Jona 4:1-11
4 Ia e sega sara ga ni taleitaka qori o Jona, dua na ka na nona cudru katakata.
2 E mani masu vei Jiova: “Oilei kemuni Jiova, qo na ka au a tukuna tiko niu se tiko ena noqu vanua, se sega? Oya na vuna au dro kina i Tasisi+ ena imatai ni gauna, niu kila ni oni Kalou yalovinaka, oni dauloloma, oni berabera ni cudru, e dei vakalevu na nomuni loloma,+ oni rarawataka na ca.
3 Ia qo kemuni Jiova, yalovinaka moni kauta tani na noqu bula, e vinaka meu mate e ca meu bula.”+
4 E taroga o Jiova: “E dodonu mo cudru vakalevu?”
5 E biuta sara na koro o Jona me lai dabe toka ena yasa ni koro ena tokalau. E tara e kea e dua na nona vale tabanikau me vakaruru toka e loma, me raica na ka ena yacova na koro.+
6 E qai vakarautaka na Kalou o Jiova e dua na vunivago* me tubu siviti Jona me vakaruguta na uluna, me vakaceguya na nona rarawa. E taleitaka vakalevu o Jona na vunivago.
7 Ia ni kida na mataka ena siga tarava, e tala na Kalou dina e dua na nuve me kania na vunivago mani malai.
8 Ni cila na siga, e vakaliwava tale ga na Kalou na cagi katakata na tokalau, e katia na ulu i Jona na siga, e voleka sara ni rebo. E kerea tiko ga me mate, e kaya tiko ga: “E vinaka meu mate e ca meu bula.”+
9 E tarogi Jona na Kalou: “E dodonu mo cudruvaka vakalevu na vunivago?”+
E sauma o Jona: “E donu vinaka na noqu cudru, au cudru vakalevu niu via mate sara ga.”
10 Ia e kaya o Jiova: “O lomana na vunivago o sega ni oca kina se vakatubura, e tubu ga ena dua na bogi, e mate tale ena dua na bogi.
11 Meu kua ni lomani Ninive na koro vakaitamera+ era tiko kina e 120,000 vakacaca na lewenivanua, era sega mada ga ni kila na ka e donu mai na ka e cala* qai levu na nodra manumanu?”+
iVakamacala e ra
^ Se rawa ni, “bele ni veikau.”
^ Se “kila na ligadra imatau mai na ligadra imawi.”
