Suɔmɔ Nyɛmimɛi:

Yɛ afii 600 D.Ŋ.B. afii lɛ amli lɛ, ajie ninaa ko ni sa kadimɔ waa kpo atsɔɔ gbalɔ Ezekiel. Ena shwiili ko ni da waa ní jeŋ muu fɛɛ Nɔyelɔ lɛ miikudɔ. Nɔ ni sa kadimɔ waa yɛ shwiili lɛ he ji bɔ ni ehiɛɔ foi lɛ. Ehiɛɔ foi tamɔ srawa gbamɔ, ni kɛ́ eetsake gbɛ ni enyiɛ nɔ lɛ po lɛ, efeɔ nakai ni ebaaa foi ni ehiɛ lɛ shi loo ni ebaatsɔ ehe dã!​—Ezek. 1:4, 9, 12, 14, 16-27.

Nakai ninaa lɛ kaiɔ wɔ akɛ, Yehowa jeŋ muu fɛɛ gbɛjianɔtoo lɛ fã ni yɔɔ ŋwɛi lɛ miiya ehiɛ be fɛɛ be. Ni egbɛjianɔtoo lɛ fã ni yɔɔ shikpɔŋ lɛ nɔ lɛ hu? Nyɛsɛɛ sɔɔmɔ afi lɛ ehã wɔna faŋŋ akɛ, Yehowa miikudɔ ewebii ni eto amɛhe gbɛjianɔ ni yɔɔ shikpɔŋ lɛ nɔ lɛ, ni amɛ hu amɛmiiya amɛhiɛ waa diɛŋtsɛ!

Yɛ biɛ yɛ United States lɛ, Betel weku lɛ mli bii lɛ ateŋ mɛi komɛi ahiɛ edɔ kɛmiishi Brooklyn kɛmiiya asafo lɛ jeŋ muu fɛɛ nitsumɔhe yitso hee ni yɔɔ Warwick, yɛ New York lɛ, ni mɛi komɛi hu miishi kɛmiiya asafo lɛ nitsumɔhei krokomɛi, ni mɛi komɛi hu sɔmɔɔɔ yɛ Betel dɔŋŋ. Betelbii ni yɔɔ nitsumɔhe niji krokomɛi ni yɔɔ je lɛŋ fɛɛ lɛ hu ateŋ mɛi komɛi miimamɔ tsũi, ni amɛteŋ mɛi komɛi miisaasai tsũi. Aafee nitsumɔhe niji komɛi hu ekome, ni aajie nitsumɔhei lɛ ekomɛi hu kɛmiiya hei krokomɛi. Ni bo hu? Kɛ́ oshiko he ni oyɔɔ lɛ kɛyako he kroko po lɛ, ŋwanejee ko bɛ he akɛ, bo hu oofee tsakemɔi yɛ gbɛi srɔtoi anɔ.

Nyɔŋmɔ webii ni yɔɔ jeŋ fɛɛ lɛ ahiɛ edɔ yɛ sɔɔmɔ nitsumɔ lɛ mli fe bei fɛɛ ni eho, ni amɛkɛ Yehowa gbɛjianɔtoo ní miiya ehiɛ lɛ efee ekome, ni enɛ hãa Gbɛtsɔɔmɔ Kuu lɛ náa miishɛɛ waa, ni ewoɔ amɛ hewalɛ. Mɛi babaoo eshi kɛtee hei ni shiɛlɔi ahe hiaa waa yɛ. Mɛi komɛi hu elɛɛ amɛsɔɔmɔ nitsumɔ lɛ mli yɛ gbɛi srɔtoi anɔ, tamɔ wiemɔ hee ni amɛkaseɔ koni amɛyaye amɛbua yɛ asafoi ni awieɔ nakai wiemɔ lɛ yɛ mli lɛ amli nɛkɛ. Mɛi babaoo eka odaseyeli gbɛ ko ni amɛtsɔko nɔ amɛyeko odase dã loo amɛhe esako yɛ mli lɛ amɛkwɛ. Mɛi babaoo hu elɛɛ amɛsɔɔmɔ lɛ mli yɛ gbɛi krokomɛi anɔ. Agbɛnɛ hu, anɔkwa Kristofoi fɛɛ, ní mɛi ni edara yɛ afii amli kɛ mɛi ni bɛ gbɔmɔtsoŋ hewalɛ lɛ fata he lɛ, kɛ anɔkwayeli miidá wala he foi lɛ​—amɛmiiya amɛhiɛ yɛ Yehowa sɔɔmɔ lɛ mli, ni amɛmiiye amɛmiibua kɛmiikpá Satan, ni ji amalelɔ lɛ he mama!​—1 Kor. 9:24.

Ná nɔmimaa akɛ, Yehowa hiɛ kpaŋ hekɛafɔleshaa mumɔ ni ojieɔ lɛ kpo lɛ nɔ. (Heb. 6:10) Nyɛsuɔmɔ mli ni nyɛjɛɔ nyɛsɔmɔɔ Nyɔŋmɔ lɛ hãa wɔkaiɔ Abraham kɛ Sara. Be ni Abraham eye aaafee afii 70 lɛ, ekɛ eweku lɛ shi Kaldeabii amaŋtiase ni ji Ur lɛ kɛtee Kanaan, ni eyahi bui amli yɛ jɛmɛ afii 100. Mɛɛ hekɛafɔleshaa mumɔ po ekɛ eŋa lɛ jie  lɛ kpo nɛkɛ!​—1 Mose 11:31; Bɔf. 7:2, 3.

