levu kei na noqu rarawa qai waqa ena koro e Juta kei na gaunisala e Jerusalemi, e rusa kina qai lala tu me vaka nikua.’+
7 “Qo na ka e kaya o Jiova na Kalou ni lewe vuqa, na Kalou ni Isireli, ‘Na cava oni vakavuna kina me yacovi kemuni na leqa levu qo, ena mate kece kina na tagane kei na yalewa, na gone kei na gonedramidrami e Juta, me sega ni dua e vo vei kemuni?
8 Na cava oni vakacudrui au kina ena cakacaka ni ligamuni ni oni vakacaboisoro vei ira na kalou tani ena vanua o Ijipita, oni sa mai tiko kina? Oni na rusa, oni na cudruvi oni na beci ena veivanua kece e vuravura.+
9 Oni sa guilecava na nodra caka ca na tukamuni, na nodra caka ca na tui Juta+ kei na caka ca nei watidra,+ kei na nomuni caka ca kei na caka ca nei watimuni+ oni vakayacora ena vanua o Juta kei na gaunisala e Jerusalemi?
10 Me yacova mai na siga qo era sega ni yalomalumalumu, era vakaraitaka nira sega ni doka,+ se muria na noqu lawa kei na noqu lewa au solia vei kemuni kei ira na tukamuni.’+
11 “O koya gona qo na ka e tukuna o Jiova ni lewe vuqa, na Kalou ni Isireli, ‘Au nakita meu kauta mai na ca vei kemuni, meu vakarusai ira kece na Juta.
12 Au na kauti ira na ivovo ni Juta era nakita mera lako ina vanua o Ijipita mera tiko kina, era na mate kece ena vanua o Ijipita.+ Era na bale ena iseleiwau, era na mate ena viakana, me tekivu vei ira na tamata wale me yacovi ira na turaga, era na mate ena iseleiwau kei na viakana. Era na vosavakacacataki, era na domobulataki, era na cudruvi, era na beci.+
13 Au na totogitaki ira na tiko ena vanua o Ijipita me vaka na noqu totogitaki Jerusalemi ena iseleiwau, ena viakana, kei na matedewa.+
14 O ira na ivovo ni Juta era lai tiko ena vanua o Ijipita era na sega ni dro se bula mera lesu ina vanua o Juta. Era na diva mera lesu mera tiko e kea, ia era na sega ni lesu, o ira ga na le vica era dro bula.’”
15 O ira kece na tagane era kila nira vakacaboisoro tiko na watidra vei ira na kalou tani, o ira kece na watidra era duri tu, e dua na ilala levu, kei ira kece na tiko ena vanua o Ijipita+ mai Pacirosi,+ era kaya vei Jeremaia:
16 “Keimami na sega ni rogoca na vosa o tukuna vei keimami ena yaca i Jiova.
17 Keimami na vakayacora ga na vosa kece e tukuna na gusu i keimami, me keimami vakacaboisoro vua na Ranadi ni Lomalagi,* me keimami livia tale ga vua na isoro livi+ me vaka keimami cakava, era cakava na tukai keimami, na neimami tui, kei ira na neimami turaga ena koro e Juta kei na gaunisala e Jerusalemi ni keimami mamau ena madrai, keimami vutuniyau, keimami sega sara ga ni raica na ka ca.
18 Ena gauna keimami sega ni vakacaboisoro kina vua na Ranadi ni Lomalagi* se livia vua na isoro livi, keimami dravudravua sara ga, keimami mate ena iseleiwau kei na viakana.”
19 Era kaya tale na yalewa: “Ni keimami vakacaboisoro vua na Ranadi ni Lomalagi* se livia vua na isoro livi, era vakadonuya na wati keimami me keimami bulia na isoro keke me vaka na kena ibulibuli, me keimami livia tale ga vua na isoro livi.”
