Wawalayuu aishiikana wapüla:

Eeirü maʼaka 2.600 juya süchikijee niʼrüin Ezequiel wanee kasa anasü maʼin: niʼrüin wanee kareeta nuʼuniraka Jeʼwaa, chi Miyoʼushikai saaʼu kasa süpüshuaʼa. Anashaatasü maʼin tia kareetakat süka suwataain maʼin. Müsü aka suwatira tü shiyaakat juya, jaʼitairü ajununtaain, nnojotsü amaitaayaain (Ezeq. 1:4, 9, 12, 14, 16-27).

¿Kasa watüjaka sünainjee tü niʼrakat Ezequiel? Matüjainsat ooʼulawaa suulia aʼyatawaa tü nupueulose Jeʼwaa chakat iipünaa. ¿Jama tü nupueulose yaakat mmapaʼa? Aʼyataashaatasü maʼin, jaʼyasü tia sünainjee naʼyataain na wawalayuukana juyaka tiainka.

Chaa Estados Unidos, akolojooshii na wawalayuu suluʼukana Weteet chejee Brooklyn chamüin Warwick (Nueva York), jee suluʼumüin waneirua Weteet. Eeshii eeka najütünüin sünain wanee aʼyatawaa naata. Suluʼu waneirua mma, aʼyataashii maʼin na weteliitakana sünain akumajaa jee anoutaa wanee kasa sünain Weteet jee eeshii nakolojoole suluʼumüin wanee mma naata. Mayaapejeʼe nnojoliin jukolojooin, eesü eera tü jaainjakat süpüla jiʼyataain maʼin nümüin Jeʼwaa.

Talatüsü naaʼin na Laülaashii Jülüjakana Aaʼin na Aküjaliikana Pütchi Sainküin Mma jee atütülaasü naaʼin sutuma natüjaain saaʼu naʼyataain maʼin na wawalayuukana sainküin tü Mmakat wanaapünaa sümaa nupueulose Jeʼwaa. Watüjaa aaʼu wattain naalii na wawalayuu akolojookana suluʼumüin mma eere choʼujaain aküjalii pütchi. Eeshii eeka nekirajaain sünain wanee anüikii naata jee eesü nooʼulaküle naküjain pütchi süka waneirua kasa jekennuu. Eeshii na kooʼomüinkana aʼyataain nümüin Jeʼwaa. Ayatüshiʼiya aʼyataain na wawalayuukana nümüin Jeʼwaa jee neeʼiyateein alaain maʼin Satanaa, jaʼitaina na laülaayuuinakana jee na ayuuikana, ayatüshii waneepiain nümaa Jeʼwaa (1 Cor. 9:24).

Soto jaaʼin jülüjain naaʼin Jeʼwaa süpüshuaʼa tü kasa jaaʼinrakat süpüla jiʼyataain nümüin (Heb. 6:10). Müsü jukuwaʼipa maʼaka naaʼin Abraham sümaa Sara. Wanaa sümaa sülatüin suulia 70 nuuyase, anashiisü nümüin sümaa nüpüshi nakolojooin chejee Ur chamüin Canaánmüin. Kepiayaashi nia loona soʼu 100 juya, ooʼulaʼaleeshia nia suulia tia outapa nia. ¡Watta saalii kasa nüpütaka Abraham sümaa Sara süpüleerua naʼyataain nümüin Jeʼwaa! (Gén. 11:31; Aluw. 7:2, 3).

Anasü wasakireʼerüle waaʼin sünain wanaawale wakuwaʼipa sümaa nukuwaʼipa Abraham. Waneepiale wanee anoujashi nümaa Jeʼwaa maaʼulu yaa shia naaʼinraka tü nuluwataakalü anain Jesuu, müshi nia: «Juʼuna jumaala sainküin mmakat süpüshua süpüla jüküjainjatüin tachiki sümüin wayuu süpüla sunoujainjatüin tanain. Je  juwoutisaajeena naya saaʼu nünülia chi Tashikai, saaʼu tanülia tayakai chi Nüchonkai, je saaʼu nünülia chi Naaʼinkai Maleiwa» (Mat. 28:19).

