•  Taeka ni Kaukuki 2

•  Baika Kakawaki Aika Mena n Ana Taeka te Atua 3-5

  •  Te Kabwarabwara 3

  •  Kaubwai n Taamnei Aika Kakawaki 4

  •  Wareware n te Baibara 5

•  Kanakoraoa Am Mwakuri ni Minita 6-14

  •  Moanakin te Maroro 7

  •  Te Manga Oki 8

  •  Karekeia Taan Rimwini Kristo 9

  •  Taekinan Am Koaua 10

  •  Te Kabwarabwara 11

  •  Kanoana 12

  •  Teina 13

  •  Kabonganaan Taamnei ao Booki 14

•  Maiura ni Kristian 15-16

  •  Te Reirei n te Baibara n te Ekaretia 16

•  Taeka ni Kainin 17

•  Te Taeka ni Kamoamoa ao te Reirei ni Kairiri 18

•  Te Tai 19

•  Rokon te Mataniwi n te Aono 20

•  Wikin te Runga ke te Bwabwaro 21

•  Wikin te Kauring 22

•  Te Mataniwi n te Botaki ae Maiura ao Ara Mwakuri ni Minita 23

•  Te Tia Babaire n te Botaki ae Maiura ao Ara Mwakuri ni Minita 24

•  Te Tia Anga te Reirei ni Kairiri ae te Kauoman 25

•  Reirei ni Kuura Tabeua Riki 26

•  Taamnei 27

1. Kaetieti aikai a na kona ni buokaki iai ni kabane naake iai mwiokoaia n ara botaki ae Maiura ni Kristian ao Ara Mwakuri ni Minita. A riai koraki aikai n rinanoni kaetieti aikai ni kaineti ma aia reirei, n aron ae karinanaki n Te Boki n Reirei ae Maiura ao Ara Mwakuri ni Minita. A riai taan uarongorongo ake iai mwiokoaia n tauraoi n taai nako ao n roko ni karaoi tibwangaia n te kuura. Tabeman ake a teimatoa n irii bobotaki n te ekaretia, a kona ni kaaina te kuura ngkana a butimwaei ana reirei te Baibara ao ni kaboraoi maiuia ma booto n reirei ibukia Kristian. E riai te mataniwi n Te Botaki ae Maiura ao Ara Mwakuri ni Minita ni maroroakini baike a kainnanoaki ibukin te rin n te kuura ma temanna ae tuai n riki bwa te tia uarongorongo ma iai nanona ni kani kaaina te kuura, ao imwina e a kona ni kaongoa te aomata anne ngkana e a tau nako iai. E riai ni karaoaki te maroro i aon aei nakoina ao e na mena naba ana tia reirei n te Baibara i rarikina (ke ana karo temanna ae te tia kakoaua). Titeboo naba baike a kainnanoaki iroun ane e kan riki bwa tia uarongorongo ae tuai ni bwabetitoaki.—od mwa. 8 bar. 8.

2. Teuana te miniti. Ni katoa wiki imwin te anene ni kaukuki ao te tataro, ao te tia babaire n te Botaki ae Maiura ao Ara Mwakuri ni Minita, e na rinanoi kanoan te botaki ni kaingaingaa te nano. E riai te tia babaire ni kaatuui reirei aika kakawaki aika a na kakabwaiaaki riki iai kaain te ekaretia.

 3. Te Kabwarabwara: Tebwina te miniti. E katauraoaki n te Boki n Reirei ae Maiura ao Ara Mwakuri ni Minita te boto n iango n te kabwarabwara ao reirei aika kakawaki aika uoua ke tenua. E riai ni karaoaki te kabwarabwara aei iroun te unimwaane ke te tabonibai n te ekaretia ae tau. Ngkana e nang rinanoaki bokin te Baibara ae boou n te wareware n te Baibara n te wiki, ao e na kaotaki moa te taamnei ibukini kabwarabwaraana. E kona te tia kabwarabwara ni kairekerekea ana kabwarabwara ma te taamnei ao te boto n iango. Ma e na taraia raoi bwa e na rinanoi reirei aika kakawaki ake a kaotaki n te boki n reirei. Ngkana e reke taina, e riai naba ni kamanenai taamnei ake n te boki n reirei ma reirei aika kakawaki man te kibu, ake a katauraoaki naba bwa kanoan te kaongora anne. E kona naba ni karini booki riki tabeua ngkana a boutokaa te boto n iango n te kabwarabwara.

