JEHOVAHN sanglelea pormonnem, Solomon khore bhoktintlo koddsorlea uprant Israel raxttr doxim zalem. Tacho put ani herderi, Rehoboam darun aslo. Taka lagun, dha Israel kullieo virodh gheleo ani uttorechi razvottki sthapli. Davidachea xinvasonnar aslelea razak don kullieo nixttavont ravleo ani dakxinichi Judeia razvottki sthapli.

Donnui razvottkenchea itihasant uchambollai asli, chodd korun, bhavart naslolea ani Devachea utrak man dinaslolea razank lagon. Uttoreche Israel razvottkent Judeia poros chodd trass bhogche poddle karann tanche raza survatek thaun khottti bhokti vaddoit ravle. Elija ani Elisha provadeanim ojeapanchim vismitam korun, dogaimnim mell’leank punorjivont kele, tem pollovun legun Israel porza vaitt vatten koddsorot ravli. Xekim, Devan Assiriak uttor razvottkecho nas korunk dilem.

Judeia raxttr, Israela poros ek xekddea von matxo chodd kall urlem, tea uprant tacherui Devachi khast aili. Fokot thodde Judeiachea razanim Devachea provadeancheo xiddkavnneo man’nun ghetleo ani Israel raxttrak portun Jehovah-xim haddpak vavurle. Udharonnank, Judeiak khotte bhoktintlean Josia razan nitoll kelem ani Jehovahchea mondirant bhokti portun sthapli. Moizesak Devan dil’lea somurtichem mullavem pustok jedna Josiak mell’lem, tedna to ekdom khontibhorit zalo ani tea khatir tannem sudarni korcho vavr vaddoilo.

Dukh mhonnttlear, Josiachea pattlean ailelea razanim tachi bori dekh apnnaunk na. Heach karannak lagon Jehovahn Babilonia raxttrak Judeiacher zoit vhorunk ani Jeruzaleacho ani tachea mondiracho nas korunk dilem. Jive urloleank Babiloniant gulam korun vhele. Devan te 70 vorsam nirvaxi urtele mhonn adinch sanglolem. Hea kallant Judeia padd urlem ani xekim bhasail’lea pormonnem tea raxttrak aplea ganv desant porot ieunk mell’lem.

Torui astona, tea uprant Davidache vonxeavollintlean ani konnuch raza raz korchona, bhasail’lo Soddvonndar vo adim kolloil’lo Mesias ieum porian. Jerusaleant Davidache xinvasonnar boslele, tantle choddxe razanim opurnn monis raz choloupak purte nhoi mhonn dakovun dilem. Raz cholounk fokot Mesias khoro purto asa. Tea khatir, David kulliechea nimannea razak Jehovahn oxem mhonnttlem: “Tuzo mukutt kadd. . . . hanv venchun kadtolom to raza ie-sor hem ghoddchem na; uprant hanv razvottki tachea hatant ghaltolom.” Ezekiel 21:31, 32.

—I Raza; II Raza; II Itihas Avesvor 10 te 36; Jeremias 25:8-11 hacher adarlelem asa.