Wainma kasa aküjünaka süchiki tü aainjünajatkat süpüla sümüliajünüin saaʼin wanee wayuu eekai ouktüin apüshi, nnojotpejeʼe pansaain süpüshuaʼa tü münakat. Jamüsüjaʼa paajüin, eeshii na makana namüin na kaamakashiikana: «Püchechera paaʼin, nnojo piʼyalajüin». Eetaashii joo na makanaya: «Nnojotsü anain püchecherüle paaʼin suulia aʼyalajaa». Pansaainjaʼa tü sümakat tü Wiwüliakat süchiki tia otta shiaʼaya neʼe tü aainjünajatkat naashin na ekirajaakana süchiirua amüliajaa naaʼin na ouktakana apüshi.

Suluʼu waneeirua mma wattapünaa, nnojotsü anashiin amüinyüü niʼyalajüle wanee toolo. ¿Japülinjaiche wanee wayuu sünain aʼyalajaa suʼupala wayuu? Naashin waneeinnua tottoot, anashi niʼyalajüle wanee wayuu ouktüle nüpüshi. Naaʼinrüle wanee wayuu tia, eejiraajeechi nia sümaa tü mojaakalü aaʼin. Nnojotsü anain nümüin wayuu nüchecherüle naaʼin müleka niʼyalajeere nüchiirua wanee nüpüshi eekai nünaajaain. Nnojotsü süküjüin tü Wiwüliakat mojuin aʼyalajaa nüchiirua wanee wapüshi eekai nünaajaain. Akaʼaya shia, nnojotsü  süküjüin mojuin niʼyalajüle wanee wayuu toolo. Ichaʼasa Jesuu aʼyalajüin nüchiirua Lázaro, eejatü wainma wayuu soʼu tia otta nnojoishi nia japülin. Aʼyalajüshi nia eerejeʼe pülain nia süpüla nüsoʼireʼerüin saaʼin wayuu ouktüsü (Juan 11:33-35).

Eeshii eekai naashichijaain sooʼomüin wayuu sutuma mojuin maʼin naaʼin, yaaʼaleekajaʼa ouktüle wanee nüpüshi sutuma mamaʼajawaa. Wainma kasa eeka süpüla jashichin anainjee wanee wayuu eekai kaamakain; eesü süküjünüle nümüin wanee pütchi airuʼutka nümüin nutuma wanee wayuu niʼraajakai, jashichi müshijaʼa nia suluʼujee tia. Anuu nünüiki Mike, chejeʼewai nia Sudáfrica: «Wanaa sümaa ouktüin chi tashikai, 14 touyase. Soʼu niʼitaanüin taata, nüküjüin chi pastootkai anglicano sünain nümaain Maleiwa chaa iipünaamüin na anamiakana, süka jamüin, choʼujaain naya nümüin. * Üttüsü taaʼin sutuma tü nümakat süka choʼujaain wamüin taata. Ayatayülia alin tamüin tü nümakat chi pastootkai mayaapejeʼe sülatüirüin aipirua shikii juya süchikijee tia».

¿Jama «taya kasitka» nümüle wanee wayuu? «Nnojoishije nia ouktüin yaayüireje taya, takaaliinjüinje nia», eeshi chi makai ouktalaa nümüle wanee kasa nünain. Shialeekajaʼa müleka nüʼülüjiraale paala nümaa chi anaajaakai.

Ichere suluʼu pikii tia, acheküsü püküjüin shia nümüin wanee paʼaleewain akaaliinjeechikai pia süpüla piyaawatüin saaʼu jamüin makaʼa paaʼin. «Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin», müsü tü Wiwüliakat (Proverbios 17:17, TNM).

Chi anaʼleekai süpüla püküjüin amüin tü mojukalü atuma paaʼin nia Jeʼwaa. Püküja nümüin süpüshuaʼa tü suluʼukat paaʼin, süka jamüin, naaʼinmajüin pia (1 Pedro 5:7). Jimateerü paaʼin paaʼinrüle tia, «aapüneerü wane anaa jümüin nütüma. Isasü wachiki wayaawatüin saaʼu tia anaa naapakat wamüin» (Filipos 4:6, 7). Puuʼulaa niaiwa Jeʼwaa amüliajüin pia sükajee tü Wiwüliakat. Aneerü pümüin müleka püshajüle kojuyasü wetsiikulo suluʼujeejatü tü Wiwüliakat süpüla pikirajaain sünain (paashajeʼera tü wetsiikuloirua yaakat  wünaapünaa). Aneerü paaʼin paashajeʼerüle tia pütchikalüirua, shialeekajaʼa jiwaʼatüle paaʼin saʼwai otta pümüiwaʼale pia (Isaías 57:15).

Eetaashi wanee wayuu ouktakai aʼwayuuse jekenainka sutuma kanset, Jack nünülia chia wayuukai, 40 nuuyase. Eesü mojuwaire maʼin naaʼin sutuma nümüiwaʼain nia, shia anaka atuma naaʼin tü oʼuraajaakat. Müshi nia: «Anashi taya wanaa sümaa taashajaain nümaa Jeʼwaa. Eeshi tachijiraʼawaire saʼwai otta nnojoishi atunkeein taya. Taashajeʼera tamüsüjaʼa tü Wiwüliakat, tasakireʼerüin taaʼin sünain tü taashajeʼerakat otta taküjüin nümüin Maleiwa tü suluʼukat taaʼin. Sutuma taaʼinrüin tia, anashi taya otta nnojoishi jiwaʼatüin taya, atunka müshijaʼa taya süchikijee».

Akaataajaʼa Vanessa, anasü saaʼin sutuma suʼuraajüin. Ouktüsü tü shiikat sutuma ayuulii. Anuu sünüiki: «Eesü taʼyalajawaire maʼin süchiirua maama otta tachuntawalin waneepia tü nünüliakat Maleiwa. Naapüin Jeʼwaa tü tachuntakat nümüin, nükaaliinjain taya waneepia».

Naashin waneeinnua tottoot, aneerü naaʼin na kaamakashiikana müleka nakaaliinjale wayuu sünain wanee kasa eekai choʼujaain namüin. Sükajee tia, amülialaajeerü naaʼin (Aluwataaushikana 20:35). Eeshii wawalayuu atütülaakana aaʼin nachikuaʼa sutuma nakaaliinjain na wayuukana (2 Corinto 1:3, 4).