Ani oojie hekɛafɔleshaa mumɔ ni tamɔ nakai kpo? Nyɛ mɛi fɛɛ ni nyɛmiimia nyɛhiɛ kɛmiikpee jaramɔ shihilɛi anaa lɛ miifee nɔ ni Yesu kɛɛ wɔfee lɛ. Ekɛɛ akɛ: “Nyɛyaa nyɛyafea mɛi ni jɛ jeŋmaji lɛ fɛɛ mli lɛ kaselɔi, nyɛbaptisia amɛ yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli.”​—Mat. 28:19.

Yesu wiemɔ akɛ “nyɛyaa” lɛ tsɔɔ akɛ, esa akɛ wɔya wɔhiɛ, ni wɔfee ekãa. Kɛ́ wɔkwɛ nɔ ni Kristo sɛɛnyiɛlɔi ni yɔɔ ekãa lɛ tsu yɛ nyɛsɛɛ sɔɔmɔ afi lɛ mli lɛ, wɔmii shɛɔ wɔhe waa! Wɔmiina faŋŋ akɛ, Yehowa nine kpele lɛ yɛ nitsumɔ ni atsuɔ kɛgbɛɔ Maŋtsɛyeli lɛ he sane kpakpa lɛ ashwaa yɛ jeŋ fɛɛ lɛ mli, ni eejɔɔ nɔ.​—Mar. 13:10.

Mɛi babaoo miibo sane kpakpa lɛ toi. Yɛ sɔɔmɔ afi ni ho lɛ mli lɛ, shiɛlɔi ayifalɛ yashɛ 8,340,847, ni kɛ́ aja mli lɛ, daa nyɔɔŋ lɛ, Biblia mli nikasemɔi ni afee ji 10,115,264. Eji anɔkwale akɛ, Yehowa shwiili lɛ miiya ehiɛ, ni nakai nɔŋŋ eji yɛ bo hu ogbɛfaŋ! Yaa nɔ okɛ ekãa atsu nitsumɔ kpakpa ni otsuɔ lɛ, ejaakɛ etsɛŋ ni be ni Yehowa kɛbaahere mɛi ayiwala lɛ baaho.

Afi 2017 afi ŋmalɛ lɛ ji, ‘Okɛ ohiɛ afɔ̃ Yehowa nɔ, ní ofee ekpakpa.’ (Lala 37:3) Kwɛ bɔ ni ŋmalɛ nɛɛ sa jogbaŋŋ! Kɛ́ ofee ekpakpa, kɛtsɔ sɔɔmɔ krɔŋŋ ni okɛbaahã Yehowa lɛ nɔ lɛ, etsɔɔ akɛ okɛ ohiɛ miifɔ̃ enɔ. Ofainɛ, hã ehi ojwɛŋmɔŋ akɛ, mɔ ko yɛ ni fiɔ osɛɛ be fɛɛ be. Yesu wie akɛ: “Naa! mikɛ nyɛ yɛ gbii lɛ fɛɛ kɛyashi shihilɛ gbɛjianɔtoo lɛ naagbee.” Wiemɔi nɛɛ baaba mli anɔkwale yɛ ogbɛfaŋ.​—Mat. 28:20.

Ná nɔmimaa akɛ, Yehowa baaya nɔ ejɔɔ anɔkwayeli mli ni ojɛɔ osɔmɔɔ lɛ lɛ nɔ. Kɛ́ onia ni otsuɔ lɛ fa jio, efaaa jio lɛ, nɔ ni Yehowa kpaa gbɛ ji akɛ, nɔ ni otsuɔ lɛ jɛɔ otsui krɔŋŋ mli, ni no ji nɔ ni obaanyɛ otsu. Nikeenii ni tamɔ nɛkɛ lɛ saa ehiɛ, ni ebaahã oná ehiɛ duromɔ. (2 Kor. 9:6, 7) No hewɔ lɛ, yaa nɔ otsi obɛŋkɛ o-Tsɛ ni yɔɔ suɔmɔ lɛ, kɛtsɔ sɔlemɔ ni obaasɔle, Nyɔŋmɔ Wiemɔ lɛ ni obaakase, Kristofoi akpeei ni obaaya, kɛ ohe ni okɛbaawo shiɛmɔ nitsumɔ lɛ mli kɛ ekãa daa lɛ nɔ.

Akɛni eshwɛ “be fioo” ni abaakpãtã Abonsam hiɛ hewɔ lɛ, atuatselɔ ni yiŋ wa nɛɛ etswa efai shi akɛ, ebaafee nɔ fɛɛ nɔ ni ebaanyɛ koni ehã wɔkpa anɔkwayeli mli ni wɔjɛɔ wɔsɔmɔɔ Yehowa lɛ. (Kpoj. 12:12) Yaa nɔ ohi Yehowa masɛi, ni mɔdɛŋ fɛɛ ni Abonsam bɔɔ koni enine ashɛ onɔ lɛ yeŋ omanye. (Lala 16:8) Nyɛfainɛ nyɛnáa nɔmimaa akɛ, wɔsumɔɔ nyɛ waa diɛŋtsɛ, ni wɔhiɛ sɔɔ nibii ni nyɛfeɔ kɛfiɔ Nuŋtsɔ lɛ Maŋtsɛyeli lɛ sɛɛ yɛ naagbee gbii nɛɛ amli lɛ waa.

Nyɛnyɛmimɛi,

Yehowa Odasefoi a-Gbɛtsɔɔmɔ Kuu