 4. Kaubwai n Taamnei Aika Kakawaki: Tebwina te miniti. Te itera aei bon te titiraki ma kaeka ao akea iai te moantaeka ke te motika. E na karaoaki iroun te unimwaane ke te tabonibai n te ekaretia ae tau. E na tabeki titiraki akana uoua nakoia kaain te botaki. E kona ni baireia naba bwa a na warekaki kiibu ake a kaotaki ke a na aki. A riai ni kaeka taani kaeka i nanon 30 te tekan ke i aana.

 5. Wareware n te Baibara: Aua te miniti. E na karaoaki te mwioko aei iroun te tari te mwaane. E riai ni wareka te kibu are e mwiokoaki bwa e na warekia ao e na akea ana moantaeka ke ana motika. E riai te tia babaire n te botaki n tauraoi ni buokiia riki taani wareware bwa e na eti raoi aia wareware, e na ota, e na aki tokitoki, e na mataata, e na bibitaki teini bwanaaia, a na motirawa n te tai ae riai, ao a na wareware n aron ae bon te maroro. Ibukina bwa a kona ni mwiokoaki taani wareware n te Baibara tabeman bwa a na wareka ae uarereke ke ae abwabwaki riki, e a riai te mataniwi ibukin te Botaki ae Maiura ao Ara Mwakuri ni Minita, n taraa raoi aia konabwai kaain te kuura ngkana a karaoi mwiokoia aikai.

6. Tebwi ma nimaua te miniti. E katauraoaki te itera aei ibukini kataneiaakia kaain te botaki nakon te mwakuri ni minita ao katamaroaan riki aroia ni maroro n ikotaki ma aia konabwai n uarongorongo ao n angareirei. A kona naba unimwaane n te ekaretia n anganaki mwiokoaia naba n te kuura. A riai naake a kaaina te kuura ni mwakuria tein te reirei are a na mwakuria man te boroutia ae Te Angareirei ke Tangiriia Aomata ae oti i rarikin te reirei are ko mwiokoaki iai n te Boki n Reirei ae Maiura ao Ara Mwakuri ni Minita. Ma n tabetai, e kona ni manga bitaki te reirei are e na karaoaki bwa ai te maroro ngkana e a manga baireaki. E na tii kona ni karaoa te reirei anne te unimwaane ke te tabonibai n te ekaretia ae tau.—Nora  barakirabe 15 ni kaineti ma aroni karaoan te reirei ae te maroro.

 7. Moanakin te Maroro: E kona ni karaoaki te reirei aei iroun te mwaane ke te aine. E na toanaki iroun ae titeboo arona ma ngaia bwa te mwaane ke te aine ke kaain ana utu. A kona n tei ke n tekateka.—Ibukini karekean rongorongon riki kanoan ao tein te reirei aei, nori  barakirabe 12 ao  13.

 8. Te Manga Oki: E kona ni karaoaki te reirei aei iroun te mwaane ke te aine. E riai toana n titeboo arona ma ngaia bwa te mwaane ke te aine. (km 5/97 i. 2) A kona n tei ke n tekateka. E riai are e karaoa te reirei aei ni kaota te baere e na taekinna ngkana e a manga okira te aomata are kan ongora ni moani kawarana.—Ibukini karekean rongorongon riki kanoan ao tein te reirei aei, nori  barakirabe 12 ao  13.

