1 Timɔtée 5:1-25
5 Ma nɔ gbɛ́ nǔ nú súnnu mɛxómɔ ɖé syɛ́nsyɛ́n ó. É nyɔ́ wa ɔ, nɔ sa vo n’i lěe a ná wa gbɔn nú tɔ́ towe é ɖɔhun, bo nɔ sa vo nú dɔ̌nkpɛvú lɛ́ lěe a ná wa gbɔn nú nɔví towe súnnu lɛ́ é ɖɔhun.
2 Nɔ sa vo nú nyɔ̌nu mɛxómɔ lɛ́ lěe a ná wa gbɔn nú nɔ towe é ɖɔhun, bo nɔ sa vo nú ɖyɔ̌vǐ lɛ́ lěe a ná wa gbɔn nú nɔví towe nyɔ̌nu lɛ́ é ɖɔhun, kpó ayi mímɛ́ kpó.
3 Nɔ wlí yɛ̌yi nú asúkúsi ɖěɖěe nyí asúkúsi nǔgbó nǔgbó lɛ́ é.*
4 Amɔ̌, ényí asúkúsi ɖěbǔ ɖó vǐ alǒ vǐvú hǔn, yědɛɛ lɛ́ ní tó kplɔ́n bo nɔ ɖe xlɛ́ ɖɔ émí ɖo gbejí nú Mawu ɖo xwédo yěɖésúnɔ tɔn mɛ hwɛ̌, lobo nɔ sú axɔ́ e yě ɖu dó mɛjitɔ́ yětɔn lɛ́, kpó mɛjitɔ́ yětɔn lɛ́ sín mɛjitɔ́ lɛ́ kpó lɛ́ é yě, ɖó nǔ e nɔ nyɔ́ Mawu nukúnmɛ é nɛ́.
5 Din ɔ, nyɔ̌nu e nyí asúkúsi nǔgbó nǔgbó, bo ma ɖó mɛɖé ǎ é nɔ sɔ́ nukúnɖíɖó tɔn ɖó Mawu jí; é nɔ ɖo vo sa nú Mawu wɛ, bo nɔ lɛ́ ɖo ɖɛ xo wɛ zǎn kéze.
6 Amɔ̌, asúkúsi e jó éɖée dó nú gbɛɖuɖu é kpo ɖo gbɛ có, é ko kú.
7 Énɛ́ wú ɔ, kpo ɖo wě énɛ́ lɛ́ ɖe xá mɛ wɛ,* bónú è ma wá mɔ nǔ ɖě ɖɔ dó mɛɖé wú ó.
8 Nǔgbó ɔ, ényí mɛ ɖěbǔ ma nɔ kpé nukún dó mɛ tɔn lɛ́ wú ǎ ɔ, ɖo tají ɔ, mɛ e nyí xwédo tɔn sín hǎgbɛ́ lɛ́ é wú ǎ ɔ, mɛ énɛ́ gbɛ́ nǔɖiɖi ɔ, bo lɛ́ nylá hú nǔmaɖitɔ́.
9 É hwe bǐ ɔ, xwe 60 wɛ asúkúsi ɖé ɖó ná ɖó cóbɔ è ná lɛ́n ɛ dó asúkúsi lɛ́ mɛ; asú ɖokpó jɛ́n é ɖó ná da kpɔ́n.
10 È ɖó ná tuun i dó tuun mɛ e nɔ wa azɔ̌ ɖagbe lɛ́ é, é ɖó ná ko kplɔ́n vǐ kpɔ́n, é ɖó ná ko nɔ yí mɛ kpɔ́n, é ɖó ná ko nɔ klɔ́ afɔ nú mɛ mímɛ́ lɛ́ kpɔ́n, é ɖó ná ko nɔ d’alɔ mɛ e ɖo wǔvɛ́ se wɛ lɛ́ é kpɔ́n, é ɖó ná ko nɔ sɔ́ éɖée jó dó azɔ̌ ɖagbe bǐ tamɛ kpɔ́n.
11 Ðo alɔ ɖěvo mɛ ɔ, ma xa asúkúsi wínnyáwínnyá lɛ́ dó asúkúsi lɛ́ mɛ ó, ɖó ényí jlǒ xóɖóxámɛ tɔn yětɔn wá húzú afɔklɛ́nnú ɖo yě kpó Klísu kpó tɛ́ntin ɔ, alɔwlíwlí nɔ jló yě.
12 Yě ná dɔn hwɛɖónúmɛ dó yěɖée jí, ɖó yě jó akpá e yě dó ɖ’ayǐ é* dó wútu.
13 Hwe ɖokpó ɔ nu ɔ, yě nɔ lɛ́ gbɛ́ nǔ wa, bo nɔ ɖo xwé xa ɖó afɔ wú wɛ; ɛɛn, é nyí nǔ wa kɛ́ɖɛ́ wɛ yě gbɛ́ ǎ, loɔ, yě lɛ́ húzú mɛnúɖɔtɔ́, bo nɔ ɖo nu dó mɛɖévoxó mɛ wɛ, lobo nɔ ɖo xó e yě ma ɖó ná ɖɔ ǎ lɛ́ é ɖɔ wɛ.
