JEHOVAH xanneaponnan raz cholovpi kai? Hea proxnacho zabab mellpachi ek rit mhunttlear tannem budh dilea ti somzun gheunk. Ti budh upeogak poddteli? Ti budh jivitak lailear, jivit sudartelem ani orthbhorit zatelem? Xannea Razan Solomonan xhemborianim Mhonn’nneo boroileo. Heo Mhonn’nneo jivitachea dor eka bhagak sarkeo lagtat. Thoddim udharannam ami polleumia.

Devacher Visvas Dovorat. Jehovah lagim ek boro sombondh dovortolo zalear, visvas ek chavi zavun asa. Solomon boroita: “Sogllea kallzan Devacher visvas dovor, svotache zannvaiecher bhavart dhorinakai; tum dor ek panvl ukolta tedna tacho ugddas kor ani to tujeo vatto nitt kortolo.” (Mhonn’nneo 3:5, 6) Devacher pattieun tache vatten cholon, tachem utor pallun, amche jinnent chodd orth mellta. He jivitache chale udexim, monis Devachem kalliz khoxal korta, ani Jehovah, Soitanan kel’lea aropak sarko zabab dita.—Mhonn’nneo 27:11.

Dusrea lagim xanneponnan vagop. Potink, potinnik ani bhurgeank Devan dil’li budh adlea kalla poros aichea kallak chodd lagta. Dev potink aplea potinnik visvaxi ravonk budh divun oxem sangta. “Tuje tornne piraier logn zalole baile sangatak dadhoxi za.” (Mhonn’nneo 5:18-20) Logn zal’lea ostoreank Mhonn’nnechea pustokant ek gunnest ostore vixim vachunk mellta, tichea borea vavrak lagun, ticho poti ani tichim bhurguim tika vakhannttat. (Mhonn’nneo Avesvor 31) Ani bhurgeank avoi-bapaichea utra pormonnem cholonk xikvonn mellta. (Mhonn’nneo 6:20) Ixttagot chodd molachi mhonn Mhonn’nneo pustokui dakoita, eksurponnan ravlear apsuvarth vaddta. (Mhonn’nneo 18:1) Borem vo vaitt korunk ixttancho amcher dobhav poddonk xokta dekhun tankam vinchun kaddtana ami chotur ravonk zai.—Mhonn’nneo 13:20; 17:17.

Apleach sovem xanneponnan vagop. Mhonn’nneo pustokant bebdikai nakarunk, bolaikek boreak poddta toslim bhavnam utponn korunk ani noxttea bhavnacher zhuzonk ani mhennotin vavrunk amkam amolik buddheo melltat. (Mhonn’nneo 6:6; 14:30; 20:1) Devachi zannvai soddun monxachi zannvai apnnaita, to vignank sampoddta, hi-ui xiddkavnni tantunt mellta. (Mhonn’nneo 14:12) Amchem ontoskornn vaitt dobhava thaun rakhunk tem amkam urbha dita, amkam ugddas korta ki ‘Kallzantlean Jivitachi zhor futt’tta.’—Mhonn’nneo 4:23.

Sonvsarbhor lakhani lok zanno zaleat ki hea buddhinim chol’lear jivit dadhos bhorit zavunk xokta. Hakach lagun, Jehovah tancho Raza mhonn man’nun gheunk zaitim karannam asat.

—Mhonn’nneo pustokacher adarlelem asa.