1, 2. Por que poderiamos sentir que Xehová non está contestando as nosas oracións?

 “PON as delicias no Señor: El darache o que arela o teu corazón” (Sal. 37:4). Que promesa tan bonita! Pero, podemos esperar que Xehová nos dea inmediatamente todo o que lle pedimos? Por que é posible que nos fagamos esta pregunta? Pensa nas seguintes situacións: Unha irmá solteira ora para que a inviten a asistir ó Curso para Evanxelizadores do Reino. Pero pasaron varios anos e aínda non a invitaron. Un irmán xove pídelle a Xehová que lle axude a recuperarse dunha enfermidade grave para poder facer máis pola congregación. Pero a súa saúde non mellora. Uns pais cristiáns oran para que o seu fillo se manteña na verdade. Pero o rapaz decide deixar de servir a Xehová.

² Pode que ti tamén lle pedises algo a Xehová pero non o recibises. Quizais por iso chegues á conclusión de que Xehová contesta as oracións dos demais pero non as túas. Ou incluso penses que fixeches algo mal. Unha irmá, á que chamaremos Janice, sentiuse así. b Ela e o seu home expresáronlle a Xehová o seu desexo sincero de servir en Betel. Janice conta: “Estaba convencida de que, en pouco tempo, estariamos alí”. Pero os meses convertéronse en anos e aínda non recibiran a invitación. Ela segue dicindo: “Estaba triste e confundida e preguntábame se fixera  algo para decepcionar a Xehová. Pedíralle especificamente que nos permitise servir en Betel. Por que non me contestaba?”.

3. Que imos analizar neste artigo?

³ Ás veces pode que nos preguntemos se Xehová escoita as nosas oracións. Isto tamén lles pasou a algúns servos fieis do pasado (Xob 30:20; Sal. 22:3 [22:2, TNM]; Hab. 1:2). Que te pode convencer de que Xehová che responderá? (Sal. 65:3 [65:2, TNM]) Para contestar esta pregunta, primeiro temos que analizar os seguintes puntos: 1) Que podemos esperar de Xehová? 2) Que espera Xehová de nós? 3) Por que é posible que teñamos que reaxustar o que pedimos nas nosas oracións?

4. Segundo Xeremías 29:12, que promesa nos fai Xehová?

⁴ Xehová promete que escoitará as nosas oracións (le Xeremías 29:12). O noso Deus ama os seus servos fieis, por iso nunca ignora as súas oracións (Sal. 10:17, TNM; 37:28). Pero iso non significa que nos vaia dar todo o que lle pedimos. Pode que teñamos que esperar ata o novo mundo para recibir algunhas destas cousas.

5. Que ten en conta Xehová cando escoita as nosas oracións? Explica a túa resposta.

⁵ Xehová ten en conta se as nosas peticións están de acordo co seu propósito (Is. 55:8, 9). Unha parte do seu propósito é encher a Terra de homes e mulleres que vivan felices e unidos baixo o seu goberno. Pero Satanás afirma que ós humanos lles vai mellor se se gobernan a si mesmos (Xén. 3:1-5). Así que Xehová está permitindo a gobernación humana para demostrar que o Demo se equivoca. Como resultado, este tipo de goberno é a causa de moitos dos problemas que temos hoxe en día (Ecl. 8:9). Entendemos que Xehová non vai solucionar todos estes asuntos de momento porque, se o fixese, algúns poderían pensar que a gobernación humana funciona e que é capaz de resolver os problemas das persoas.

6. Por que necesitamos estar convencidos de que Xehová sempre vai actuar con amor e xustiza?

⁶ Xehová pode responder a mesma petición de formas diferentes. Por exemplo, cando o rei Ezequías estaba moi enfermo, suplicoulle a Deus que lle axudase a recuperarse. Xehová contestou esa oración curándoo (2 Re. 20:1-6). Pola contra, cando o apóstolo Paulo lle pediu a Deus que lle quitase “un aguillón na carne”, que posiblemente era un problema de saúde, El non o fixo (2 Cor. 12:7-9). Outro exemplo é o que lles pasou ós apóstolos Santiago e Pedro. O rei Herodes quería matalos ós dous. Así que a congregación orou por Pedro e seguramente tamén por Santiago. Aínda así, Santiago morreu pero Xehová fixo un milagre para salvar a Pedro (Feit. 12:1-11). Pode que nos preguntemos: “Por que salvou a Pedro e non a Santiago?”. A Biblia non o di. c Pero do que podemos estar seguros é de que Xehová sempre actúa con xustiza (Dt. 32:4). E tamén sabemos que tanto Pedro coma Santiago tiñan a súa aprobación (Ap. 21:14). Poida que ás veces Xehová non conteste as nosas oracións  da forma que esperabamos. Pero como temos a confianza de que sempre é xusto e amoroso, non cuestionamos a súa maneira de respondernos (Xob 33:13).