20 E mani tukuna o Jeremaia vei ira kece na tamata, vei ira na tagane kei na watidra, kei ira kece na vosa vua:
21 “Na isoro oni cabora o kemuni, o ira na tukamuni, o ira na nomuni tui, na nomuni turaga, kei ira na lewenivanua ena koro e Juta kei na gaunisala e Jerusalemi,+ e nanuma vinaka tu o Jiova qai katona e lomana!
22 Ia e sega ni vosota rawa o Jiova na ca ni nomuni ivalavala kei na ka vakasevaki oni vakayacora, e vakarusai kina na nomuni vanua, e domobulataki qai cudruvi, e sega ni dua e tiko kina me vaka nikua.+
23 Ena vuku ni nomuni vakacaboisoro, oni valavala ca kina vei Jiova ni oni sega ni rogoca na vosa i Jiova moni muria na nona lawa, na nona lewa kei na nona veivakadreti, oya na vuna e yacovi kemuni kina na ca qo me vaka ena siga qo.”+
24 E vosa tale o Jeremaia vei ira kece na tamata kei ira kece na yalewa: “Moni rogoca na vosa i Jiova o kemuni kece na Juta oni tiko ena vanua o Ijipita.
25 Qo na ka e kaya o Jiova ni lewe vuqa, na Kalou ni Isireli, ‘Na ka oni tukuna o kemuni kei na watimuni e gusumuni, oni vakayacora e ligamuni, oni kaya: “Keimami na vakayacora dina na neimami yalayala me keimami vakacaboisoro vua na Ranadi ni Lomalagi,* me keimami livia tale ga vua na isoro livi.”+ Oni na vakayacora dina na yalewa na nomuni yalayala, oni na cakava na ka oni yalataka.’
26 “Ia moni rogoca na vosa i Jiova o kemuni kece na Juta oni tiko ena vanua o Ijipita: ‘“Au bubului ena yacaqu lagilagi,” e kaya o Jiova, “ni na sega ni cavuta tale na yacaqu e dua na Juta+ ena vanua taucoko o Ijipita, me kaya, ‘Ni bula dina tiko na Turaga Cecere Duadua o Jiova!’+
27 Au na raica tiko me yacovi ira na ca, mera kua ni vinaka,+ era na mate kece na Juta era tiko ena vanua o Ijipita ena iseleiwau kei na viakana mera oti vakadua.+
28 E vica ga era na drovaka na iseleiwau, era na lesu mai na vanua o Ijipita mera lako i Juta.+ Era na qai kila o ira kece na ivovo ni Juta era lai tiko ena vanua o Ijipita na vosa i cei e dina, na noqu se na nodra!”’”
29 “‘Qo na kena ivakatakilakila vei kemuni,’ e kaya o Jiova, ‘niu na totogitaki kemuni ena vanua qo, moni kila ni na yaco dina na noqu vosa ni yalayala moni ca kina.
30 Qo na ka e kaya o Jiova: “Au na soli Fero Ofira, na tui Ijipita e ligadra na kena meca kei ira na via vakamatei koya,* me vaka na noqu soli Tui Setekaia e Juta e liga i Tui Nepukanesa* e Papiloni, na kena meca, o koya e via vakamatei koya tiko.”’”*+
iVakamacala e ra
^ Se “Memifise.”
^ Qo na mataivalu vakalomalagi.
^ Ipe., “yadra vakamataka meu talai ira.”
^ Na icavuti ni kalou yalewa era sokaloutaka na Isireli vukitani, de kalou yalewa ni vakatubukawa.
^ Na icavuti ni kalou yalewa era sokaloutaka na Isireli vukitani, de kalou yalewa ni vakatubukawa.
^ Na icavuti ni kalou yalewa era sokaloutaka na Isireli vukitani, de kalou yalewa ni vakatubukawa.
^ Na icavuti ni kalou yalewa era sokaloutaka na Isireli vukitani, de kalou yalewa ni vakatubukawa.
^ Se “via vaqarai koya.”
^ Ipe., “Nepukatiresa,” e dua tale na kena ivolavolai.
^ Se “via vaqarai koya tiko.”
