Josua 17:1-18
17 E vakawirimadigitaki+ na nodra ivotavota na yavusa na Manasa+ ni ulumatua nei Josefa.+ Ni tamataivalu o Mekiri+ na ulumatua nei Manasa na tamai Kiliati, e taukeni Kiliati kina kei Pasani.+
2 E vakawirimadigitaki na nodra ivotavota na vo ni kawa nei Manasa me vaka na nodra vuvale, o ira na luvei* Epieseri,+ o ira na luvei Eleki, o ira na luvei Esirieli, o ira na luvei Sikemi, o ira na luvei Eferi, kei ira na luvei Simita. Qori o ira na kawa nei Manasa na luvei Josefa, o ira na tagane me vaka na nodra vuvale.+
3 Ia o Silofati+ na luvei Eferi, na luvei Kiliati, na luvei Mekiri, na luvei Manasa e sega na luvena tagane, e vakaluveni yalewa ga. Qo na yacadratou na luvena yalewa: o Mala, o Noa, o Okila, o Milika, kei Tirisa.
4 Eratou lako sara yani vei Eliesa+ na bete, vei Josua na luvei Nuni, kei ira na turaga, eratou kaya: “O Jiova ga e vakaroti Mosese me solia vei keitou e dua na ivotavota vei ira na wekai keitou.”+ Io ena ivakaro i Jiova e mani solia o koya vei ratou e dua na ivotavota mai vei ira na wekai tamadratou.+
5 E tini tale ga na ivotavota e lutu vei ira na Manasa, e sega ni wili kina na vanua o Kiliati kei Pasani ena tai* ni Joritani,+
6 ni dua na nodra ivotavota na luvei Manasa era yalewa vata kei ira na luvena tagane, era taukena na vanua o Kiliati na vo ni kawa i Manasa.
7 Na iyala ni vanua nei Manasa e tekivu mai Aseri me yaco i Mikimica+ donui Sikemi,+ e toso na iyala ni vanua ina ceva* ena nodra vanua na lewe i Enitapua.
8 E nei Manasa na vanua o Tapua,+ ia o Tapua ena iyala ni vanua i Manasa era taukena na kawa nei Ifireimi.
9 E toso sobu na iyala ni vanua ina Waimaca o Kana, ena ceva ni waimaca. E tiko na nodra koro na Ifireimi ena koro nei Manasa,+ e toka ena vualiku ni waimaca na iyala ni vanua i Manasa qai yala e waitui.+
10 Ina ceva e nei Ifireimi, ina vualiku e nei Manasa, na waitui na iyala ni nona vanua,+ ena vualiku e* yaco i Aseri, ena tokalau e yaco i Isakari.
11 Ena vanua o Isakari kei Aseri e soli vei Manasa o Pecisiani kei na kena tauni lalai,* o Ipiliami+ kei na kena tauni lalai, o ira na lewe i Doa+ kei na kena tauni lalai, o ira na lewe i Edoa+ kei na kena tauni lalai, o ira na lewe i Tenaki+ kei na kena tauni lalai, kei ira na lewe i Mekito kei na kena tauni lalai, e tolu na delana.
12 Ia era sega ni taukena rawa na koro qori na kawa nei Manasa, nira sega ni via biuta na vanua qo na kai Kenani.+
13 Nira tubu mera kaukaua na Isireli, era vakavorakitaki ira na kai Kenani mera cakacaka wale,+ ia era sega ni cemuri ira vakadua.+
14 Era kaya vei Josua o ira na kawa nei Josefa: “Na cava o solia ga kina vei keimami* e dua na ivotavota+ kei na dua ga na tikina? Keimami lewe levu sara, ni vakalougatataki keimami tiko o Jiova me yacova mai qo.”+
15 E kaya vei ira o Josua: “Ke oni lewe levu sara, moni lako cake i veikau moni samaka e dua na vanua me nomuni ena nodra vanua na Perisaiti+ kei ira na Refeimi,+ ni sa lailai vei kemuni na veiulunivanua o Ifireimi.”+
16 Era kaya na kawa nei Josefa: “E sega ni rauti keimami na veiulunivanua, o ira kece na kai Kenani era tiko ena Buca e vakaisele takelo na nodra qiqinivalu,*+ oya o ira na tiko e Pecisiani+ kei na kena tauni lalai,* kei ira na tiko ena Buca e Jesirieli.”+
17 E mani tukuna qo o Josua vei ira na vuvale i Josefa, vei Ifireimi kei Manasa: “Oni sa lewe levu sara, oni kaukaua vakalevu. Ena sega ni dua ga na nomuni ivotavota,+
18 ena nomuni tale ga na veiulunivanua.+ E veikau tu ia moni samaka me nomuni iyalayala ni vanua. E vakaisele takelo na nodra qiqinivalu* na kai Kenani ra qai kaukaua, ia oni na cemuri ira tani.”+
iVakamacala e ra
^ Ipe., “luvena tagane.”
^ Oya ena tokalau.
^ Ipe., “imatau.”
^ Oya o ira na Manasa se na vanua nei Manasa.
^ Se “wavokita.”
^ Ipe., “au.”
^ Ipe., “qiqinivalu kaukamea.”
^ Se “wavokita.”
^ Ipe., “qiqinivalu kaukamea.”