7. Que temos que evitar, e por que?

⁷ Temos que evitar comparar a nosa situación coa doutros. Poida que lle pidamos a Xehová que nos axude dunha maneira moi específica e el non o faga. Pero, máis tarde, quizais saibamos de alguén que lle pediu algo similar e parece que Deus llo concedeu. Isto foi o que lle pasou a unha irmá que se chama Anna. Ela pediulle a Xehová que o seu home, Matthew, se recuperase dun cáncer. Ó mesmo tempo, había outras dúas irmás maiores que tamén estaban loitando contra esta enfermidade. Aínda que Anna orou intensamente tanto por Matthew como polas irmás, elas recuperáronse pero o seu home morreu. Isto fixo que Anna se preguntase se fora Xehová quen curara as irmás maiores. E se era así, por que non fixera o mesmo co seu home? Claro, non podemos saber con seguridade por que estas irmás superaron a súa enfermidade. Pero, o que si sabemos é que Xehová vai solucionar de maneira definitiva tódolos nosos problemas no futuro e que ten moitas ganas de resucitar os seus amigos que xa morreron (Xob 14:15).

8. a) Segundo Isaías 43:2, como nos axuda Xehová? b) Como nos axuda a oración cando pasamos por probas difíciles? (Mira o vídeo A oración axúdanos a aguantar).

⁸ Xehová sempre nos vai axudar. Como é o noso cariñoso Pai, non quere vernos sufrir (Is. 63:9, TNM). Aínda así, non nos vai librar de tódolos nosos problemas, que ás veces poden ser coma ríos ou chamas (le Isaías 43:2). Pero o que si nos promete é que nos axudará a pasar “a través” deles. Tampouco permitirá que estes problemas nos causen dano permanente. Ademais, vainos dar o seu poderoso espírito para que poidamos soportalos (Lc. 11:13; Flp. 4:13). Así que podemos estar seguros de que sempre teremos xusto o que necesitamos para seguir aguantando e serlle fieis a Xehová. d

9. De acordo con Santiago 1:6, 7, por que temos que confiar en que Xehová nos axudará?

⁹ Xehová espera que confiemos nel (Heb. 11:6). Ás veces pode parecernos que non imos ser capaces de superar certas probas. E quizais comecemos a dubidar de se Xehová nos vai axudar. Pero a Biblia asegúranos que co poder de Deus poderemos “saltar murallas” (Sal. 18:30 [18:29, TNM]). Así que en vez de permitir que esas dúbidas crezan, deberiamos orarlle a Xehová con moita fe e confiar en que el nos vai responder (le Santiago 1:6, 7).

10. Pon un exemplo de como podemos actuar de acordo co que pedimos nas nosas oracións.

¹⁰ Xehová espera que actuemos de acordo co que lle pedimos. Por exemplo, poida que un irmán lle pida a Xehová que lle axude a conseguir o tempo libre necesario no traballo para poder ir ó congreso rexional. De que formas lle podería responder Xehová? Quizais lle dea ó irmán o valor que necesita para falar co xefe. Pero, aínda así, o irmán terá que tomar a iniciativa e facelo, ó mellor incluso máis dunha vez. Tamén pode ser que teña que cambiar o horario con algún compañeiro  ou ata pedir que lle desconten ese tempo do seu salario.

11. Por que deberiamos orar con insistencia?

¹¹ Xehová espera que lle oremos con insistencia sobre as cousas que son importantes para nós (1 Tes. 5:17). Xesús deu a entender que non sempre iamos recibir a resposta ás nosas oracións de forma inmediata (Lc. 11:9). Así que non nos deamos por vencidos! Oremos de corazón e con insistencia (Lc. 18:1-7). Cando seguimos orando por un asunto, demostrámoslle a Xehová que o que lle pedimos non é só un capricho pasaxeiro. Tamén lle demostrará que temos fe en que el pode axudarnos.

12. a) Cal é unha das preguntas que nos deberiamos facer sobre as nosas oracións, e por que? b) Como podemos asegurarnos de que as nosas oracións demostran respecto por Xehová? (Mira o recadro “ Demostran as miñas oracións que respecto a Xehová?”).