«Juʼuna jümaala», müshi Jesuu, tü nüküjeekalü achiki shia ayatajanain waya sünain aküjaa pütchi. ¡Talatüshii maʼin waya sutuma tü kasa eekat sünainjee anain maʼin jiʼyataain, jiakana oushikajaakana nüchiirua Kürisüto! Jaʼyasü saaʼu anashiin nümüin Jeʼwaa tü aküjaakat pütchi otta nükaaliinjain waya sünain aküjaa tü pütchi anasükat sainküin tü Mmakat (Mar. 13:10).

Wainma maʼin wayuu aapaaka sümaa nünüiki Jeʼwaa. Juyakat tiainka, eejana 8.340.847 aküjalii pütchi otta eejana 10.115.264 wayuu ekirajaaka sünain tü Wiwüliakat kashiwai. Jaʼyasü saaʼu shiʼyataain maʼin nupueulose Jeʼwaa, müshiʼiya jiakana ¡aʼyataashii maʼin jia! Sutuma tia, ayata jia sünain aküjaa pütchi süpülapünaa «keraashii jia suulia» nümüin Jeʼwaa wamüin.

¡Anasü maʼin tü asoʼinakalü anain waaʼin sünain tü pütchi süpülajatkat juyakat tüü 2017! Müsü mayaa: «Piʼitaa paaʼin nünain Jeʼwaa otta paaʼinra kasa anasü sümüin wayuu» (Sal. 37:3, TNM). Woonoole sümaa tia pütchikat jee waaʼinrüle kasa anasü sünain aʼyatawaa nümüin Jeʼwaa, weeʼiyateerü weʼitaain waaʼin nünain Jeʼwaa. Soto waaʼin waneepia nnojoliin wamüiwaʼain waya. Anuu nünüiki Jesuu: «Shiimüin sünain jümaainjachin taya waneepia waneʼereʼeya süntapa tü kaʼi sajaʼlajaweetkat oʼu kasa süpüshua» (Mat. 28:20). ¿Nuuʼulaajeetche suulia nikeeraajüin tü nümakat wamüin?

Soto waaʼin aneerüin sukuwaʼipa waʼyataain nutuma Jeʼwaa. Shia kojutuka nümüin Jeʼwaa waʼyataale süka süpüshuaʼa waaʼin otta anale tü suluʼukat waaʼin, jaʼitairü wainmain jee palitchon waʼyataain. Waaʼinrüle tia, talatüsü naaʼin watuma jee akulemeraashi nia (2 Cor. 9:6, 7). Müshiijeseʼe ayatüinjanain waya sünain oʼuraajaa nümüin chi Washikai, wekirajaainjatü anain tü Nünüikikat otta aküjainjana waya pütchi sümaa talatüin waaʼin. Aleeweena maʼin waya nümaa sutuma tia.

Nütüjaa aaʼu Satanaa «sülüʼülüin nükalia süpüla ataʼünnaa» otta nuuʼuleʼereein waya suulia waneepiaa nümaa Jeʼwaa (Alat. 12:12). Nüchajaain sukuwaʼipa chi Yolujaakai süpüla nnojoluin waneepiain waya nümaa Jeʼwaa. Nnojoleerü nuuntüin Satanaa tia ayatüle waya pejein nünain Jeʼwaa (Sal. 16:8). Nnojo motuin jaaʼin alin maʼin jia wapüla otta waapüin analuʼut jümüin saaʼu jükaaliinjain waya sünain aaʼinmajaa tü kasa sünainpünaakat Nuluwataaya Maleiwa, soʼutpünaa sülüʼülüin sükalia süpüla sajaʼttüin kasa mojusü.

Na juwalayuukana,

Na Laülaashii Jülüjakana Aaʼin na Aküjaliikana Pütchi Sainküin Mma