 9. Karekeia Taan Rimwini Kristo: E kona ni karaoaki te reirei aei iroun te mwaane ke te aine. E riai toana n titeboo arona ma ngaia bwa te mwaane ke te aine. (km 5/97 i. 2) A kona n tei ke n tekateka. N te reirei aei e riai ni karaoaki bwa te kaotioti ae kaotaki iai waakinan teutana te reirei n te Baibara are e a tia ni moanaki karaoana. E aki riai ni kaotaki te moan ikikina ke te kainin, ma tii ngkana e kaungaaki bwa e na mwakuria te reirei teuana mai buakon akanne. E aki kainnanoaki bwa a na bane ni warekaki ni kabaibati kanoan te boki are e na mwakuria, e ngae ngke e kona ni karaoaki aei.

 10. Taekinan Am Koaua: Ngkana e na karaoaki bwa te kabwarabwara, e riai te reirei aei ni karaoia te mwaane. Ngkana e na karaoaki bwa te kaotioti, e kona ni karaoia te mwaane ke te aine. E riai toana n titeboo arona ma ngaia bwa te mwaane ke te aine ke kaain ana utu. E riai are e karaoia n anga te kaeka ae mataata ao ae aki kamatauninga, ni kaineti ma te titiraki are aanaki iai te boto n iango n te kaongora are katauraoaki. E kona are e karaoa te reirei aei ni baireia bwa e na okiokira te kaongora anne ke e na aki, n ana tai n angareirei.

 11. Te Kabwarabwara: E na karaoaki aei iroun te mwaane ae kaain te kuura bwa te kabwarabwara nakoia kaain te ekaretia. Ngkana e boto te kabwarabwara anne man te kaongora teuana man te bukinibaa A are n te boroutia ae Tangiriia Aomata, e riai kaain te kuura anne ni kamataataa aron te kibu (ke kiibu) ni kona ni kabonganaaki n te mwakuri ni minita. N te katoto, e kona ni kabwarabwaraa te kibu teuana ae e na kabongana, nanon te kibu anne, ao arona ni kona ni kaungaa iai te aomata. Ngkana e boto te kabwarabwara anne man te kaongora teuana ae nako man te reirei ane n te boroutia ae Tangiriia Aomata, e riai n iaiangoia bwa tera arona ni maiuakina te reirei anne n te mwakuri ni minita. E kona ni kamataata te katoto are e taekinaki n te reirei i aan nambwa 1 ke ni kamataatai kiibu ake a koreaki naba n te reirei anne, ngkana a na ibuobuoki.

   12. Kanoana: Te bwai ae taekinaki n te barakirabe aei ao are imwina, e kaineti nakoni “Moanakin te Maroro” ao “Te Manga Oki” ake a na karaoaki n te kuura. Ngkana akea te kaetieti iai, ao tiani kaain te kuura bon tibwaakin te koaua teuana man te Baibara, ae kaineti nakon te aomata are maroro ma ngaia ao ni kawenea aan ana maroro ibukini kawarana are imwina. E riai n rinea atun ana maroro ae roko raoi n taina ao n uaana n ana tabo. E kona ni baireia bwa e na kabongana ke e na aki, te boki ke te taamnei teuana man ara Bwai ni Mwakuri Ibukin te Angareirei. N oneani mwin are e na karaoaki te kaotioti ae kamatenikunaaki, a riai kaain te kuura ni kataneiaia ma aron te maroro ae uaana riki, n aroia ni kaotiota tabeakinan temanna, ao n taekinna n aron ae e taneiai te aba iai.

   13. Teina: E riai kaain te kuura ni karaoa ae boraoi ma are kantaningaaki n ana reirei, bwa e na karaoia n teina ae tataneiai te aba n te tabo are e mena iai. N te katoto:

1.  (1) Te Auti Teuana ma Teuana: Tein te reirei n aei e irekereke ma te uarongorongo n te auti teuana ma teuana—bwa tao e na kawaraki te aomata n ana auti, e na karaoaki rinanon te tareboon, ke rinanon te kororeta—ao ni manga okira te aomata are e moani kawaria ni karaoan te auti teuana ma teuana n te mwakuri ni minita.