¹² Se non recibimos o que pedimos en oración, é posible que teñamos que facernos tres preguntas. A primeira é: “É apropiado o que estou pedindo?”. Moitas veces cremos que sabemos o que é mellor para nós. Pero pode que o que esteamos pedindo non nos beneficie a longo prazo. Se estamos orando para que Xehová nos axude cun problema, quizais haxa unha solución moito mellor que a que nós pensamos. Incluso pode que algunhas cousas das que pedimos non estean de acordo coa vontade de Xehová (1 Xn. 5:14). Vexamos, por exemplo, o caso dos pais que mencionamos ó principio deste artigo. Eles rogáranlle a Xehová que o seu fillo permanecese na  verdade. Esta petición parece ser apropiada. Pero Xehová non obriga a ninguén a servilo. El quere que todos, incluídos os nosos fillos, escollamos adoralo (Dt. 10:12, 13; 30:19, 20). Así que, o que estes pais lle poderían pedir a Xehová é que lles axude a tocar o corazón do seu fillo para que este chegue a amalo e se faga amigo Seu (Pr. 22:6; Ef. 6:4).

13. Segundo Hebreos 4:16, cando nos contestará Xehová? Explica a túa resposta.

¹³ A segunda pregunta é: “Considera Xehová que é o momento de darme o que lle pido?”. Dende o noso punto de vista, quizais pensemos que Xehová ten que respondernos xa. Pero o certo é que el sabe cando é o mellor momento para facelo (le Hebreos 4:16). Se Xehová non nos contesta de maneira inmediata, quizais cheguemos á conclusión de que a súa resposta é “non”. Pero en realidade podería ser “aínda non”. Por exemplo, volve pensar no irmán xove que lle pide a Xehová que o cure da súa enfermidade. Se Deus fixese ese milagre, Satanás podería argumentar que o irmán só segue servindo a Xehová porque o curou (Xob 1:9-11; 2:4). Ademais, o noso Pai xa ten un tempo fixado para acabar con tódalas enfermidades (Is. 33:24; Ap. 21:3, 4). Ata entón, non podemos esperar curacións milagrosas. Así que, o que este mozo lle podería pedir a Xehová é que lle dea as forzas e a paz mental necesarias para aguantar a súa enfermidade e seguir servíndoo fielmente (Sal. 29:11).

14. Que che ensina a experiencia de Janice?

¹⁴ Pensa na experiencia de Janice, quen lle pedía a Xehová poder servir en Betel. Pasaron cinco anos ata que entendeu como respondera Xehová a súa oración.  Ela conta: “Xehová usou ese tempo para ensinarme e axudarme a mellorar. Agora confío moito máis nel. Necesitaba mellorar os meus hábitos de estudo e aprender que a felicidade non depende das miñas circunstancias”. Tempo despois, invitárona a ela e ó seu marido a servir na obra de circuíto. Janice di: “Xehová contestou as miñas oracións, aínda que non da forma que eu esperaba. Necesitei o meu tempo para darme conta de que a súa resposta foi un regalo. Estoulle moi agradecida de que me dese esta oportunidade de sentir o seu cariño e a súa bondade”.

15. Por que é necesario que ás veces oremos cunha perspectiva máis ampla? (Ver tamén as imaxes).

¹⁵ A terceira pregunta é: “Debería orar cunha perspectiva máis ampla?”. Aínda que é bo ser específico nas nosas oracións, é posible que nos sexa máis fácil ver o que Xehová quere para nós se oramos cunha perspectiva máis aberta. Pensemos no exemplo da irmá solteira que ora porque quere asistir ó Curso para Evanxelizadores do Reino. A súa intención é ir ó curso e así poder predicar nun sitio de maior necesidade. Así que, mentres segue orando para que a inviten a asistir, tamén podería pedirlle a Xehová que lle axude a identificar outras maneiras de ampliar o seu servizo (Feit. 16:9, 10). A continuación, podería actuar en harmonía coa súa petición preguntándolle ó superintendente de circuíto se algunha congregación da zona necesita máis pioneiros. Ou podería escribirlle á sucursal preguntando sobre onde hai máis necesidade de publicadores. e

16. De que podemos estar convencidos?

¹⁶ Neste artigo vimos que podemos estar convencidos de que Xehová responderá as nosas peticións dunha maneira amorosa e xusta (Sal. 4:4 [4:3, TNM]; Is. 30:18). Ás veces pode que a resposta non sexa a que esperamos, pero Xehová nunca ignorará as nosas oracións. El quérenos moitísimo e nunca nos abandonará (Sal. 9:11 [9:10, TNM]). Así que, “afiúnza [ou confía] sempre nel”, abríndolle o teu corazón cando lle oras (Sal. 62:9 [62:8, TNM]).