14 Énɛ́ wú ɔ, un jló ɖɔ asúkúsi wínnyáwínnyá lɛ́ ní wlí alɔ, yě ní ji vǐ, yě ní kpé nukún dó xwédo yětɔn wú, yě ní ma hun ali ɖěbǔ nú gbeklánxámɛtɔ́ lɛ́, bónú yě ní mɔ xó ɖɔ dó mǐ wú ó.
15 Nǔgbó ɔ, yě mɛ ɖé lɛ́ ko jó nǔgbó ɔ dó bo xwedó Satáan.
16 Ényí nyɔ̌nu nǔɖitɔ́ ɖěbǔ sín hɛ̌nnumɔ lɛ́ nyí asúkúsi hǔn, mi nú é ní kpé nukún dó yě wú, bónú è ma wá dó agban nú agun ɔ ó; énɛ́ ɔ, agun ɔ sixú kpé nukún dó mɛ e nyí asúkúsi nǔgbó nǔgbó lɛ́ é* wú.
17 Mɛxó agun tɔn e nɔ xlɛ́ ali agun ɔ ganjí lɛ́ é ɔ, mi nú è ní kpɔ́n yě dó mɔ mɛ e jɛxá yɛ̌yi weɖobǔ lɛ́ é, ɖo tají ɔ, yě mɛ ɖěɖěe nɔ w’azɔ̌ syɛ́nsyɛ́n ɖo xóɖiɖɔ kpó mɛkplɔ́nkplɔ́n kpó mɛ lɛ́ é.
18 Ðó nǔwlánwlán mímɛ́ ɔ ɖɔ: “A ɖó ná dó aja nu nú nyibú e ɖo nǔkún só wɛ é ǎ,” é lɛ́ ɖɔ: “Azɔ̌watɔ́ jɛxá azɔ̌kwɛ́ tɔn.”
19 Ma yí gbe nú hwɛ e è dó súnnu mɛxómɔ* ɖé é ó, afi nú a ɖó kúnnuɖiɖe mɛ we alǒ mɛ atɔn tɔn ɔ nɛ́.
20 Gbɛ̌ nǔ nú mɛ e nɔ fɔ́n bo nɔ ɖo hwɛ hu wɛ lɛ́ é ɖo mɛ bǐ nukɔn, bónú é ní nyí akpágbanúmɛ nú mɛ e kpo lɛ́ é.*
21 Un ɖe gbe nú we dó nǔjɔnǔ mɛ ɖo Mawu, Klísu Jezu kpó wɛnsagun e è cyán lɛ́ é kpó nukɔn ɖɔ a ní xwedó wěɖexámɛ énɛ́ lɛ́; ma ka ɖó linlin agɔ dó mɛɖé wú, alǒ ɖe mɛɖé ɖó vo ɖo mɛɖé mɛ dó wa mɔ̌ ó.
22 Ma yá wǔ sɔ́ alɔ ɖó súnnu ɖěbǔ jí gbeɖé ó;* ma ɖ’alɔ ɖo hwɛ mɛ ɖěvo lɛ́ tɔn lɛ́ mɛ ó; hɛn hwiɖée ɖó mǐmɛ́ jí.
23 Ma sɔ́ nɔ nu sin ɖě ó,* loɔ, nɔ nu vɛ̌ɛn kpɛɖé kpɛɖé, ɖó xomɛzɔn towe kpó azɔn e jɛ wɛ a nɔ ɖe hwɛhwɛ lɛ́ é kpó wú.
24 Mɛɖé lɛ́ tíin bɔ hwɛ e yě hu lɛ́ é nɔ jɛ wě gannaganna, bɔ è nɔ ɖɔ hwɛ xá yě tlɔlɔ, amɔ̌, mɛ ɖěvo lɛ́ tíin bɔ nukɔnmɛ wɛ hwɛ yědɛɛ lɛ́ tɔn lɛ́ nɔ jɛ wě.
25 Mɔ̌ ɖokpó ɔ, azɔ̌ ɖagbe lɛ́ lɔ nɔ jɛ wě gannaganna, bɔ ɖěɖěe ma nyí mɔ̌ ǎ lɛ́ é lɔ sixú nɔ hwlǎhwlá ǎ.
Tínmɛ e ɖo do lɛ́ é
^ Alǒ “asúkúsi ɖěɖěe ɖo hudó mɛ nǔgbó nǔgbó lɛ́ é”; énɛ́ wɛ nyí, ɖěɖěe ma ɖó mɛɖé bónú é ná d’alɔ yě ǎ lɛ́ é.
^ Alǒ “ɖo gbe énɛ́ lɛ́ ɖe wɛ.”
^ Blǔju tɔn, “nǔɖiɖi nukɔntɔn ɔ.”
^ Alǒ “asúkúsi ɖěɖěe ɖo hudó mɛ nǔgbó nǔgbó lɛ́ é”; énɛ́ wɛ nyí, ɖěɖěe ma ɖó mɛɖé bónú é ná d’alɔ yě ǎ lɛ́ é.
^ Alǒ “mɛxó agun tɔn.”
^ Blǔju tɔn, “bónú mɛ e kpo lɛ́ é ní dó sixú ɖi xɛsi.”
^ Énɛ́ wɛ nyí, ma yá wǔ sɔ́ súnnu ɖěbǔ ó.
^ Alǒ “Ma sɔ́ nɔ nu sin kɛ́ɖɛ́ ɖě ó.”
