ઝખાર્યા ૩:૧-૧૦
૩ પછી તેણે* મને પ્રમુખ યાજક* યહોશુઆ બતાવ્યો,+ જે યહોવાના દૂતની આગળ ઊભો હતો. યહોશુઆનો વિરોધ કરવા શેતાન*+ તેના જમણા હાથે ઊભો હતો.
૨ યહોવાના દૂતે શેતાનને કહ્યું: “ઓ શેતાન, યહોવા તને ધમકાવે!+ હા, યરૂશાલેમને પસંદ કરનાર યહોવા+ તને ધમકાવે! શું આ માણસ આગમાંથી ખેંચી કાઢેલા લાકડા જેવો નથી?”
૩ હવે યહોશુઆ તો મેલાં કપડાં પહેરીને દૂતની આગળ ઊભો હતો.
૪ દૂતે પોતાની આગળ ઊભેલાઓને કહ્યું, “તેનાં મેલાં કપડાં ઉતારો.” પછી દૂતે તેને કહ્યું, “જો! હું તારા અપરાધ* દૂર કરું છું. તને ઉત્તમ કપડાં* પહેરાવવામાં આવશે.”+
૫ મેં કહ્યું: “તેને ચોખ્ખી પાઘડી પહેરાવો.”+ તેઓએ તેના માથે ચોખ્ખી પાઘડી મૂકી અને તેને કપડાં પહેરાવ્યાં. એ વખતે યહોવાનો દૂત નજીકમાં જ ઊભો હતો.
૬ યહોવાના દૂતે યહોશુઆને જણાવ્યું:
૭ “સૈન્યોના ઈશ્વર યહોવા કહે છે, ‘જો તું મારા માર્ગોમાં ચાલીશ અને મેં સોંપેલી જવાબદારીઓ નિભાવીશ, તો તું મારા ઘરમાં ન્યાયાધીશ તરીકે સેવા આપીશ+ અને મારાં આંગણાંની* સંભાળ રાખીશ.* અહીં ઊભા છે તેઓની જેમ તું પણ મારી હજૂરમાં છૂટથી આવજા કરીશ.’
૮ “‘હે પ્રમુખ યાજક યહોશુઆ, સાંભળ, તું અને તારી આગળ બેસતા તારા સાથીઓ ભવિષ્ય માટે નિશાની છો. જુઓ! હું મારા સેવકને લાવું છું,+ જે અંકુર કહેવાય છે!+
૯ યહોશુઆ આગળ મૂકેલો પથ્થર જુઓ! એક પથ્થર પર સાત આંખો છે. હું એના પર એક લખાણ કોતરી રહ્યો છું. એક જ દિવસમાં હું એ દેશના અપરાધ દૂર કરીશ,’+ એવું સૈન્યોના ઈશ્વર યહોવા કહે છે.
૧૦ “‘એ દિવસે તમારામાંથી દરેક જણ પોતાના દ્રાક્ષાવેલા નીચે અને અંજીરી નીચે પોતાના પડોશીને બોલાવશે,’+ એવું સૈન્યોના ઈશ્વર યહોવા કહે છે.”
ફૂટનોટ
^ એ કદાચ યહોવાને બતાવે છે.
^ અથવા, “દોષ.”
^ અથવા, “ખાસ પ્રસંગ માટેનાં કપડાં.”
^ અથવા, “ચોકી કરીશ.”