ગીતશાસ્ત્ર ૭૧:૧-૨૪
૭૧ હે યહોવા, મેં તમારામાં આશરો લીધો છે.
મારે શરમાવું પડે એવું ક્યારેય થવા ન દેતા.+
૨ તમારી સચ્ચાઈને લીધે મને બચાવો અને મને છોડાવો.
મારી તરફ તમારો કાન ધરો* અને મને બચાવો.+
૩ મારા માટે ખડક પરનો ગઢ બનો,જેમાં હું હંમેશાં દોડી જઈ શકું.
મને બચાવવાનો હુકમ કરો,કેમ કે તમે મારો ખડક અને મારો કિલ્લો છો.+
૪ હે મારા ભગવાન, મને દુષ્ટના હાથમાંથી છોડાવો,+અન્યાયી અને જુલમી માણસની પકડમાંથી મને બચાવો.
૫ હે વિશ્વના માલિક યહોવા, તમે જ મારી આશા છો.
મારી યુવાનીથી મેં તમારા પર ભરોસો રાખ્યો છે.+
૬ મેં જન્મથી જ તમારા પર આધાર રાખ્યો છે.
માના ગર્ભમાંથી મને બહાર કાઢનાર તમે જ હતા.+
હું નિરંતર તમારા યશોગાન ગાઉં છું.
૭ મારી સાથે જે બન્યું, એ જોઈને ઘણાને નવાઈ લાગે છે,પણ મારા માટે તો તમે જ મજબૂત ગઢ છો.
૮ મારું મોં તમારી સ્તુતિથી ભરપૂર છે.+
આખો દિવસ હું તમારા ગૌરવની વાતો કરું છું.
૯ મારા ઘડપણમાં મને તરછોડી ન દેતા.+
મારું બળ ખૂટી જાય ત્યારે મારો ત્યાગ ન કરતા.+
૧૦ મારા શત્રુઓ મારી વિરુદ્ધ બોલે છે,મારો જીવ લેવા ટાંપીને બેઠેલાઓ ભેગા મળીને કાવાદાવા કરે છે.+
૧૧ તેઓ કહે છે: “ઈશ્વરે તેને તરછોડી દીધો છે.
તેની પાછળ પડો અને પકડી લો, કેમ કે તેને બચાવનાર કોઈ નથી.”+
૧૨ હે ઈશ્વર, મારાથી દૂર ન રહો.
હે મારા ભગવાન, મને મદદ કરવા ઉતાવળ કરો.+
૧૩ જેઓ મારો વિરોધ કરે છે,તેઓ શરમાઓ અને નાશ પામો.+
મારા પર તકલીફો આવે એવું ચાહનારાઓ
શરમ અને અપમાનથી ઢંકાઈ જાઓ.+
૧૪ પણ હું તો તમારી રાહ જોઈશ.
હું તમારી વધુ ને વધુ સ્તુતિ કરીશ.
૧૫ મારું મોં તમારો સાચો માર્ગ જણાવશે,+આખો દિવસ ઉદ્ધારનાં તમારાં કામોનું રટણ કરશે,ભલે એની ગણતરી કરવી* મારા માટે મુશ્કેલ છે.+
૧૬ હે વિશ્વના માલિક યહોવા,તમારાં મહાન કામોનું હું વર્ણન કરીશ.
હું તમારા, ફક્ત તમારા ખરા માર્ગ વિશે વાત કરીશ.
૧૭ હે ઈશ્વર, તમે મને મારી યુવાનીથી શીખવ્યું છે.+
હું આજ સુધી તમારાં અજાયબ કામો પ્રગટ કરું છું.+
૧૮ હે ઈશ્વર, હું ઘરડો થાઉં અને માથાના વાળ સફેદ થાય ત્યારે પણ મારો ત્યાગ ન કરતા.+
તમારી શક્તિ વિશે આવનાર પેઢીને જણાવવાનો મોકો આપજો,આવનાર સર્વ લોકોને તમારાં પરાક્રમોનું વર્ણન કરવાની તક આપજો.+
૧૯ હે ઈશ્વર, તમારી સચ્ચાઈ* તો ઊંચાઈને આંબી જાય છે.+
તમે કેટલાં મહાન કામો કર્યાં છે!
હે ઈશ્વર, તમારા જેવું કોણ છે?+
૨૦ ખરું કે તમે મને મુશ્કેલીઓ અને આફતો સહેવા દીધી,+પણ મને ફરીથી તાજગી આપો.
પૃથ્વીનાં ઊંડાણોમાંથી મને બહાર કાઢી લાવો.+
૨૧ મારું માન-સન્માન વધારો,મારું રક્ષણ કરો અને મને દિલાસો આપો.
૨૨ હે મારા ઈશ્વર, તમારી વફાદારીને લીધે,+હું તારવાળું વાજિંત્ર વગાડીને તમારો જયજયકાર કરીશ.
હે ઇઝરાયેલના પવિત્ર ઈશ્વર,હું વીણા વગાડીને તમારી સ્તુતિ ગાઈશ.*
૨૩ હું તમારી સ્તુતિનાં ગીતો ગાઈશ ત્યારે, મારા હોઠો આનંદથી પોકારી ઊઠશે,+કેમ કે તમે મારું જીવન બચાવ્યું છે.+
૨૪ મારી જીભ આખો દિવસ તમારા સાચા માર્ગ વિશે વાતો કરશે.+
મારો વિનાશ ચાહનારાઓ લજવાશે અને બદનામ થશે.+
ફૂટનોટ
^ અથવા, “નમીને સાંભળો.”
^ અથવા, “એ સમજવું.”
^ શબ્દસૂચિમાં “ન્યાયી” જુઓ.
^ અથવા, “સ્તુતિ કરવા સંગીત વગાડીશ.”
