NIKASEMƆ 8
Yosia Bɔ Nanemɛi Kpakpai
Ani osusuɔ akɛ ewa akɛ aaafee nɔ ni ja?— Mɛi babaoo susuɔ akɛ ewa. Biblia lɛ kɛɔ wɔ akɛ no mli lɛ ewa waa kɛha gbekɛ nuu ko ni atsɛɔ lɛ Yosia lɛ akɛ ebaafee nɔ ni ja. Shi ená nanemɛi kpakpai ni wa lɛ. Ha wɔkase Yosia kɛ enanemɛi lɛ ahe nii.
Yuda maŋtsɛ ko ni atsɛɔ lɛ Amon lɛ ji Yosia papa. Amon fee efɔŋ waa, ni eja amagai. Beni Amon gbo lɛ, Yosia batsɔ Yuda maŋtsɛ. Shi no mli lɛ eye afii kpaanyɔ pɛ! Ani osusuɔ akɛ efee ehe gbɔmɔ fɔŋ tamɔ epapa?— Dabi, efeee nakai!
Zefania bɔ Yudabii lɛ kɔkɔ akɛ amɛkpa amagai lɛ ajamɔ
Beni Yosia ji gbekɛ bibioo po lɛ, eesumɔ akɛ ebo Yehowa toi. No hewɔ lɛ, ekɛ mɛi ni sumɔɔ Yehowa lɛ pɛ ni bɔ naanyo. Ni amɛye amɛbua Yosia ní efee nɔ ni ja. Namɛi ji Yosia nanemɛi lɛ ateŋ mɛi komɛi?
Enanemɛi lɛ ateŋ mɔ kome ji Zefania. Zefania ji gbalɔ, ni ebɔ Yudabii lɛ kɔkɔ akɛ kɛ́ amɛkpaaa amagai lɛ ajamɔ lɛ, nibii fɔji baaba amɛnɔ. Yosia bo Zefania toi ni eja Yehowa, shi jeee amagai.
Yosia naanyo kroko hu ji Yeremia. Tipɛŋfoi ji amɛ, ni amɛhi akutso kome mli kɛjɛ amɛgbekɛbiiashi. Bɔ ni amɛnaanyobɔɔ lɛ mli wa ha hewɔ lɛ, beni Yosia gbo lɛ, Yeremia fo lala fɛfɛo ko ni ekɛtsɔɔ akɛ ehiɛ etse lɛ waa. Yeremia kɛ Yosia ye amɛbua amɛhe koni amɛfee nɔ ni ja ni amɛbo Yehowa toi.
Yosia kɛ Yeremia ye amɛbua amɛhe koni amɛfee nɔ ni ja
Mɛni okaseɔ kɛjɛɔ Yosia nɔkwɛmɔnɔ lɛ mli?— Beni Yosia ji gbekɛ bibioo po lɛ, eesumɔ ni efee nɔ ni ja. Ele akɛ esa akɛ ekɛ mɛi ni sumɔɔ Yehowa abɔ naanyo. Kɛ́ oohala nanemɛi lɛ, kwɛmɔ ni ohala mɛi ni sumɔɔ Yehowa ni baawa bo ni ofee nɔ ni ja!
KANEMƆ YƐ OBIBLIA LƐ MLI
Ekolɛ Obaasumɔ Enɛ Hu
MI-WOLO NI GBAA BIBLIA MLI SAJI
Israel Naagbee Maŋtsɛ Kpakpa
Be ni Yosia ji oblanyo fioo lɛ, efee nɔ ko ni biɔ ekãa waa.
