Iuta 1:1-25
1 Mairoun Iuta, ae ana toro Iesu Kristo ao tarin Iakobo,+ nakoia akana weteaki+ aika tangiraki iroun te Atua ae te Tama ao a kawakinaki ibukina bwa a katiteuanaaki ma Iesu Kristo:+
2 Ke e kabatiaaki te nanoanga ma te rau, ao te tangira nakoimi.
3 Ngkami aika kam tangiraki, I rangi ni kani korea nakoimi taekan te kamaiuaki ae ti kantaningaia ma ngkami,+ ma I noria bwa I riai moa ni kaumakingkami, bwa kam na kakorakoraingkami ni buaka ibukin te onimaki+ are tii te taina anganakia te koraki aika itiaki,* ma e manena n aki toki.
4 Bwa iai aomata aika aki karinea te Atua aika karaba n rin i buakomi, ake a a kaman taekinaki n te Koroboki ae Tabu bwa a na motikaki taekaia. A kabongana ana akoi ae rianako te Atua bwa karekean angaia ni karaoa te aroaro ae kammaira,*+ ao ni kakeaa teuare ana bwai ngaira* are ara Uea are Iesu Kristo.+
5 E koaua bwa e a tia n reke te atatai ae tabwanin iroumi, ma I kani kauringingkami bwa e kamaunaia ngkoa Iehova* te koraki ake e a tia ni kamaiuia man te aba are Aikubita,+ ake a a manga aki onimaki+ rimwi.
6 E kabaeia anera ake a kakeai mwiokoaia ngkoa ma ni kitan oini mwengaia ae riai,+ n taian taurekereke n aki toki n te rotongitong, imwaini kakororaoan are e motikaki ibukia, n te bong are kakannato.+
7 A katotongia anera aikai kaain Totom ma Komora ao kaawa ake i rarikia, ni kabatiaa naba te wene ni bure* ao ni katoki nanoia ni kaibwabwaru,+ ao a a riki kaawa aikai bwa te bwai n reirei nakoira, ngkai a a tia n rinanon te rekenikai ae te ai ae akea tokina.+
8 Ma e ngae n anne, a karioi naba aia iango aika kairua aomata aikai, a kamwaraea te rabwata, a aki mutiakinia ake a tautaeka i aoia, ao a uaraoiia aika karineaki+ mairoun te Atua.
9 Ma ngke e kauntaeka Mikaere+ are te anera are mataniwia anera+ ma te Riaboro n uneakina rabwatani Mote,+ ao e maaku ni motika taekana ni kabuakakaa,+ ma e taku: “E bia boaiko Iehova.”*+
10 Ma a taetae ni kabuakakai baike a aki ota raoi+ iai aomata aikai, ao a a manga kabuakakai aroia i bon irouia ngkai a kakairi n te atatai ae aanaki n aia namakin, n aroia maan+ aika aki wanawana.
11 A kaawa iai bwa a katotonga aroni Kain+ ao a waetata n toua mwini kawaini Baraam+ are kairua ibukini kakaaeani kaniwangaia, ao a maunanako ibukin te taetae ni karitei+ n aroni Kora!+
12 Te koraki aei kaanga ai aron te rakai ngaiia ae raba i taari ngke a amwarake ma ngkami n ami botaki n itangitangiri,+ ao ai aroia taani kawakintiibu aika aki bwerengaki+ ma a tii tabe ma birotoia, ao naang aika aki uota te karau aika ukakinako n te ang,+ ao kainnamwarake aika akea uaaia n tain te uaa, ake a a boni mate* ma n taewakaaki,
13 ao naoni marawa aika takareburebu aika kakoburakei oini kamaamaeaia,+ ao ai itoi aika tiotionako are e mena imwaia te rotongitong n aki toki.+
14 Eng, e taetae naba ni burabetina taekaia, Enoka+ are te kaitiroro imwin Atam ngke e taku: “Noria! E roko Iehova* ma ana anera aika tabu aika mwaitikurikuri,*+
15 ni motiki taekaia aomata ni kabane,+ ao ni kabureia ake a aki karinea te Atua ibukin aia mwakuri aika bubuaka ake a karaoi, ao ibukin aia taetae taani bure aika rangi ni kamatauninga nakoina.”+
16 Bon taani ngurengure+ aomata aikai aika ngureakina aroni maiuia, a iririi nanoia aika bubuaka,+ a kamoamoaia i bon irouia, ao a karangia aomata n aia taetae ibukini karekean oini kabwaiaia.+
17 Ma ngkami aika kam tangiraki, kam na uring taeka ake a atongaki* rimoa irouia ana abotoro ara Uea ae Iesu Kristo,
18 ake a aki toki ni kangai nakoimi: “A na kaoti taani kakaniko ni kabaneani boong, aika kairaki n oin nanoia n tangirani baika bubuaka.”+
19 Bon naakai aika karika te iraraure,+ a tangiri bwain te rabwata, ao akea taamnein te Atua* irouia.
20 Ngkami aika kam tangiraki, kam na kakorakoraa riki ami onimaki ae moan te tabu ao kam na tataro ni kairakimi n te taamnei ae raoiroi,+
21 bwa kam aonga ni kawakiningkami n te aro ae kam na teimatoa n tangiraki iai iroun te Atua,+ ngkai kam kariaa ana nanoanga ara Uea ae Iesu Kristo, are kairira nakon te maiu are aki toki.+
22 Kam na teimatoa naba n nanoangaiia+ akana nanokokoraki,+
23 ni kamaiuia+ ni buritiia man te ai. Kam na teimatoa n nanoangaiia tabemwaang ma te maaku, ma kam na ribaa naba te kunnikai are memea ni baarekan te rabwata.+
24 Ao ni kaineti ma teuare kona ni kawakiningkami bwa kam na aki bwaka, ao ni kateingkami n akea baarekami+ i matani mimitongina ma iriami ae te kimwareirei ae korakora,
25 are tii ngaia te Atua ae ara tia Kamaiu rinanon Iesu Kristo ae ara Uea: ana bwai te neboaki ma te mimitong ma te korakora ao te mwaaka, mangkoangkoa, ao ngkai, ao n aki toki. Amen.
Taiani Kabwarabwara Mai Nano
^ Ke, “tabu.”
^ Ke, “te aroaro ae kanuka.” Kuriiti, a·selʹgei·a. Nora Nanon Taeka.
^ Ke, “ara toka.”
^ Nora Buk. A5.
^ Nora Nanon Taeka.
^ Nora Buk. A5.
^ Kuriiti, “a mate uatai.”
^ Nora Buk. A5.
^ Ke, “tatabebwi tenga.”
^ Ke, “baike a a kaman taekinaki.”
^ Kuriiti, “te taamnei.”