2.  (2) Te Uarongorongo ae Aki Baireaki: Tein te reirei n aei e kamataatai aanga ake ko kona iai ni bita te kakaraki nakon te uarongorongo. E kona naba n taekinaki te iango teuana ae aanaki man te Baibara nakoia aomata ake ko boo ma ngaiia n te tabo ni mwakuri, n te reirei, n am kaawa, i aoni baao ni mwamwananga, ke n taabo ake ko karaoi iai tabem ni katoabong.

3.  (3) Te Uarongorongo n Ana Tabo te Botannaomata: Tein te reirei n aei e kona n irekereke ma te uarongorongo n te kaa ni boki, te uarongorongo nakoia aomata n taabo ni bitineti, i rarikin te kawai, ke n taabo ni kamaangang, n taabo ake a kateaki iai baao ni mwamwananga, ke n taabo ake a kona n reke iai aomata.

 14. Kabonganaan Taamnei ao Booki: Ngkana e angaraoi, e kona kaain te kuura ni baireia bwa e na kaota te taamnei ke e na maroro i aon te boki teuana. Ngkana iai te taamnei n ana reirei ke ngkana e rineia bwa e nga iai ae e na kabongana, e riai n taekinna ao ni maroroakinna ma e na aki kaotia.

15. Imwin te anene ao 15 te miniti are imwina n te itera aei, e na rinanoaki iai teuana ke uoua te reirei ae katauraoaki ibukini buokaia kaain te botaki bwa a na maiuakina Ana Taeka te Atua. Ngkana akea te kaetieti iai, a kona ni karaoaki reirei aikai irouia unimwaane ke tabonibai aika tau, ma tii kainnanon te ekaretia ae e na karaoaki iroun te unimwaane. Ngkana iai n te reirei anne te maroro, e kona te tia babaire n tabeki titiraki tabeua irarikin titiraki ake a kamani katauraoaki. E riai ni kakimototoa ana moantaeka n ana reirei bwa e aonga ni kona n reke taekinan reirei aika kakawaki ake iai ao a na kona kaain te botaki n anga aia kaeka. Ngkana iai ae e na anga ana maroro, e raoiroi riki ae e na anga ana maroro mai moa ao tiaki man ana tabo n tekateka, ngkana e konaa.

  16. Te Reirei n te Baibara n te Ekaretia: Tenibwi te miniti. E na karaoaki aei iroun te unimwaane n te ekaretia ae tau. (N ekaretia ake a karako iai unimwaane, a kona ni mwiokoaki tabonibai aika tau, ngkana e kainnanoaki.) E na boni baireia te rabwata n unimwaane bwa antai ae tau ni kaira te Reirei n te Baibara n te Ekaretia. Naake a katauaki, a riai ni kaira te reirei n te aro ae uaana bwa e aonga ni bane raoi n taina, a na katuruturui kiibu aika kakawaki, ao ni buokiia taan ongora bwa a na atai kakawakin reirei ake a rinanoaki. Naake a tau ibukin te reirei aei, a na buokaki ngkana a rinanoa te kaetieti ae katauraoaki ibukin aroni kairan te reirei i aoni kabonganaan titiraki ma kaeka. (w23.04 i. 24, bwaoki) Ngkana e tia n rinanoaki n te aro ae mataata te reirei ibukin te wiki anne, e aki riai ni manga kaananauaki te reirei. A kona ni bibitaki taani kaira te reirei ao taani wareware i nanon te wiki. Ngkana e tua te tia babaire n te Botaki ae Maiura ao Ara Mwakuri ni Minita bwa e riai ni kauarerekeaki te reirei, e riai te tia kaira te reirei ni bairea arona ni kauarerekea. E kona n rinei tabeua barakirabe ake a na aki warekaki.

