14
Dev Aplea Provadeam Udexim Uloita
Jehovahn monxubi, khori bhokti, ani Mesaisachea bhorvanxea vixim sondhex diunk provadeank nemle
ISRAEL ani Judeiachea razanchea kallar, ek khas monxancho pongodd Devache sondhex kolloitale. Tankam provadi mhonnttale. He monis odhik bhavartan ani dhiran Devache sondhex porgott’tale. Devachea provadean vistarlele char vixoi ami polloumia.
1. Jerusalemachem nisonttonn. Khub vorsam adim, Devachea provadeanim khas korun Izaiasan ani Jeremiasan xiddkavnni dill’li ki Jerusalem nisonttonn zavun padd urtolem. Devacho krodh tea xaracher kiteak ailo tem tannim spoxtt utranim kolloilem. Tea xarachea lokanim Jehovahche dekhin cholpak kel’lea daveak tim fottkirim zalim karann tea lokanim khotto dhorm, broxttachar ani zulum apnnailo.—II Raza 21:10-15; Izaias 3:1-8, 16-26; Jeremias 2:1–3:13.
2. Khori bhokti portean sthapon zata. 70 vorsam pordesant koidi ravlea uprant, Devachea lokachi Babilonia thaun suttka zateli. Te aplea padd urlolea desant ieun Jerusaleant Jehovahchem mondir portean bandtele. (Jeremias 46:27; Amos 9:13-15) Sumar 200 vorsam adinch, Cyrus nanvacho raza Babiloniacher zoit vhortolo mhonn Izaiasan bhakit kel’lem. Hoch raza Devachea lokank khori bhokti portean sthapunk vochonk ditolo. Cyrus koxe porim tea xaracher zhuz mandtolo hachi bariksann legun Izaiasan dil’li.—Izaias 44:24–45:3.
3. Mesiasachem iennem ani tache onnbhov. Mesias Bethlehem nogrant zolmotolo. (Mika 5:2) To lhanvik monacho astolo, eka gaddvacher boson Jerusaleant ietolo. (Zekaria 9:9) To dulob ani doiall asunui loka modem famad naslolo ani zaite zann taka nakartole. (Izaias 42:1-3; 53:1, 3) Taka nixttur moronn favo zatolem. Tor ho Mesiasachea jivitacho xevott kai? Na, kiteak tachea bolidana udexim zaiteank patkanchem bhogsonnem mellchem aslem. (Izaias 53:4, 5, 9-12) Hem tachea punorjivontponna udexinch ghoddon ietelem.
4. Mesiasachi razvott prithumecher. Khoreponnim opurnn monxam kedinch xhantiponnan raz cholounk xokona, punn Mesias Raza vortoutolo xhanticho kunvor. (Izaias 9:6, 7; Jeremias 10:23) Tache razvottkent sogllim monxam eka meka thaim ani toxench soglle zonvar rochnne thaim xhantin jietolim. (Izaias 11:3-7) Duvens anik aschench na. (Izaias 33:24) Moronn porian sasnnak kaddun uddoitolo. (Izaias 25:8) Mesiasache razvottkent, mell’le lok hech prithumecher novean jivont zatole.—Daniel 12:13.