17. Tenua te miniti. Te tia babaire n te Botaki ae Maiura ao Ara Mwakuri ni Minita e na kauringi reirei aika manena man te botaki. E riai naba n rinanoi kanoan te wiki are imwina. E kona n taekin araia kaain te kuura ake iai mwiokoaia n te wiki are imwina, ngkana e reke taina. Ngkana iai katanoata aika riai n taekinaki ke reeta aika a na warekaki nakoia kaain te ekaretia, e riai te tia babaire n taekin i buakon ana taeka ni kainin. Kaongora ibukini baike e taneiai te aba iai, n aron te babaire ibukin te mwakuri ni minita ao te kaitiaki, a aki riai ni katanoataaki mai moa, ma a riai ni katekeaki n te baba ni kaongora. Ngkana iai katanoata aika aki kona n taekinaki ke reeta aika aki kona ni warekaki i buakon taeka ni kainin, e riai te tia babaire n tuangia taari ake a na karaoi reirei n te itera are Maiura ni Kristian, bwa a na kauarerekei aia reirei. (Nori  barakirabe 16 ao  19.) E na kainaki te botaki n te anene ao te tataro.

18. Imwini karaoan aia reirei kaain te kuura n tatabemania nako, e na kabanea tao teuana te miniti te tia babaire n te Botaki ae Maiura ao Ara Mwakuri ni Minita, n anga te taeka ni kamoamoa ao te reirei ni kairiri are boto iai tein te reirei are e na mwakuria. Ngkana e wetea kaain te kuura nakon ana reirei, e na aki taekina tein te reirei are e na mwakuria. Ma ngkana e a bane ana reirei ao imwin taeka ni kamoamoa tabeua, e a kona te tia babaire ni kaota tein te reirei are e na mwakuria ao n taekina bukina ngkai e nakoraoi arona ni mwakuria, ke ni kabwarabwaraa ma te akoi bukina ao arona are e riai ni mwakuria riki tein te reirei anne. E kona naba te tia babaire n taekin itera riki tabeua ibukin te kaotioti, ngkana e noria bwa e na buokaki riki iai kaain te kuura anne ke taan ongora. E kona ni kabongana te boroutia ae Tangiriia Aomata ao Te Angareirei, ke te boki ae te Ministry School, n anga taian reirei ni kairiri riki tabeua mai iai nakoina n tii ngaia imwin te botaki, ke n te tai teuana ae angaraoi riki, ibukin tein te reirei are e na mwakuria ke teuana riki.—Ibukini kabwarabwaraan riki taben te mataniwi n te Botaki ae Maiura ao Ara Mwakuri ni Minita ao taben te tia anga te reirei ni kairiri ae te kauoman, nori  barakirabe 19,  24, ao  25.

19. Akea te reirei ae e na riaon taina ae katauaki, n ikotaki naba ma ana taeka te tia babaire n te Botaki ae Maiura ao Ara Mwakuri ni Minita. E ngae ngkana e kaotaki n te Boki n Reirei ae Maiura ao Ara Mwakuri ni Minita te tai ae katauaki ibukin te reirei teuana ma teuana, ma ngkana e bane raoi te reirei n taina are katauaki iai, e aki riai ngkanne ni kaananauaki riki ibukini karokoan taina are e riai ni bane iai. Ngkana iai reirei tabeua n te botaki aika riaon taia, e riai n anga te reirei ni kairiri te tia babaire n te Botaki ae Maiura ao Ara Mwakuri ni Minita, ke te tia anga te reirei ni kairiri ae te kauoman. (Nori  barakirabe 24 ao  25.) E riai ni bane kanoan te botaki n ikotaki ma anene ao tataro, i nanon 1 te aoa ao 45 te miniti.

20. Ngkana e kawaraki te ekaretia iroun te mataniwi n te aono, e bon riai ni waakinaki kanoan te kaetieti n te Boki n Reirei ae Maiura ao Ara Mwakuri ni Minita ma tii aikai aika a na bitaki: Te Reirei n te Baibara n te Ekaretia are kanoani Maiura ni Kristian e na oneaki mwina n ana kabwarabwara te mataniwi n te aono ae maanna 30 te miniti. Imwain te kabwarabwara anne, te tia babaire n te Botaki ae Maiura ao Ara Mwakuri ni Minita e na kauringa kanoan te botaki ae e a tibwa tia ni karaoaki, e na taekina kanoan te botaki n te wiki are imwina, e na taekini katanoata tabeua ao ni wareki reeta ngkana iai, ao imwina e na kaoa te mataniwi n te aono. Imwin te kabwarabwara, e na kaina te botaki te mataniwi n te aono n te anene ae e rineia. E kona ni kaoa te tari temanna bwa e na kainna n te tataro. A na aki karaoaki reirei n te kuura ake tabeua riki n rokon te mataniwi n te aono. E kona ni waakina ana botaki te kurubu are kamanena te taetae riki teuana, e ngae naba ngkana e kawara te ekaretia anne te mataniwi n te aono. Ma e riai te kurubu anne ni manga ikotaki ma te ekaretia n ana tai ni kabwarabwara te mataniwi n te aono.

21. Ni wikin te runga ke te bwabwaro, akea te botaki n te ekaretia ae e na karaoaki. E riai te ekaretia n anga te kauring, bwa a riai ni karaoaki kanoan te botaki i nanoni wiki akanne iroun temanna ma temanna, ke n te utu.

22. Ngkana e bwakara te bong ae i marenan te Moanibong nakon te Kanimabong te Kauring, akea te Botaki Ibukini Maiura ao Ara Mwakuri ni Minita ae e na karaoaki.

23. E na riki bwa te mataniwi n te Botaki ae Maiura ao Ara Mwakuri ni Minita te unimwaane are rineaki iroun te rabwata n unimwaane. E na taraia bwa e na baireaki raoi te botaki ao ni karaoaki n aron ae boraoi ma kaetieti aikai. E riai n rereitaki ma te tia anga te reirei ni kairiri ae te kauoman. N te tai are e tauraoi iai te Boki n Reirei ae Maiura ao Ara Mwakuri ni Minita, te mataniwi n te Botaki ae Maiura ao Ara Mwakuri ni Minita e na karaoi babaire ibukini mwiokoaia kaain te kuura ibukin namwakaina aika uoua. E na karaoa naba te kaetieti ibukia taari ake akea aia reirei n te kuura ao te tia babaire n te botaki n te wiki mai buakoia taari ake a kariaiakaki iroun te rabwata n unimwaane n ikotaki ma naake iai mwiokoaia n te kuura (Nori  barakirabe 3-16 ao  24.) Ngkana e na karaoi aia reirei kaain te kuura, e riai n iangoi aia ririki ni maiu, aia konabwai, ao aroia ni maroro i aon te baere e na maroroakinaki. E riai ni kabongana ana ataibwai i aon anne ngkana e na baireiia naake a na karaoa te reirei. A riai n anganaki mwiokoaia tenua te wiki imwain taina. E riai ni kamanenaaki te booma ae Mwiokoam ni Maiura ni Kristian ao Ara Mwakuri ni Minita (S-89) ibukin aei. E riai te mataniwi n te Botaki ae Maiura ao Ara Mwakuri ni Minita n taraia raoi bwa e na teke n te baba ni kaongora katoton te kaetieti ibukin te botaki. E kona te rabwata n unimwaane ni mwiokoa iai te unimwaane ke te tabonibai riki temanna n te ekaretia bwa e na ibuobuoki iai. Ma bon tii unimwaane aika riai n anga te mwioko nakoia taari ake akea aia reirei n te kuura.

24. Ni katoa wiki, e na riki te unimwaane temanna bwa te tia babaire n te Botaki ae Maiura ao Ara Mwakuri ni Minita. (N taabo ake a karako iai unimwaane, a kona ni mwiokoaki tabonibai aika tau.) Tabena boni katauraoan te moantaeka ao te taeka ni kainin. E na kabwarabwarai naba kanoan te botaki ao e kona ni karaoi mwioko tabeua ngkana a karako mwaitiia unimwaane n te ekaretia, ao riki reirei ake iai te taamnei iai n akea te maroro. E riai n uarereke ana taeka ake i marenan taian reirei. E na taraia te rabwata n unimwaane bwa antai te unimwaane ae tau ibukin te mwioko aei. A na okioki n riki bwa taan tia babaire unimwaane ake a tau iai. E na riki bwa te tia babaire n taai aika kakaokoro te unimwaane temanna ma temanna mai buakoia unimwaane ake a tau. Ni kaineti ma baika riiriki n aia aono, e kona te mataniwi n te Botaki ae Maiura ao Ara Mwakuri ni Minita ni kabonganaaki n angiin te tai bwa te tia babaire, nakoia unimwaane riki ake tabeman. Ngkana e tau te unimwaane temanna ni kaira te Reirei n te Baibara n te Ekaretia, e bae n tau n riki bwa te tia babaire n te botaki. Taiaoka n uringnga bwa te unimwaane are riki bwa te tia babaire, e riai n anga te taeka ni kamoamoa ae tatangira man ibuobuoki, ao ngkana e riai, e na anga te reirei ni kairiri nakoia kaain te kuura. E na taraia raoi naba te tia babaire bwa e na bwara te botaki n taina are katauaki iai. (Nori  barakiabe 17 ao  19.) Ngkana e riai iroun te tia babaire ao e mwaawa mooa, e kona ni kateaki te bwai n taetae riki teuana mai moa are e na tataekin iai kanoan te botaki, ao te tari are e na karaoa te reirei, e na tei n te bwai n taetae are ibukia taani kabwarabwara. N aron naba anne, e kona te tia babaire n tekateka n te taibora mai moa ngkana e riai irouna, n taini karaoan te wareware n te Baibara n te kuura, ao n te itera naba are Kanakoraoa Am Mwakuri ni Minita. E na akea riki kabanean te tai n aei.

25. Ngkana e angaraoi, e raoiroi ni mwiokoaki iai te unimwaane ae mwaatai ni kabwarabwara. Taben te tia anga te reirei ni kairiri ae te kauoman bwa e na anga te reirei ni kairiri nakoia unimwaane ao tabonibai n tii ngaiia ngkana e kainnanoaki, ni kaineti ma mwiokoaia are a karaoia, tao n te Botaki ae Maiura ao Ara Mwakuri ni Minita, te kabwarabwara ibukia aomata nako, ao kairan ke warekan te Reirei n Te Taua-n-Tantani ke te Reirei n te Baibara n te Ekaretia. (Nora  barakirabe 19.) Ngkana a bati unimwaane n te ekaretia aika rabakau ni kabwarabwara ao n angareirei, e kona ngkanne ni bibitaki temanna i buakoia ae katauaki iai, n riki bwa te tia anga te reirei ni kairiri ae te kauoman ni katoa ririki. E aki riai te tia anga te reirei ni kairiri ae te kauoman n anga te reirei ni kairiri imwini banen taian reirei nako.

26. A kona taian ekaretia ni karaoi reirei ni kuura tabeua riki, ni kaineti ma mwaitiia kaain te kuura. A riai n toa kuura aikai ma te tia anga te reirei ni kairiri ae tau, ao e raoiroi riki ngkana te unimwaane. Ngkana e riai, e kona naba ni mwiokoaki n aei te tabonibai ae tau. E riai ni baireia te rabwata n unimwaane bwa antai ae e na karaoa te mwioko aei ao a na riai ni bibitaki ke a na aki. E riai te tia anga te reirei ni kairiri n ira nanon te kaetieti are kabwarabwaraaki ni  barakirabe 18. Ngkana e nang karaoaki te reirei ni kuura akanne, a riai n tuangaki kaain te kuura bwa a na nakon ruu ake e na boo iai te reirei, imwin iteran te reirei are Kaubwai n Taamnei Aika Kakawaki, are i aani Baika Kakawaki Aika Mena n Ana Taeka te Atua. A riai ni manga ikotaki ma kaain te ekaretia imwin ana kabanea n reirei kaain te kuura.

27. A na kaotaki taamnei aika irekereke ma kanoan te botaki aei. Taamnei ake kanoan te wiki, a na katauraoaki n te app ae JW Library^® ao ko kona ni karekei mai iai.

© 2023 Watch Tower Bible and Tract Society of Pennsylvania

S-38-GB 11/23